दर्शन कुलकर्णी
- आज, दिनांक : 01 ऑगस्ट 2026; वार : शनिवार
- भारतीय सौर : 10 श्रावण शके 1948; तिथि : तृतीया 23:07; नक्षत्र : शततारका 20:44;
- योग : शोभन 23:22; करण : वणिज 10:52;
- सूर्य : कर्क; चंद्र : कुंभ; सूर्योदय : 06:14; सूर्यास्त : 19:15;
- पक्ष : कृष्ण; अयन : दक्षिणायन; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
वेद कन्सल्टन्सी / 9987433660
दिनविशेष
मराठी कवी आणि विद्वान महादेव मोरेश्वर कुंटे
टीम अवांतर
मराठी कवी आणि विद्वान महादेव मोरेश्वर कुंटे यांचा जन्म 1 ऑगस्ट 1835 रोजी सांगली जिल्ह्यातील माहुली या गावी झाला. त्यांचे प्राथमिक शिक्षण कोल्हापूर आणि मुंबई येथे झाले. पुढे 1864 साली ते मुंबई विद्यापीठातून पदवीधर झाले. पुढे मुख्याध्यापक म्हणून त्यांनी कराची, कोल्हापूर, पुणे येथे नोकरी केली. काही काळ ते मुंबईला संस्कृतचे प्राध्यापक म्हणून देखील कार्यरत होते. अहमदाबाद येथील एका महाविद्यालयाचे काही काळ प्राचार्यपदही त्यांनी भूषविले.
मराठीबरोबरच इंग्रजी, संस्कृत, सिंधी, गुजराथी या भाषांवर देखील प्रभुत्व असल्यामुळे ते त्या भाषांमधून अस्खलित भाषण करीत असत. ग्रीक, पर्शियन आणि लॅटिन भाषांचेही ते जाणकार होते. “रोमॅंटिक स्टाइल’मध्ये काव्य लिहिणारे त्या काळातील ते एकमेव कवी होते.
हेही वाचा – कहाणी सकिना अन् खुशबूची
राजा शिवाजी या काव्याने त्यांचे नाव विशेष गाजले. इंग्रजी साहित्यातील हिरोइक एपिक म्हणजे वीररसप्रधान महाकाव्य मराठीत आणण्याचा हा पहिला प्रयत्न होता. या काव्याच्या इंग्रजी प्रस्तावनेमधील काव्यविषयक विचारसरणी महत्त्वाची आहे. आपल्या काव्यात त्यांनी नित्याच्या व्यवहारातील भाषा आवर्जून वापरली आहे. आधुनिक मराठी काव्याच्या दृष्टीने हा प्रयोग क्रांतिकारक होता. त्यांनी बहिर्जींची नारदमुनींबरोबर तुलना केली. बहिर्जी एखाद्याची माहिती देताना त्या ठिकाणचे वर्णन, व्यक्तीचे गुणदोष, त्याची दुखरी ‘नस’ यांचा अभ्यास करून मग ती माहिती राजांकडे पोहोचती करीत असत. अशाच प्रकारे महाराजांच्या इतर अनेक शिलेदारांच्या कर्तृत्वाचे त्यांनी वर्णन ‘राजा शिवाजी’ या खंडकाव्यात केले आहे. पूर्वी शालेय क्रमिक पुस्तकात ‘बहिर्जी नाईक’ या नावाने कवितेचा समावेश होता. याशिवाय राजाराम महाराज छत्रपति, मन नावाची कविता ही त्यांची इतर काव्यरचना देखील प्रसिद्ध झाली. मराठीबरोबरच त्यांनी इंग्रजी काव्यरचनाही केली, ज्यात ऋषी आणि फॅमिश्ड व्हिलेज यांचा समावेश आहे. इटलीच्या विद्वत्परिषदेने घेतलेल्या स्पर्धेसाठी व्हिसिसिट्यूड्स ऑफ आर्यन सिव्हिलिझेशन इन इंडिया हा प्रबंध पाठवून त्यांनी पारितोषिक मिळविले. 1877 साली षड्दर्शनचिंतनिका हे मासिक काढून त्यांनी इंग्रजी-मराठीतून प्राचीन भारतीय तत्त्वज्ञानाचा परिचय करून दिला. 8 ऑक्टोबर 1888 रोजी पुणे येथे त्यांचे निधन झाले.
आजचे राशीभविष्य
मेष – ऊर्जा आणि उत्साहाने भरलेला असा दिवस असेल. नोकरीच्या ठिकाणी तुमच्याबद्दलचा आदर आणि सन्मान वाढेल, ज्यामुळे तुम्हाला अभिमान आणि समाधानाची भावना मिळेल. सामाजिक कार्यक्रमांमध्ये सहभागी झाल्याने प्रतिमा उंचावेल. संपत्तीचा काही भाग धर्मादाय संस्थेला दान करण्याचा विचार मनात येईल. मात्र मालमत्तेसंबंधी घाईने निर्णय घेणे टाळा.
वृषभ – तुमचे नेतृत्व कौशल्य आणि वेळेचे व्यवस्थापनात यात सुधारणा दिसून येईल. अनोळखी लोकांपासून अंतर राखणे फायदेशीर ठरेल. कुटुंबासोबत लहान सहलीचा आनंद घ्याल. आरोग्याकडे लक्ष द्या. बाहेरचे खानपान शक्यतो टाळा. व्यवसाय किंवा गुंतवणुकीसंबंधीचे जुने प्रश्न चर्चेद्वारे सोडवण्याचा प्रयत्न करा.
