दर्शन कुलकर्णी
- आज, दिनांक : 21 जून 2026; वार : रविवार
- भारतीय सौर : 31 ज्येष्ठ शके 1948; तिथि : सप्तमी 15:20 ; नक्षत्र : पूर्वा फाल्गुनी 09:30;
- योग : सिद्धी 11:20 ; करण : विष्टि 27:24;
- सूर्य : मिथुन; चंद्र : सिंह 15:39; सूर्योदय : 06:01; सूर्यास्त : 19:18;
- पक्ष : शुक्ल; अयन : उत्तरायण; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
भानू सप्तमी
आंतरराष्ट्रीय योग दिन
दक्षिणायन आरंभ
वेद कन्सल्टन्सी / 9987433660
दिनविशेष
रुबाबदार अभिनेता अरुण सरनाईक
टीम अवांतर
मराठी चित्रपटसृष्टीतील रुबाबदार अभिनेता म्हणून ओळखल्या जाणाऱ्या अभिनेता अरुण सरनाईक यांचा जन्म 4 ऑक्टोबर 1935 रोजी समृद्ध संगीत आणि कलात्मक वारसा असलेल्या कुटुंबात झाला. प्रख्यात संगीतकार शंकरराव सरनाईक हे त्यांचे वडील तर प्रसिद्ध शास्त्रीय गायक निवृत्तीबुवा सरनाईक त्यांचे काका होते. त्यामुळे अभिनेता म्हणून स्वतःची ओळख प्रस्थापित करण्यापूर्वी, अरुण सरनाईक यांनी संगीत वाद्ये, विशेषतः हार्मोनियम आणि तबला वाजवण्यात प्रावीण्य मिळवले होते. संगीतातील त्यांची खोलवर रुजलेली आवड आणि कौशल्य, कला आणि मनोरंजनाच्या व्यापक जगात प्रवेश करण्यास कारणीभूत ठरले.
मुंबईतील रामनारायण रुईया कॉलेजमधून पदवी शिक्षण पूर्ण झाल्यानंतर त्यांनी इचलकरंजी येथील अभियांत्रिकी कारखान्यात काही काळ काम केले. सरनाईक यांनी 1956 मध्ये मो. गा. रंगणेकर यांच्या ‘ भटाला दिली ओसरी’ या मराठी नाटकातून अभिनेता म्हणून अभिनय क्षेत्रात पदार्पण केले. पुढे 1961 साली अनंत माने दिग्दर्शित ‘शाहीर परशुराम’ या चित्रपटातून त्यांचे मराठी चित्रपटसृष्टीत पदार्पण झाले. ‘वरदक्षिणा’ आणि ‘विठू माझा लेकुरवाळा’ यांसारख्या काही चित्रपटांमध्येही ते दिसले. त्यांनी कृष्णधवल आणि रंगीत चित्रपटांच्या काळात अनेक मराठी चित्रपटांमध्ये मुख्य भूमिका साकारल्या.
हेही वाचा – आबा आणि मित्रमंडळींची पार्टी
1962 सालच्या रंगल्या रात्री अशा या चित्रपटात साकारलेल्या तबला वादकाच्या भूमिकेला तर 1964 सालच्या सवाल माझा ऐका चित्रपटातील जयवंता भूमिकेसाठी सर्वोत्कृष्ट अभिनेत्याचा महाराष्ट्र राज्य चित्रपट पुरस्कार मिळाला. रंगल्या रात्री अशा या चित्रपटातील तबलजीच्या भूमिकेसाठी त्यांना प्रसिद्ध तबलावादक उस्ताद अल्लारखां यांचे मार्गदर्शन लाभले होते. त्यांची ही भूमिका बघून शिवसेना प्रमुख बाळासाहेब ठाकरे देखील त्यांचे मोठे फॅन झाले. ‘मुंबईचा जावई ‘ या मराठी चित्रपटातील “प्रथम तुज पाहता” हे सरनाईक यांच्यावर चित्रित झालेले गाणे प्रचंड लोकप्रिय झाले. 1970 साली देखील त्यांना महाराष्ट्र राज्य चित्रपट पुरस्काराने सन्मानित करण्यात आले होते. 1983 साली ‘वक्त से पहले’ या हिंदी चित्रपटात देखील त्यांनी भूमिका केली होती.
डॉ. जब्बार पटेल दिग्दर्शित सिंहासन चित्रपटात सरनाईक यांनी साकारलेली मुख्यमंत्र्यांची भूमिका अविस्मरणीय ठरली. अभिनयासोबतच पार्श्वगायक म्हणून देखील ते ओळखले जाऊ लागले. संगीतकार राम कदम यांनी ‘डोंगरची मैना’ आणि ‘गण गवळण’ या दोन चित्रपटांमध्ये सरनाईक यांना गाण्याची संधी दिली. वसंत पवार यांच्याकडे मानाचा मुजरा या चित्रपटातील एक सोलो गीत त्यांनी गायले. पुढे सी. रामचंद्र यांनी ‘घरकुल’ चित्रपटासाठी ‘पप्पा सांगा कुणाचे’ हे अजरामर गीत गाऊन घेतले. त्यानंतर ‘चंदनाची चोळी अंग अंग जाळी’ या चित्रपटातील एक लाजरा न साजरा मुखडा’ या त्यांनी गायलेल्या गाण्याला देखील रसिकांची मोठी दाद मिळाली.
हेही वाचा – आम्लपित्तासाठी आहार मार्गदर्शन
मराठी चित्रपटांबरोबरच अपराध मीच केला, गोष्ट जन्मांतरीची, अलविदा डॉक्टर, लवंगी मिरची कोल्हापुराची, तरुण तुर्क म्हातारे अर्क सारख्या मराठी नाटकांमधूनही ते रंगमंचावर कार्यरत होते. याशिवाय आनंदग्राम या स्वयंसेवी संस्थेशी त्यांचा जवळून संबंध होता. रिकाम्या वेळेत ते तिथे भेट देऊन तिथल्या गरजू लोकांची सेवा करण्यात आपला वेळ व्यतीत करायचे. 21 जून 1984 रोजी चित्रपटाच्या शूटींगहून परत जाताना झालेल्या अपघातात त्यांचे अकाली निधन झाले.
अभिनेता अरुण सरनाईक यांचा जीवनप्रवास सर्वांसमोर यावा, नव्या पिढीला समजावा, या उद्देशाने त्यांची कन्या डॉ. सविता सरनाईक-नाईकनवरे यांनी मागील वर्षी ‘पप्पा सांगा कुणाचे’ या माहितीपटाची निर्मिती केली.
