साप्ताहिक राशीभविष्य : 23 ते 29 ऑगस्ट 2026

मेष

• हा आठवडा मेष राशीसाठी उत्तम आहे. नोकरदारांच्या बाबतीत जागेत बदल संभवतो. नव्या कामाच्या ठिकाणी रुळायला थोडा वेळ लागू शकतो. वाहन खरेदीचा योग आहे. जागेची खरेदी-विक्री करताना व्यावसायिक वर्गाने कागदपत्रे तपासून घ्यावीत. नवीन योजना सफल होतील. व्यवसायासंदर्भातील कामे पटापट होतील. महिलांना परदेशी जाण्याची संधी मिळू शकते. विद्यार्थ्यांनी मोबाइलच्या मोहजालापासून लांब राहावे.

वृषभ

• हा आठवडा सामान्य स्वरूपाचा आहे. नोकरदारांना कामाच्या ठिकाणी थोडा त्रास संभवतो. कामाचा ताण जाणवेल. नवीन जबाबदारीही मिळू शकते. शनी लाभस्थानी असल्यामुळे पूर्वी केलेल्या कामाचा मोबदला मिळू शकतो. व्यावसायिक वर्गाचे कामानिमित्त छोटे-मोठे प्रवास होतील. घरची जबाबदारी तसेच व्यवसाय यांच्यात संतुलन राखताना कसरत करावी लागू शकते. महिलांना माहेरी जाण्याचा योग आहे, भावंडांकडून सहकार्य मिळू शकते. विद्यार्थ्यांनी एकाग्रता वाढवून अभ्यास करावा, मेहनत घ्यावी लागेल.

मिथुन

• या आठवड्यात ग्रहांची उत्तम साथ मिळेल. नोकरदारांनी वायफळ गप्पा टाळाव्यात. मोजकेच, पण विषयाला धरून बोललात, तर कामे पटापट होतील. व्यावसायिक वर्गासाठी शनी कर्मस्थानी असल्यामुळे केलेल्या कामाचे फळ मिळून फायदा होईल. प्रवास निष्फळ होण्याची शक्यता आहे, म्हणून लांबचा प्रवास टाळा. महिलांना नवीन गोष्टी शिकता येतील. स्वास्थ्यासाठी सात्विक आहार घ्या. विद्यार्थ्यांना आपल्या संस्कृतीबद्दल माहिती मिळेल.

कर्क

• या आठवड्यात आयुष्यात परिवर्तन होईल. नोकरदारांनी नशिबावर अवलंबून राहू नये. मेहनत आणि आत्मविश्वास आवश्यक आहे. धोक्याच्या ठिकाणी गुंतवणूक करू नका, अन्यथा पैसे अडकण्याची शक्यता आहे. राहू अष्टमात असल्यामुळे व्यावसायिक वर्गाने कोर्ट-कचेरी आणि वडिलोपार्जित जमिनीचे प्रश्न सामोपचाराने सोडवावेत. महिलांच्या दृष्टीने घरात आनंदी वातावरण असेल, मुलांच्या आवडी जपा. क्रीडा आणि कला क्षेत्रातील विद्यार्थ्यांना चांगल्या संधी मिळू शकतात.

सिंह

• हा आठवडा आव्हानात्मक असेल. नोकरदारांसाठी रवी स्वतःच्या राशीत असून केतूबरोबर आहे. तब्येतीची काळजी घ्या. मानसिक चिंता राहू शकते. फाजील आत्मविश्वास नको. महत्त्वाचे निर्णय या आठवड्यात घेऊ नका. व्यावसायिक वर्गाला भविष्याची चिंता राहील. प्रॉपर्टीचे वाद वेळेत मिटवा. जुनी दुखणी त्रास देऊ शकतात; वेळीच उपाय करा. मोठे निर्णय घेताना महिलांनी घरच्यांना विश्वासात घ्यावे. विद्यार्थ्यांनी प्रवास करताना ट्रेकिंग किंवा लांबचा प्रवास करू नये.

हेही वाचा – I Love You अन् अव्यक्त भावना…

कन्या

• हा आठवडा संमिश्र स्वरूपाचा असेल. नोकरदारांना पूर्वी केलेल्या कामाचा मोबदला मिळू शकतो. कामाचे नियोजन योग्य पद्धतीने करा, वेळ वाया घालवू नका. व्यावसायिक वर्गाला योग्य वेळी, योग्य व्यक्तीची साथ मिळेल. यालाच भाग्य म्हणतात. इच्छापूर्ती होईल. व्यापार उत्तम सुरू राहील. महिलांचा धार्मिक कार्यात वेळ जाईल. तथापि, आजार अंगावर काढू नका. विद्यार्थ्यांनी मित्रांबरोबरचे वाद विकोपाला जाऊ देऊ नयेत.

