दर्शन कुलकर्णी
- आज, दिनांक : 13 जून 2026; वार : शनिवार
- भारतीय सौर : 23 ज्येष्ठ शके 1948; तिथि : त्रयोदशी 16:08; नक्षत्र : कृत्तिका 25:17;
- योग : सुकर्मा 17:28; करण : विष्टि 26:15;
- सूर्य : वृषभ; चंद्र : मेष 09:25; सूर्योदय : 06:00; सूर्यास्त : 19:15;
- पक्ष : कृष्ण; अयन : उत्तरायण; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
शिवरात्री
वेद कन्सल्टन्सी / 9987433660
दिनविशेष
भारतीय तिरंदाज दीपिका कुमारी
टीम अवांतर
भारतीय तिरंदाज दीपिका कुमारी हिचा जन्म 13 जून 1994 रोजी झारखंडमधील रांची येथे झाला. तिचे वडील रिक्षाचालक तर आई रांची वैद्यकीय महाविद्यालयात परिचारिका म्हणून कार्यरत होते. दीपिका ही लहानपणापासूनच नेमबाजीत तरबेज. जसजशी तिने या खेळाबद्दल माहिती मिळवली, तसा या खेळामधील तिचा रस आणखी वाढला. तिरंदाजीमध्ये नाव कमावण्याचे तिचे स्वप्न होते. मात्र घरच्या बिकट परिस्थितीचा विचार करून वडिलांचा सुरुवातीला तिला विरोध होता. तिरंदाजीसाठी लागणारी साधने घेण्यासाठी लागणारे पुरेसे पैसेही गाठीला नव्हते.
परिणामी, दीपिकाने बांबूपासून घरच्या घरी धनुष्य आणि बाण बनवून सराव करायला सुरुवात केली. तिची ही जिद्द आणि या खेळाबद्दल असणारा जिव्हाळा, एकाग्रता बघून वडिलांनी अखेर माघार घेतली. दीपिकाची चुलत बहीण विद्या कुमारी ही ‘टाटा आर्चरी अॅकॅडमी’मध्ये तिरंदाजीचे शिक्षण घेत होती. अकादमी आणि विद्याच्या मार्गदर्शनामुळे दीपिकाला खेळाबद्दलचे मूलभूत ज्ञान मिळाले. 2005मध्ये ‘अर्जुन आर्चरी अकादमी’मध्ये प्रवेश घेतल्यानंतर लवकरच दीपिकाला राष्ट्रीय पातळीवर खेळण्याची पहिली संधी मिळाली. पण, तिरंदाजीमध्ये तिचा खरा प्रवास हा 2006मध्ये जमशेदपूरच्या ‘टाटा आर्चरी अकादमी’मध्ये सुरू झाला. इथे तिला आवश्यक आणि योग्य साधने, उपकरणे तसेच गणवेश मिळाला. याचवर्षी मेक्सिको येथे झालेल्या तिरंदाजीच्या विश्वचषक स्पर्धेत तिने ‘ज्युनिअर कम्पाऊंड’ स्पर्धा जिंकली. अशी कामगिरी करणारी ती दुसरी भारतीय महिला ठरली.
हेही वाचा – प्रीत परी तुजवरती…
त्यानंतर 2009मध्ये ‘कॅडेट वर्ल्ड चॅम्पियनशिप चषक’ तिने आपल्या नावे केला. याचवर्षी अमेरिकेमध्ये झालेल्या ‘ओगडेन यूथ वर्ल्ड आर्चरी चॅम्पियनशिप’मध्येही विजय मिळवला. तिच्या कारकिर्दीत सर्वात मोठे यश 2010मध्ये मिळाले, ‘दिल्ली कॉमनवेल्थ गेम्स’मध्ये तिने ‘वैयक्तिक रिकर्व्ह’ आणि ‘महिला रिकर्व्ह टीम इव्हेंट’मध्ये दोन सुवर्णपदके जिंकली.