मिथुन – व्यवसायात अनपेक्षित लाभ आणि त्यामुळे होणारा आनंद मोठा असेल. जोडीदारासोबतचे मतभेद दूर झाल्याने नात्यातील अडचणी संपतील. नवीन वाहन खरेदी करण्याची शक्यता आहे. पैसे उधार देताना सावधगिरी बाळगा, कारण ते परत मिळण्याची शक्यता कमी आहे. राजकीय किंवा सामाजिक कार्यक्रमांमध्ये सहभागी झाल्याने प्रतिष्ठा वाढेल.
कर्क – संमिश्र अनुभवांनी भरलेला असा दिवस असेल, पण तो फलदायी ठरेल. वरिष्ठांच्या मार्गदर्शनामुळे कामे वेळेवर पूर्ण होण्यास मदत होईल. व्यावसायिकांना प्रतिस्पर्ध्यासोबत वाटाघाटी करण्याची संधी मिळेल. एखादी इच्छा पूर्ण झाल्याने खूप आनंद होईल. मात्र त्यावेळी घाईने कोणताही निर्णय घेणे टाळा.
सिंह – आजचा दिवस नेहमीपेक्षा चांगला जाणार आहे. अनावश्यक आश्वासनांपासून दूर राहा. कामाच्या ठिकाणी चांगली बातमी मिळण्याची शक्यता आहे. जबाबदाऱ्या पूर्ण करण्यासाठी कनिष्ठांकडून सहकार्य मिळेल. संततीच्या शैक्षणिक कामगिरीबद्दल शिक्षकांशी चर्चा करू शकता. स्वतःचे छंद आणि मनोरंजन यासाठी खर्च कराल.
कन्या – आजचा दिवस तुमच्यासाठी अनुकूल आणि सुखद अनुभव देणारा असेल. तुमची ऊर्जा आणि अनुभव कामात फायदेशीर ठरतील. बोलण्यात आणि वागण्यात सभ्यता राखा. संततीकडून एखादी चांगली बातमी ऐकायला मिळू शकते. त्यांना पुढील शिक्षणासाठी परदेशात पाठवण्याची संधी मिळू शकते.
तुळ – आरोग्याकडे बारकाईने लक्ष द्यावे लागेल. नोकरीच्या ठिकाणी काही ज्येष्ठ सहकाऱ्यांकडून पाठिंबा मिळेल आणि बऱ्याच काळापासून रखडलेली कामे गती घेतील. घराची दुरुस्ती किंवा सुशोभीकरण सुरू करू शकता. काही जुने शत्रू अचानकपणे मित्रत्वाचा हात पुढे करतील, जे तुमच्यासाठी आश्चर्यकारक ठरू शकते.
वृश्चिक – जोडीदाराच्या समस्यांवर तोडगा सापडेल. कुटुंबातील सर्वजण एखाद्या धार्मिक कार्यक्रमामध्ये व्यग्र असतील. संततीसोबत बऱ्याच दिवसांनी मौजमजा करण्यात काही वेळ घालवाल. व्यवसायात तोटा झाला असेल तर तो भरून निघण्याची शक्यता आहे. याआधी कोणाला काही रक्कम उधार दिली असेल तर, ती व्याजासकट परत मिळाल्याने आनंद होईल.
हेही वाचा – आराध्याचे धाडस अन् शर्वाय…
धनु – या राशीच्या जातकांसाठी आजचा दिवस फायदेशीर आणि उत्साहवर्धक असेल. संततीला त्यांच्या परीक्षेत किंवा कामात चांगले यश मिळू शकते. नोकरदारांना आतापर्यंत केलेल्या कष्टाचे फळ मिळेल. वरिष्ठांसोबत पदोन्नतीबद्दल चर्चा करू शकता. एखाद्याला महत्त्वाची माहिती देताना सावधगिरी बाळगा. कौटुंबिक समस्या चर्चेद्वारे सोडवण्याचा प्रयत्न करा.
मकर – संपूर्ण दिवस संयम बाळगावा लागेल. विचारपूर्वक उचललेली पावले कामे पूर्ण करण्यास मदत करतील. वडिलोपार्जित मालमत्तेशी संबंधित वादामध्ये यश मिळेल. पैसे उधार घेतले असतील, तर ते आज परत करावे लागतील. त्यामुळे आर्थिक परिस्थिती मजबूत करण्यासाठी जास्त प्रयत्न करा. वाहन चालवताना किंवा सहकाऱ्याकडून मदत घेताना सावधगिरी बाळगा.
कुंभ – जोखमीचे उपक्रम टाळा. नशीबाची मोठी साथ मिळेल. व्यवसायात उत्पन्नाचे नवीन स्रोत निर्माण होऊ शकतात. नोकरीच्या ठिकाणी सहकाऱ्यासोबत अनावश्यक वाद होण्याची शक्यता आहे. कामाच्या ठिकाणी कोणीतरी तुमची फसवणूक करण्याचा प्रयत्न करू शकते, त्यामुळे सावध रहा. स्वतःच्या मानसिक आरोग्याकडे लक्ष द्या.
मीन – काळजीपूर्वक विचार करून मगच निर्णय घेण्याची गरज आहे. संततीच्या करिअरबद्दल काळजी वाटू शकते. व्यवसायात जोखीम घेणे टाळा. अनोळखी लोकांपासून अंतर ठेवा. आई-वडिलांच्या आरोग्याकडे लक्ष द्या. कुटुंबासोबत एखाद्या लहान प्रवास करण्यासाठी दिवस चांगला आहे. या प्रवासादरम्यान महत्त्वाची माहिती मिळू शकते.
