Recipe : स्वादिष्ट खवा जिलबी अर्थात मावा जिलबी अन् ब्रोकोली- मटार पुलाव!

नीलिमा खडतकर

ही आहे विदर्भ स्पेशल खवा जिलबी किंवा मावा जिलबी. विदर्भामध्ये, विशेष करून अमरावतीला बुऱ्हाणपूर मावा जिलबी खूप प्रसिद्ध आहे. नेहमीच्या जिलबीपेक्षा वेगळी.. थोडी काळपट असलेली ही जिलबी अतिशय रसरशीत आणि चविष्ट असते. तर, या मावा जिलबीची रेसिपी आपण बघूया

साहित्य

• खवा – 1 कप
• साखर – दीड कप
• दूध – अर्धा कप
• मैदा – अर्धा कप
• तेल किंवा तूप – तळणासाठी
• बेकिंग सोडा – चिमूटभर
• वेलचीपूड – 1 टीस्पून
• थोडे पिस्ता – बदामाचे काप – सजावटीसाठी

कृती

1. प्रथम मैद्यात थोडे थोडे पाणी (पाव कप) घालून घट्टसर पेस्ट करून फेटून घ्या. गुठळ्या होणार नाही, याची काळजी घ्या.
2. नंतर खवा, दूध आणि मैद्याची पेस्ट एकत्र करून मिक्सरमध्ये घट्टसर पेस्ट करुन घ्या.
3. तयार मिश्रणात चिमूटभर बेकिंग सोडा घालून छान फेटून घ्या आणि थोडावेळ मिश्रण बाजूला ठेवा.
4. आता पाक करून घ्या. साखर बुडेल एवढं पाणी घालून साखरेचा एकतारी पाक करून घ्या. पाकात वेलचीपूड घाला.
5. एका पसरट कढईत तेल किंवा तूप गरम करून त्यात जिलब्या घाला (दुधाच्या पिशवीचा कोपरा कट करून त्यात जिलबीचे मिश्रण घालून जिलबी बनवू शकतो किंवा बाजारात जिलबी बनवण्यासाठी प्लास्टिकची बटली मिळते.)
6. जिलब्या मध्यम आचेवर लालसर तळून घ्याव्या. तयार जिलब्या गरम पाकात टाकून, थोड्यावेळ पाकात बूडवून, नंतर काढून घ्या. वरून पिस्ता- बदामाचे काप घालून सजवा.

हेही वाचा – Recipe : कलिंगडाच्या सालीचे मऊ लुसलुशीत डोसे अन् रताळाच्या घाऱ्या

ब्रोकोली- मटार पुलाव

साहित्य

• बासमती तांदूळ – 1 कप
• ब्रोकोली – पाव किलो
• पालक – अर्धी जुडी
• मटार – पाव किलो
• तमालपत्र – 1
• जिरे – 1 टीस्पून
• वेलची – 1 मोठी
• हिरवी वेलची – 2
• मिरी दाणे – 6-7
• लवंगा – 2-3
• दालचिनी – 1  छोटा तुकडा
• चिरलेली कोथिंबिर – पाव कप
• तेल किंवा साजूक तूप – 1-2 टेबलस्पून
• काजू – 5-6
• हिरव्या मिरच्या – 2
• मीठ – चवीनुसार
• हिंग – 1 लहान चमचा
• व्हेज पुलाव मसाला – 1 टेबलस्पून

हेही वाचा –  Recipe : कच्च्या केळ्यांचे खुसखुशीत मिनी समोसे

कृती

1. प्रथम पालक स्वच्छ धुऊन, ब्लान्च करून त्याची प्यूरी करून घ्या.
2. ब्रोकोली मोठी मोठी (फुले) कापून तेलावर परतून घ्या.
3. बासमती तांदूळ स्वच्छ धुऊन 20 मिनिटे भिजत ठेवा. खडे मसाले प्लेटमध्ये काढून ठेवा. काजू तळून बाजूला ठेवा.
4. तेल किंवा साजूक तूप गरम करून त्यात खडे मसाले आणि उभ्या चिरलेल्या हिरव्या मिरच्या टाकून परता आणि हिंग घाला.
5. त्यानंतर मटार, परतलेली ब्रोकोली, थोडी कोथिंबीर घाला.
6. मग त्यात भिजवलेला बासमती तांदूळ, पालक प्यूरी, पुलाव मसाला, मीठ, गरम पाणी मिक्स करून परता.
7. पाणी थोड आटत आल्यावर झाकण ठेवून पुलाव शिजवा.
8. पुलाव तयार झाल्यावर वरून कोथींबीर, तळलेले काजू घाला.
9. गरम पुलाव टोमॅटो-कांदा कोशिंबीरसोबत सर्व्ह करा.
   

   ---

   तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.

   avaantar.recipe@gmail.com

   या ईमेलवर किंवा

   9869975883 या व्हॉट्सॲप क्रमांकावर

   तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.