दर्शन कुलकर्णी
- आज, दिनांक : 26 मे 2026; वार : मंगळवार
- भारतीय सौर : 05 ज्येष्ठ शके 1948; तिथि : एकादशी अहोरात्र; नक्षत्र : हस्त 29:56;
- योग : सिद्धि 27:09; करण : वणिज 17:42;
- सूर्य : वृषभ; चंद्र : कन्या; सूर्योदय : 06:01; सूर्यास्त : 19:09;
- पक्ष : शुक्ल; अयन : उत्तरायण; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
वेद कन्सल्टन्सी / 9987433660
दिनविशेष
जामखेड मॉडेलचे प्रणेते डॉक्टर रजनीकांत आरोळे
टीम अवांतर
जामखेड मॉडेलचे प्रणेते डॉक्टर रजनीकांत शंकरराव आरोळे यांचा जन्म राहुरी येथे 10 जुलै 1934 रोजी झाला. त्यांचे आई-वडील दोघेही शाळेत शिक्षक होते. अगदी लहानपणीच त्यांचे दोन मित्र योग्य औषधोपचार न मिळाल्याने दगावले आणि तिथेच आरोळे यांनी डॉक्टर बनण्याचा तसेच ग्रामीण भागात काम करण्याचा निर्णय घेतला.
कोलार येथील ईटीसीएम रुग्णालयात 1960मध्ये निवासी डॉक्टर म्हणून त्यांनी काम सुरू केले. 1962मध्ये ते अहमदनगरमधील वडाळा मिशन जिल्ह्यातील एफजेएफएम रुग्णालयात वैद्यकीय अधीक्षक म्हणून रुजू झाले. 1966 साली त्यांना फुलब्राइट शिष्यवृत्ती मिळाली. या काळात त्यांनी अमेरिकेतील ओहायो राज्यातील क्लीव्हलँड येथील लुथरन रुग्णालयात निवासी डॉक्टर म्हणून काम केले. 1970 मध्ये ते अहमदनगर (आताचे अहिल्यानगर) जिल्ह्याच्या जामखेड येथील व्यापक ग्रामीण आरोग्य प्रकल्पाचे संचालक म्हणून देखरेख करण्यासाठी भारतात परतले. ग्रामीण भागात खऱ्या अर्थाने आपल्या सेवेची गरज आहे, हे लक्षात घेऊन त्यांनी जामखेडला स्थायिक व्हायचे ठरवले.
हेही वाचा – …म्हणून मी मरणार नाही!
कुपोषण, बालमृत्यूंचे असणारे लक्षणीय प्रमाण, टीबी, दूषित पाण्यामुळे होणारे रोग अशा आरोग्य समस्यांनी ग्रस्त अशा जामखेडमध्ये त्यांनी स्वावलंबी ग्रामीण आरोग्य सेवा आणि आर्थिक उन्नतीची चळवळ उभी केली आणि ती यशस्वी करून दाखवली. या चळवळीच्या माध्यमातून त्यांनी हजारो गरीब रुग्णांवर मोफत वैद्यकीय उपचार केले. त्यांचा ‘आरोळे पॅटर्न’ देखील प्रचंड लोकप्रिय झाला होता. सामाजिक आरोग्य सेवेचे आयामच त्यांनी बदलून टाकले. या कामात त्यांच्या डॉक्टर पत्नी मेबल कमला इम्यॅन्युअल यांची भक्कम साथ मिळाली.
‘जामखेड मॉडेल’ वापरून सामुदायिक विकासाला ग्रामीण आरोग्यसेवेच्या व्यापक दृष्टिकोनाशी जोडण्याच्या त्यांच्या यशाची दखल अनेक आंतरराष्ट्रीय संस्थांनी घेतली आहे. आरोग्य क्षेत्रातील त्यांच्या उल्लेखनीय योगदानाबद्दल डॉ. अरोले यांना मदर तेरेसा पुरस्कार, भारत सरकारचा पद्मभूषण पुरस्कार तसेच आशिया विभागातील नोबेल म्हणून ओळखल्या जाणाऱ्या रॅमन मॅगसेसे पुरस्काराने सन्मानित करण्यात आले. 26 मे 2011 रोजी डॉक्टर आरोळे यांचे निधन झाले.
आजचे राशीभविष्य
मेष – एका मागोमाग एक येणाऱ्या कामांमुळे दिवस काहीसा तणावपूर्ण वाटेल. मात्र वेळेचे योग्य नियोजन केले, तर सर्व काही सुरळीतपणे पार पडेल. नोकरी किंवा करिअरबद्दल जवळच्या मित्राने दिलेला सल्ला तुमचा मार्ग मोकळा करू शकतो. कुटुंबात तुमच्या मतांना महत्त्व दिले जाईल. समाजात लोक तुमच्या बुद्धिमत्तेची प्रशंसा करतील.
वृषभ – नोकरी किंवा व्यवसायाच्या ठिकाणी वादात अडकणे महागात पडू शकते, त्यामुळे शांत राहणेच उत्तम. आत्मविश्वास हाच तुमचा आज सर्वात मोठा आधार बनणार आहे. अनावश्यक खर्च टाळून बचतीवर भर द्या. घरातील वातावरण पूर्वीपेक्षा अधिक शांत आणि आनंदी असेल. एखाद्याशी नातेसंबंध बिघडले असतील, तर आज त्यात पुन्हा गोडवा येईल.
