झाडावरची नैसर्गिक कच्ची केळी जेव्हा अनैसर्गिक पद्धतीने पिकवून बाजारात येतात, तेव्हा गृहिणीच्या मनात एकच प्रश्न असतो… “ही केळी लवकर खराब तर होणार नाहीत ना?”
घरी आणलेली ती टपोऱ्या रंगाची केळी रोज माझ्याकडे पाहत असतात आणि मी त्यांच्याकडे!
“आज कोण खाणार?”
“उद्या खाऊ…”
“अजून आहेत की!”
असा संवाद घरात सुरू असतो.
हेही वाचा – शिळ्या पोळ्यांचा सिंधी जलवा — “सेयाल फुलका”
दोन-तीन दिवसांतच केळी आपला रंग बदलायला लागतात. आधीच घाईघाईत पिकवलेली असल्यामुळे घरी आल्यावर ती आणखी भराभर मऊ पडतात आणि मग घरातल्या प्रत्येकाचा एकच सूर…
“मला नको केळं!”
खरं सांगायचं तर, केळं आजकाल फारसं कुणाचं आवडतं फळ राहिलेलं नाही. मग अशा वेळी माझ्यातली गृहिणी जागी होते. फेकून द्यायचं मनाला पटत नाही… आणि ती केळीही जणू विनवणी करत असतात,
“आम्हाला अजून एक संधी द्या!”
बस्स! मग ती केळी सरळ किचनमध्ये प्रवेश करतात… मनात एखादी जुनाट, पण भन्नाट रेसिपी चमकून जाते आणि सुरू होतो… बनाना डिलाइट रोटीचा प्रवास!
रवा, गूळ, खोबरं, काजू-बदाम, वेलची-जायफळ आणि ती थोडीशी नाराज झालेली केळी… सगळे एकत्र आलं की, तयार होतं एक गोड, मऊ, सुगंधी सारण. मग ते सारण कणकेच्या उबदार पोळीत भरलं जातं आणि तव्यावर तुपात भाजताना घरभर असा सुगंध दरवळतो की, ज्यांनी थोड्याच वेळापूर्वी केळं खायला नकार दिला होता, तेच आता विचारतात…
“अगं, अजून एक रोटी मिळेल का?”
आणि तेव्हा मनात एकच विचार येतो —
स्वयंपाकघरात काहीच वाया जात नाही. थोडी कल्पकता, थोडं प्रेम आणि गृहिणीचा थोडासा हट्ट असेल तर, अगदी दुर्लक्षित केळंसुद्धा ‘बनाना डिलाइट’ बनून सगळ्यांच्या मनात गोड जागा करून जातं!
हेही वाचा – कार्यक्रम कांदेपोह्यांचा!
बनाना डिलाइट रोटी
पोळीकरिता साहित्य
- कणीक – एक कप
- मीठ – चिमूटभर
- हळद – चिमूटभर
- पाणी – आवश्यकतेनुसार
- तूप – पाव टीस्पून
सारणासाठी साहित्य
- पिकलेली केळी – 2
- रवा – पाव कप
- गूळ – अर्धा कप
- खोबऱ्याचा किस – अर्धा कप
- मिल्क पावडर – 2 टीस्पून
- काजू-बदाम काप – 2 टेबलस्पून
- वेलची पूड – अर्धा टीस्पून
- जायफळ पूड – चिमूटभर
- तूप – 1 ते 2 टीस्पून
कृती
- प्रथम कणकेत मीठ, हळद आणि थोडंसं तूप घालून मऊसर कणीक भिजवून घ्यावी आणि झाकून ठेवावी.
- कढईत तूप गरम करून रवा हलका भाजून घ्यावा. त्यात मॅश केलेली केळी घालावीत.
- त्यानंतर गूळ, खोबऱ्याचा किस, मिल्क पावडर, काजू-बदाम, वेलची पूड आणि जायफळ पूड घालून मिश्रण सतत हलवत घट्ट होईपर्यंत परतावे. नंतर सारण थंड होऊ द्यावे.
- भिजवलेल्या कणकेचे गोळे करून छोटी पुरी लाटावी. त्यात तयार सारण भरून हलक्या हाताने पोळी लाटावी.
- तवा गरम करून ही पोळी तुपावर दोन्ही बाजूंनी छान भाजून घ्यावी.
- बस्स! गरमागरम, मऊ, गोड आणि पौष्टिक बनाना डिलाइट रोटी तयार!
विचार, साहित्य, कला आणि संस्कृतीच्या सर्जनशीलतेला समर्पित असलेल्या avaantar.com या वेबपोर्टलवरील वैविध्यपूर्ण वाचनीय लेखाचा आनंद घ्यायचा असेल तर,
IXZVpuvKFwKH6gb0NBN51t?mode=r_c
या लिंकला क्लिक करून WhatsApp group जॉइन करा.