दोन महिन्यांनी ग्वांग्झू येथे झालेल्या ‘आशियाई स्पर्धा 2010’मध्ये कांस्यपदक जिंकत जगभरात आपल्या नावाची दखल घेण्यास दीपिकाने भाग पाडले. यानंतर तिने कधी मागे वळून पाहिले नाही. 2012मध्ये तुर्की येथे झालेल्या तिरंदाजी विश्वचषक स्पर्धेत दीपिकाने पदार्पण केले. यावेळी तिने वैयक्तिक, संघ आणि मिश्र या तिन्ही प्रकारांत रौप्यपदक पटकावले.
तिच्या या दमदार कामगिरीची दखल घेत दीपिकाला 2012 मध्ये ‘अर्जुन पुरस्कार’ तर 2016मध्ये ‘पद्मश्री’ देऊन गौरव करण्यात आला. याशिवाय 2014 साली FICCI स्पोर्टस् ऑफ द इयर अवॉर्ड तर 2017 साली यंग अचिवर्स पुरस्काराने सन्मानित करण्यात आले आहे.
आजचे राशीभविष्य
मेष – आर्थिकबाबतीत नवीन संधी घेऊन येणारा दिवस आहे. मात्र गुंतवणूक आणि पैशांसंबंधी निर्णय घेताना संयम ठेवला तर चांगला नफा मिळू शकतो. कामाच्या ठिकाणी ध्येये साध्य करण्यासाठी पूर्णपणे कटिबद्ध असाल. व्यावसायिकांना उत्पन्न वाढवण्याच्या दृष्टीने गांभीर्याने विचार करावा लागेल. नवीन तंत्रज्ञानाचा आधार घेतल्यास फायदा होईल.
वृषभ – जितक्या हुशारीने वागाल, तितके यशाच्या जवळ जाल. समाजात तुमच्याबद्दलचा वाढलेला आदर आत्मविश्वास वाढवेल. लग्नाशी संबंधित अडथळे दूर झाल्याने घरात आनंदाचे वातावरण निर्माण होऊ शकते. तथापि, घरात एखाद्या लहानशा गोष्टीवरून किरकोळ वाद होऊ शकतो, त्यामुळे शांत राहणेच उत्तम.
मिथुन – कामात आणि जीवनशैलीत बदल घडवण्याचा प्रयत्न कराल. हे बदल भविष्यात खूप फायदेशीर ठरतील. कुटुंबात नवीन सदस्याच्या आगमनाची बातमी आनंद घेऊन येऊ शकते. वडिलांचा सल्ला अत्यंत उपयुक्त ठरेल. कामाच्या ठिकाणी महत्त्वाच्या चर्चेदरम्यान तुमच्या कल्पनांचे कौतुक होईल. नोकरीच्या ठिकाणी वरिष्ठदेखील तुमच्या सूचनांनी प्रभावित होतील.
कर्क – नवीन वाहन किंवा घरातील अत्यावश्यक वस्तू खरेदी करण्याचा विचार कराल. कर्ज घेण्याचा विचार करत असाल, तर तेही सहजपणे मंजूर होण्याची चिन्हे आहेत. शासकीय कामांमध्ये काही विलंब होऊ शकतो, परंतु संयम ठेवल्यास सर्व सुरळीत होईल. एखादा जुना आर्थिक व्यवहार समस्या निर्माण करू शकतो, ज्याचे वेळेवर निराकरण करणे आवश्यक असेल.
सिंह – व्यवसायातील मिळणाऱ्या चांगल्या परिणामांमुळे आनंद होईल. तुमच्या मेहनतीचे फळही दिसून येईल. शेअर बाजाराशी संबंधित असलेल्यांसाठीही दिवस सकारात्मक जाण्याची शक्यता आहे. अविवाहित जातकांचे विवाह ठरण्याची शक्यता आहे. घरातूनच एखादा नवीन, शुभ प्रकल्प सुरू करण्याची संधी मिळू शकते. तब्येतीची काळजी घ्या.