मिथुन – नवीन घर, जमीन किंवा मालमत्तेच्या बाबतीत चांगली बातमी मिळू शकते. दीर्घकाळ प्रलंबित असलेला एखादा प्रकल्प अखेर पूर्ण होईल. मेहनत आणि समर्पण तुम्हाला वेगळी ओळख मिळवून देऊ शकते. सामाजिक क्षेत्रात काम करणाऱ्यांना महत्त्वपूर्ण जबाबदाऱ्या मिळू शकतात. तथापि, बोलण्यावर ताबा ठेवा, नकळतपणे कोणीतरी दुखावले जाऊ शकते.
कर्क – कोणाबद्दलही मत्सर किंवा नकारात्मक भावना मनात बाळगणे टाळा, कारण त्यामुळे मनःशांती भंग होईल. नोकरदारांवर नवीन जबाबदारी सोपविली जाऊ शकते, त्याला सहकाऱ्यांचे पूर्ण सहकार्य मिळेल. व्यवसायात कोणतेही वाद टाळणे शहाणपणाचे ठरेल. विद्यार्थ्यांसाठी दिवस आनंदाचा आहे, मेहनतीचे चांगले फळ मिळण्याची अपेक्षा आहे.
सिंह – आजचा दिवस तुम्हाला स्वतःला सिद्ध करण्याची संधी देणारा ठरेल. एखाद्या सहकाऱ्याच्या शब्दांनी तुम्हाला दुःख होऊ शकते, पण तुमचा आत्मविश्वास आणि कठोर परिश्रम सर्वांचे लक्ष वेधून घेतील. जोडीदाराचे यश किंवा पदोन्नती घरात आनंद आणू शकते. आर्थिक समस्यांमुळे थांबलेले काम आज पुढे सरकू शकते.
कन्या – सामाजिक कार्यक्रमातील तुमची उपस्थिती लोकांना प्रभावित करेल. गाडी चालवताना काळजी घ्या. कोणीही न मागितलेला सल्ला देणे टाळा, कारण यामुळे गैरसमज निर्माण होऊ शकतात. भावंडांसोबतचे नातेसंबंध अधिक दृढ होतील. घरात एखाद्या शुभ कार्याची तयारी सुरू होऊ शकते, ज्यामुळे उत्साहाचे वातावरण निर्माण होईल.
तुळ – आजचा दिवस अपेक्षेपेक्षा अधिक सकारात्मक ठरू शकतो. व्यवसायात पूर्वीपेक्षा चांगले परिणाम दिसतील आणि तुमचा आत्मविश्वास वाढेल. कामाच्या ठिकाणी इतरांवर अवलंबून राहण्याऐवजी स्वतःच्या क्षमतेवर विश्वास ठेवल्याने प्रगती साधता येईल. भूतकाळातील निर्णयांबद्दल थोडे दुःख वाटू शकते, पण तेच अनुभव आता तुमची ताकद बनतील.
वृश्चिक – भागीदारीतून एक मोठा व्यावसायिक करार फायदेशीर ठरू शकतो. नोकरीच्या ठिकाणी वरिष्ठ तुमच्या मेहनतीची दखल घेतील. तुमच्या काही निर्णयांमुळे संतती काहीशी अस्वस्थ होईल. म्हणून त्यांच्या भावना समजून घेण्याचा प्रयत्न करा. घराच्या सजावटीचे किंवा नूतनीकरणाचे काम सुरू होऊ शकते. ऑनलाइन खरेदी करताना सावधगिरी बाळगा.
हेही वाचा – पेरू खाणे म्हणजे सुखाची परिसीमा, पण…
धनु – प्रत्येक पावलावर नशीब तुमच्या सोबत असेल. अडचणीत असलेल्या कोणाला पैसे उधार दिले असतील, तर ते तुम्हाला परत मिळतील, अशी चिन्हे आहेत. जोडीदाराकडून मिळणारे एक गोड आश्चर्य तुम्हाला आनंद देईल. सभोवतालच्या लोकांचे हेतू समजून त्यानुसार भूमिका घ्या. हितचिंतक बनलेल्या एखाद्याकडून फसवणूक होऊ शकते.
मकर – कामातील शिस्त आणि कठोरता तुम्हाला वेळेंभीवर यश मिळवून देईल. वरिष्ठांचे बोलणे गांभीर्याने न घेणे हानिकारक ठरू शकते. वडिलोपार्जित मालमत्तेबाबत चर्चा किंवा मतभेद निर्माण होऊ शकतात. भूतकाळातील चुकांमधून शिकणे आज खूप उपयुक्त ठरेल. कुटुंबात नवीन सदस्याच्या आगमनाची आनंदाची बातमी वातावरण प्रफुल्लित करू शकते.
कुंभ – दिवस हास्य, मजा आणि जुन्या नात्यांच्या गोडव्याने भरलेला असेल. जुन्या मित्रासोबतची अचानक भेट सुखद आठवणी जागवेल. मात्र, संभाषणादरम्यान शब्द जपून वापरा. कुटुंबातील वडीलधाऱ्यांसोबत एका महत्त्वाच्या विषयावर चर्चा कराल, त्यातून एखाद्या समस्येवर तोडगा निघू शकेल. दीर्घकाळ प्रलंबित एखादे काम पूर्ण झाल्याने दिलासा मिळेल.
मीन – मालमत्ता खरेदी किंवा विक्री करण्याचा विचार करणाऱ्यांसाठी हा अनुकूल काळ आहे. शेअर बाजाराशी संबंधित असलेल्यांनी घाई टाळावी. विद्यार्थ्यांना मानसिक तणावातून दिलासा मिळेल आणि ते अभ्यासावर लक्ष केंद्रित करू शकतील. समाजकार्यातील योगदानाने तुमच्याबद्दलचा आदर वाढेल. एखादा सन्मान किंवा पुरस्कार मिळण्याची शक्यता आहे.
