रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. बोर्नव्हिटाला पर्यायी पौष्टिक पेय, भाताची पेज अन् नाचणीच्या भाकरीसाठी या टिप्स वापरून पाहा.
- वालडाळ, मूगडाळ किंवा मुळ्याचा पाला धुतल्यावर स्वयंपाकघरातील बेसिनमध्ये विशिष्ट प्रकारचा वास येत राहतो. त्यासाठी वालडाळ, मूगडाळ किंवा मुळ्याचा पाला धुतलेले पाणी जर कुंडीतील झाडांना घातले, तर बेसिनमध्ये वासही येणार नाही व झाडांना वेगळे खत घालायला लागणार नाही. शिवाय, पाण्याची बचतही होईल. रोजचे डाळ, तांदूळ, भाज्या धुतलेले पाणी झाडांना घातल्याने झाडे छान वाढतात.
- नाचणीचे महत्त्व आपल्या रोजच्या आहारात किती आहे, हे सांगायला नकोच. पण बऱ्याच जणांना नाचणीची भाकरी कडक किंवा वातड होते म्हणून आवडत नाही. त्यासाठी एक उपाय करता येईल. कोणतीही (ज्वारी, बाजरी) भाकरी करताना भाकरी थापण्यासाठी वरून नाचणीचे पीठ घ्यावे. नाचणीचे पीठ किंचित जाडसर असते. त्यामुळे भाकरी छान थापली जाते. प्रत्येक भाकरीमागे दोन-तीन चमचे नाचणीचे पीठ पोटात जाते. त्याचबरोबर मिश्र धान्यांची भाकरी अधिक आरोग्यपूर्ण होते. नाचणीचा वेगळा पदार्थ केल्याविना नाचणी विनासायास खाल्ली जाते.
हेही वाचा – Kitchen Tips : दालफ्राय, व्हेज पुलाव, मेथीच्या दाण्याची आमटी करताना…
- दोन वाट्या उत्तम प्रतीचे गहू आणून स्वच्छ धुवावे. नंतर दुसऱ्या पाण्यात भिजवून मोड आणावेत. हे गहू वाळवावेत. नंतर तेल-तूप न टाकता तांबूस रंगावर भाजावेत आणि त्याचे बारीक पीठ करावे. किंचित कच्च्या केळ्यांचे (एक वाटीभर) पातळ काप करून उन्हात चांगले वाळवावेत आणि त्यांचेही पीठ करावे. दोन्ही पिठे एकत्र करावीत. एक कप कोमट दुधात एक चमचा ही पावडर आणि गोडापुरता गूळ टाकावा (साखर नको). बोर्नव्हिटाऐवजी हे पीठ वापरावे. वाढीच्या वयातील मुलांसाठी उत्तम पौष्टिक पेय आहे आणि स्वस्तही पडते. भुकेच्या वेळी ब्रेड, बिस्किट, चिवड्यापेक्षा दिवसातून दोन-तीन वेळा हेच पेय द्यावे.
हेही वाचा – Kitchen Tips : बिटाचे कटलेट आणि परोठे, भरली वांगी करताना…
- काही लोकांना भाताची पेज काढून भात खायची आवड असते, त्यामुळे भातातील पौष्टिकपणा कमी होतो. पेज काढून फेकून न देता काढलेली पेज भाकरीचे किंवा चपातीचे पीठ मळताना त्याचा उपयोग करावा, म्हणजे भाकरी आणि चपाती हलक्या, खुसखुशीत, चवदार होतात.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
