दर्शन कुलकर्णी
- आज, दिनांक : 27 ऑक्टोबर 2026; वार : मंगळवार
- भारतीय सौर : 05 कार्तिक शके 1948; तिथि : प्रतिपदा 07:01, व्दितीया 28:06; नक्षत्र : भरणी 15:39;
- योग : सिद्धी 10:52; करण : तैतिल 17:35;
- सूर्य : तुळ; चंद्र : मेष 21:06; सूर्योदय : 06:35; सूर्यास्त : 18:09;
- पक्ष : कृष्ण; अयन : दक्षिणायन; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
वेद कन्सल्टन्सी / 9987433660
दिनविशेष
उद्योगपती अरविंद मफतलाल
टीम अवांतर
उद्योगपती अरविंद मफतलाल यांचा जन्म 27 ऑक्टोबर 1923 रोजी भारतातील गुजरात राज्यातील अहमदाबाद येथे झाला. मुंबईतील सेंट झेवियर्स हायस्कूल आणि सिडनहॅम कॉलेजमध्ये त्यांचे शिक्षण झाले. त्यांचे उद्योजक आजोबा मफतलाल गगलभाई यांनी 1905 मध्ये स्थापन केलेल्या उद्योगाचा वारसा अरविंद मफतलाल यांनी पुढे चालवला.
अरविंदजी यांनी 1955 मध्ये मफतलाल ग्रुप ऑफ कंपनीजची सूत्रे हाती घेतली. त्यांच्या धाडसी तसेच नाविन्यपूर्ण कल्पना, चिकाटी आणि उत्कृष्ट रणनीतीच्या जोरावर कंपनीच्या प्रगतीची घोडदौड सुरू झाली.
1963 ते 1968 या काळात, त्यांनी इंग्लंडच्या रॉयल डच शेल कंपनीसोबत भागीदारीत NOCIL आणि जर्मनीच्या होएस्ट एजीसोबत भागीदारीत पॉलिओलेफिन्स इंडस्ट्रीज लिमिटेड दोन अग्रगण्य संयुक्त उपक्रम कंपन्यांच्या माध्यमातून भारताचा पहिला एकात्मिक पेट्रोकेमिकल कॉम्प्लेक्स उभारला.
हेही वाचा – वैदिक ज्योतिषशास्त्र : 100 महत्त्वपूर्ण सिद्धांत – पूर्वजांचे आशीर्वाद, गुंतवणूक
याच दरम्यान, स्टँडर्ड अल्कलीज लिमिटेड आणि नवीन फ्लोरीन इंडस्ट्रीज या दोन अग्रगण्य रासायनिक उद्योगांचीही स्थापना त्यांनी केली. पुढील काळात, त्यांनी समूहाच्या वस्त्रोद्योग व्यवसायाला यशाच्या नव्या उंचीवर नेले.
अरविंद मफतलाल यांनी नंतरच्या काळात आदिवासी आणि ग्रामीण भागांमध्ये अत्यावश्यक आरोग्य सेवा पुरवण्यावर लक्ष केंद्रित केले. याशिवाय नैसर्गिक आपत्तींच्या काळात मदत आणि पुनर्वसन कार्यात अथकपणे योगदान दिले. 1972 च्या भीषण दुष्काळात त्यांच्या ‘सुखडी कार्यक्रमा’ मुळे उपासमारीने ग्रस्त लोकांची भूक शमविली होती. महाराष्ट्र आणि गुजरातच्या दुर्गम भागांतील लाखो लोकांचे प्राण वाचवले होते.
साठच्या दशकाच्या उत्तरार्धापासून त्यांनी आपली गतिशीलता आणि दूरदृष्टी, भारतीय कृषी उद्योग प्रतिष्ठानच्या कामामध्ये आणली. स्वतंत्र भारतातील महात्मा गांधींच्या ग्रामराज्याच्या संकल्पनेने प्रेरित होऊन, त्यांनी मणिभाई यांच्यासोबत मिळून सामुदायिक विकास आणि मदतकार्य, शाश्वत ग्रामीण विकास आणि अन्न सुरक्षा या क्षेत्रांमध्ये अनुकरणीय प्रकल्प राबविण्यात मदत केली.