तुळ

• हा आठवडा व्यावसायिक उन्नतीचा आहे. नोकरदारांनी मित्रांना पैसे उधार देऊ नयेत, तसेच गॅरेंटर किंवा जामीन राहू नका. काही कामे मोबदला न घेता करावी लागतील. व्यावसायिक वर्गाच्या बाबतीत जागेत बदल संभवतो. वास्तू आणि वाहन खरेदी-विक्रीचा योग आहे. शक्यतो नवीन कर्ज घेऊ नका. महिलांना नोकरीत बढतीचे योग आहेत. विद्यार्थ्यांना नोकरी मिळण्याची शक्यता आहे.

वृश्चिक

• हा आठवडा खूप धावपळीचा असेल. नोकरदारांना कामाच्या ठिकाणी सहकारी आणि वरिष्ठांना सांभाळून घ्यावे लागू शकते. काही कामे मनाविरुद्ध करावी लागतील. व्यावसायिक वर्गासाठी शेअर मार्केटमधील दीर्घकालीन गुंतवणूक फायदेशीर राहील. नशिबाची साथ मिळेल. महिलांनी एकटीने प्रवास टाळावा, नको ते धाडस करू नये. प्रेमप्रकरणात विद्यार्थ्यांचा भ्रमनिरास होऊ शकतो. त्यामुळे अभ्यासात लक्ष केंद्रित करणे इष्ट.

धनु

• या आठवड्यात काही गोष्टी अचानक घडतील. नोकरदारांना कामानिमित्त छोटे प्रवास करावे लागतील. वरिष्ठ खूश राहतील. वास्तूचे नूतनीकरण करू शकाल. व्यावायिक वर्गाला टक्केवारीच्या व्यापारात फायदा होण्याची शक्यता आहे. आई-वडिलांच्या तब्येतीची काळजी राहील. महिलांचे भावंडांशी वैचारिक मतभेद होण्याची शक्यता आहे. विद्यार्थ्यांनी मित्रांच्या वादावादीत पडू नये. तसेच, आपले वाहन कोणालाही देऊ नका.

मकर

• या आठवड्यात आयुष्यात परिवर्तन होण्याची शक्यता आहे. नोकरदारांच्या दृष्टीने कामाच्या ठिकाणी सुलभता असेल. व्यक्तिमत्त्व सकारात्मक राहील. संततीबाबत चिंता राहील. व्यावसायिक वर्गाने आर्थिक व्यवहार जपून करावेत. दूरचे प्रवास करू नका. भागीदारीच्या व्यवसायात उत्तम यश मिळू शकते. महिलांनी मौन राखणे इष्ट, सोबतच प्राणायाम करावा. त्यामुळे मनातील चिंता आणि भय दूर होतील. विद्यार्थ्यांनी पाण्यापासून लांब राहावे, अनोळखी ठिकाणी पोहण्यासाठी जाऊ नका.

कुंभ

• या आठवड्यात नातेसंबंधांमध्ये आपले खरे कोण, याची जाणीव होईल. नोकरदारांना नवीन जबाबदारी मिळेल. वरिष्ठ खूश राहतील. आर्थिक नियोजन करून मग गुंतवणूक करा. व्यावसायिक वर्गाला व्यवसायासाठी नवीन कर्ज हवे असल्यास ते मंजूर होईल. त्यामुळे पुढील कामांना वेग येईल. वाहन किंवा नवीन जागेसाठी खर्च होईल. महिलांच्या बाबतीत कुटुंबात मतमतांतरे होण्याची शक्यता आहे. विद्यार्थ्यांनी वायफळ गप्पा टाळाव्यात, कृती करावी. मेहनत घेतल्यास यशस्वी होऊ शकाल.

हेही वाचा – ज्योतिषशास्त्र… अष्टम भाव आणि तर्क

मीन

• हा आठवडा संयम ठेवण्याचा आहे. नोकरदारांनी आजचे काम उद्यावर टाकू नये. हाताखालील सहकाऱ्यांकडून योग्य प्रकारे कामे करून घ्या, त्यांच्या कामावर स्वतः जातीने लक्ष ठेवा. व्यावसायिक वर्गाने आळस सोडून कामाला लागावे. कामानिमित्त परदेश प्रवास होईल. जपून पैसे वापरा, अनावश्यक खर्च टाळा. गुंतवणूक तज्ज्ञांच्या सल्ल्याने गुंतवणूक करा. महिलांनी अपशब्द वापरू नयेत, उलट क्षमाशीलता दाखवावी. विद्यार्थ्यांना अभ्यासात यश मिळू शकते, त्यासाठी प्रामाणिक प्रयत्न करा.

prajaktakathe3970@gmail.com