कढी हा प्रकार बहुतांश भारतीयांचा आवडता प्रकार आहे. ठिकठिकाणी कढी करण्याची पद्धतही वेगवेगळी आहे. काही लोकांना तुपाच्या फोडणीतील कढी आवडते तर, काहींना तेलाच्या फोडणीतील, काही लोकांना जरा आंबट कढी आवडते तर काहींना गोडसर चवीची, काहींना पातळसर कढी आवडते तर, काहींना घट्टसर, काही लोकांना दह्याची केलेली कढी चालते तर काहींचा आग्रहच असतो की, लोणी काढलेलं ताक असेल तरच कढी करावी नाहीतर नाही! बरं त्याच्या फोडणीत कढीपत्ता, जिरं, जाड मोहरी/ बारीक मोहरी किती आणि कसे वापरायचे तेही प्रमाण त्या कुटुंबातील सदस्यांच्या आवडी निवडीनुसार ठरते. फोडणीमध्ये फक्त हिरवी मिरची आणि आलं वापरायचं की लसूणही घालायचा, यावरूनही बरीच काथ्याकूट होते. काहींना कढीपत्ता वगैरे दाताखाली आलेला अजिबात आवडत नाही, तर माझ्यासारखी कढीपत्ता चावून खाणारी माणसं निराळीच म्हणावी लागतील! कढी अजिबात न आवडणारे लोकही आहेत, परंतु हाताच्या बोटावर मोजता येण्याजोगे… म्हणतात ना “व्यक्ती तितक्या प्रवृत्ती!”
मध्य प्रदेश, उत्तर प्रदेश या भागात कढीपकोडा हा प्रकार फार प्रचलित आहे. गुजराती लोक गोडसर आणि घट्ट कढी पसंत करतात. आमच्या नागपूरमध्ये सांबारवडी, समोसा यासोबत चाटवाल्यांकडे कढी देतात. मध्य प्रदेश, छत्तीसगड, आंध्रप्रदेश या राज्यांच्या सीमांना लागून असल्यामुळे नागपूरच्या आहार पद्धतीमध्ये संमिश्रता आढळते. अशा या कढीच्या विविध प्रकारातीलच विदर्भात बहुतेक सगळ्याच लोकांचा आवडीचा प्रकार म्हणजे कढीगोळे! याची रेसिपी आपण पाहूयात –
कढीचे साहित्य
- ताक – अर्धा लिटर
- बेसन – दोन चमचे
- पाणी – एक ते दीड वाटी
- मीठ – चवीनुसार
- साखर – चवीनुसार
- तूप किंवा तेल – एक पळी
- मोहरी – एक चमचा
- जिरं – एक चमचा
- हिंग – एक लहान चमचा
- हळद – अर्धा चमचा
- काळीमिरी – तीन ते चार दाणे
- लवंग – तीन ते चार
- मेथीदाणे – चार ते पाच
- हिरवी मिरची, आलं, लसूण आणि कोथिंबिरीची पेस्ट
- कढीपत्ता – सात ते आठ पाने
- बारीक चिरलेली कोथिंबीर – अर्धी छोटी वाटी
कृती
- अर्धा लिटर ताकात एक ते दीड वाटी पाणी घालून त्याला दोन चमचे बेसन लावावे.
- नंतर त्यात चवीनुसार मीठ आणि साखर टाकून ताक घुसळून घ्यावे.
- कढईत एक पळी तूप किंवा तेल घेऊन ते तापले की, त्यामध्ये एक चमचा मोहरी, एक चमचा जिरे टाकून ते तडतडल्यावर गॅस मंद करुन एक लहान चमचा हिंग टाकावा.
- नंतर त्यात सात-आठ कढीपत्त्याची पाने टाकून तीन-चार मिरे, लवंग आणि चार-पाच मेथीदाणे टाकून नंतर हिरवी मिरची, आलं, लसूण आणि कोथिंबीरीची पेस्ट टाकून ती पेस्ट थोडी परतून अर्धा चमचा हळद टाकायची.
- या फोडणीमध्ये घुसळलेले ताक टाकावे आणि पळीने सर्व मिश्रण एकदा ढवळून घ्यावे.
- खमंग कढी उकळत आली की, वरून परत एकदा कोथिंबीर पेरून मंद गॅसवरच थोडी आणखी उकळून घ्यावी.
- कढी उकळत असतानाच त्यात चणाडाळीचे गोळे हळूवारपणे सोडावे आणि कढीला अधून मधून ढवळत मंद गॅसवर कढीगोळे उकळून घ्यावे.
हेही वाचा – Recipe : विदर्भ स्पेशल… दाणेभात अन् ठेचा
टीप्स
- काळे मिरे, लवंग व मेथीदाणा टाकल्याने कढीला खमंग चव येते.
- विदर्भात कढी ही बहुतेक तेलाच्या फोडणीची करतात.
कढीतील गोळ्यांसाठी साहित्य
- चणाडाळ – दोन वाट्या (तीन ते चार तास पाण्यात भिजवून ठेवलेली)
- हिरव्या मिरच्या – चार
- लसूण पाकळ्या – सात ते आठ
- आले – साधारणपणे दोन इंच
- जिरे – एक चमचा
- मीठ – चवीनुसारर
- बरीक चिरलेली कोथिंबीर – मूठभर
कृती
- तीन ते चार तास भिजवलेली चणाडाळ पाण्यातून उपसून कापडावर थोडी वाळत ठेवावी. म्हणजे त्यातील ओलसरपणा थोडा कमी होईल, जेणेकरून त्याचे गोळे सैल होऊन कढी उकळताना फुटणार नाहीत.
- ही चणाडाळ वाटताना हिरवी मिरची, लसूण, आलं, जिरे, मीठ आणि कोथिंबीर टाकावी. या मिश्रणाचा जाडसर भरडा वाटून घ्यावा.
- या भरड्याचे आपल्याला हवे तसे गोळे तयार करावेत आणि कढी तयार करून ती उकळली की, त्यात हे गोळे सोडावेत.
हेही वाचा – Recipe : विदर्भ स्पेशल… भातावरचे पिठले
टीप्स
- हे गोळे सैलसर वाटत असतील तर, एका मोठ्या भांड्यात पाणी उकळायला ठेवावे आणि चाळणीवर तेलाचा हात लावून ती त्यावर ठेवावी आणि त्यात हे गोळे वाफवून घ्यावेत.
- कढी गोळे करताना कढी थोडी पातळसर केल्यास चणाडाळीचे गोळे बाधत नाहीत.
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.
या ईमेलवर किंवा
9869975883 या व्हॉट्सॲप क्रमांकावर
तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