कन्या – दिवस संमिश्र स्वरूपाचा असेल, पण तुमची मेहनत आणि प्रामाणिकपणा सगळ्यांच्या नजरेत भरेल. वरिष्ठही तुमच्यावर खूश असतील. खर्चाबरोबरच बोलण्यावर नियंत्रण ठेवा, अन्यथा अगदी लहानसहान गोष्टींवरूनही वाद होऊ शकतो. व्यवसायात विरोधकांपासून सावध रहा, नव्या व्यवहारांबाबत गुप्तता बाळगा. आत्मविश्वासही टिकवून ठेवा.
तुळ – आर्थिक बाबतीत शहाणपणाने निर्णय घेणे महत्त्वाचे ठरेल. खर्च आणि उत्पन्न यांच्यात संतुलन राखल्यास भविष्य सुरक्षित होईल. व्यावसायिक योजनांमधून हळूहळू नफा मिळू लागेल. मात्र कामे पुढे ढकलण्याची सवय टाळा, कारण त्यामुळे नंतर समस्या निर्माण होऊ शकतात. कुटुंबातील रुसव्या फुगव्यांबाबत संयम बाळगा, पटकन प्रतिक्रिया देणे टाळा.
वृश्चिक – जोखीम असलेली गुंतवणूक करण्यापूर्वी जाणकारांचा सल्ला घ्या, अन्यथा पश्चाताप करावा लागू शकतो. विचारपूर्वक खर्च केल्यास भविष्य अधिक सुरक्षित होईल. आहाराकडे लक्ष देणे आवश्यक आहे, कारण तुमच्या आरोग्याचा तुमच्या मनःस्थितीवर परिणाम होत आहे. सुसंवादातून कौटुंबिक समस्या हळूहळू कमी होतील.
हेही वाचा – शर्वायने बोलावलेल्या समारंभात आराध्या पोहोचली अन्…
धनु – दिवस आनंद आणि समृद्धीचा आहे. हाती घेतलेल्या कोणत्याही कामात मिळणाऱ्या यशामुळे आत्मविश्वास वाढेल. सन्मान आणि पुरस्कार मिळण्याचीही शक्यता आहे. व्यवसायातील समस्या सुटतील आणि भविष्यातील योजनाही अधिक स्पष्ट होतील. मालमत्ता खरेदीचे स्वप्न पूर्णत्वास जाण्याची शक्यता आहे.
मकर – एखाद्या कामाबद्दल शंका असल्यास, ते सध्या पुढे ढकलणेच उत्तम. भविष्यात फायदेशीर ठरेल अशा एखाद्या नव्या प्रकल्पाची व्यावसायिक योजना आखू शकता. कोणत्याही वादांपासून दूर राहा. एखाद्या सामाजिक कार्यक्रमात सहभागी झाल्याने नवी ओळखी होतील, ज्याचा व्यवसायाला फायदा होईल. नोकरीच्या ठिकाणी तुमच्या कामाचे कौतुक होईल.
कुंभ – दिवस सामान्य असेल, पण काही किरकोळ आव्हाने येऊ शकतात. कामाच्या ठिकाणी एखादा सहकारी प्रतिकूल वातावरण निर्माण करण्याचा प्रयत्न करू शकतो, त्यामुळे सावध रहा. वाढत्या खर्चामुळे चिंता वाटू शकते, म्हणून अनावश्यक खर्च टाळा. स्वतःच्या आरोग्याकडे विशेष लक्ष देणे आवश्यक असेल.
मीन – सकारात्मक विचार कराल, त्यामुळे कामाचा ताण जाणवणार नाही. सामाजिक कार्यातही सक्रिय असाल. दीर्घकालीन व्यावसायिक योजनांना गती मिळेल. अडकलेला निधी परत मिळाल्याने दिलासा मिळेल. सरकारी नोकरी किंवा निविदा मिळण्याच्या शक्यतेमुळे उत्साह वाढू शकतो. कुटुंबातील एखादा सदस्य छानसे सरप्राइज देईल.