पुढे मफतलाल यांनी स्टेट बँक ऑफ इंडियचे संचालक, इंडस्ट्रियल डेव्हलपमेंट बँक ऑफ इंडियाचे संचालक यांसारख्या प्रतिष्ठित वित्तीय संस्थांमध्ये विविध महत्त्वाची पदे भूषवली. त्यांना दुर्गा प्रसाद खैतान मेमोरियल सुवर्णपदक, मद्रास मॅनेजमेंट असोसिएशनचा बिझनेस लीडरशिप पुरस्कार, इंडियन मर्चंट्स चेंबर पुरस्कार, एक्सएलआरआय, जमशेदपूरचे औद्योगिक शांततेसाठीचे सर जहांगीर गांधी सुवर्णपदक, महाराष्ट्र आर्थिक विकास परिषदेचा सन्मान, दृष्टीसंबंधित कार्यांसाठी इंटरनॅशनल असोसिएशन ऑफ लायन्स क्लब्स (यूएसए) द्वारे दिला जाणारा लायन्स ह्युमॅनिटेरियन पुरस्कार, आणि रोटरी क्लब ऑफ बॉम्बेचा ‘सिटिझन ऑफ बॉम्बे ‘ पुरस्कार यांसारखे असंख्य पुरस्कार त्यांना मिळाले. 30 ऑक्टोबर 2011 रोजी त्यांचे निधन झाले.
आजचे राशिभविष्य
मेष – आज काहीतरी नवीन आणि मोठं काम करण्याची इच्छा जागृत होईल. याशिवाय प्रलंबित कामे पूर्ण करण्याची संधी देखील मिळेल. संततीच्या संगतीकडे विशेष लक्ष द्या. तुमचे योग्य मार्गदर्शन त्यांच्या आयुष्याला एक चांगली दिशा देऊ शकेल. तुमचा आत्मविश्वास पुढे जाण्यासाठी प्रेरित करेल. विद्यार्थ्यांना मानसिक तणावातून दिलासा मिळेल आणि अभ्यासातील त्यांची एकाग्रता वाढू शकते.
वृषभ – नशीबाची आज मोठी साथ मिळेल. अनपेक्षित आनंदाची एखादी बातमी तुमच्या चेहऱ्यावर हास्य आणू शकते. महत्त्वाच्या निर्णयांमध्ये मात्र गांभीर्य राखणे तितकेच महत्त्वाचे असेल. कुटुंबासोबत प्रवास करण्याची संधी मिळू शकते, ज्यामुळे तुमचे नाते अधिक घट्ट होईल. जोडीदाराला दिलेले एखादे छोटेसे सरप्राईज त्यांचा आनंद वाढवू शकते. या सगळ्यात आपल्या बजेटचाही विचार करणे आवश्यक ठरेल.
मिथुन – आज घेतलेला योग्य निर्णय भविष्यासाठी निर्णायक ठरू शकते. व्यावसायिकांना एखादी प्रभावशाली व्यक्ती भेटू शकते, ज्यामुळे प्रगतीसाठी नवीन संधी उपलब्ध होतील. आर्थिक बाबींमध्ये अविचारीपणा टाळा. घाईघाईत केलेल्या गुंतवणुकीमुळे पैशांचे नुकसान होऊ शकते, म्हणून कोणताही आर्थिक निर्णय घेण्यापूर्वी काळजीपूर्वक विचार करा. तुमची मेहनत आणि समर्पण तुम्हाला पुढे घेऊन जाईल, त्यामुळे परिस्थिती कोणतीही असो, प्रयत्नांमध्ये कमी पडू नका.
कर्क – तुम्हाला आज अशा संधी मिळू शकतात, ज्यामुळे कामात यश मिळवण्याचा मार्ग मोकळा होईल. प्रलंबित व्यावसायिक करार पूर्ण होण्याची शक्यता आहे, ज्यामुळे तुमचा आत्मविश्वास वाढेल आणि तुमच्या भविष्यातील योजनांना गती मिळेल. सर्जनशील काम आणि डिझाइन क्षेत्रात काम करणाऱ्यांना आज एखादी चांगली संधी मिळू शकते. स्वतःचा व्यवसाय पुढे नेण्याचे तुमचे प्रयत्नही यशस्वी होताना दिसत आहेत.
सिंह – कामाच्या ठिकाणी आज तुमची प्रतिष्ठा वाढू शकते आणि तुमच्या मेहनतीचे कौतुक केले जाईल. करिअरच्या कारणास्तव संततीला स्थलांतर करावे लागू शकते, त्यामुळे त्यांच्या भविष्यातील योजनांवर चर्चा करा. विद्यार्थ्यांना अभ्यासात काही आव्हानांचा सामना करावा लागू शकतो, परंतु कठोर परिश्रम, सातत्य आणि संयमाने ते चांगले यश मिळवू शकतात. जुना आर्थिक व्यवहार निकाली निघण्याची शक्यता आहे, ज्यामुळे दिलासा मिळेल. स्वतःचा आत्मविश्वास टिकवून ठेवा आणि प्रत्येक जबाबदारी पूर्ण समर्पणाने पार पाडा.
कन्या – आज कामाचा ताण वाढेल. मात्र योग्य नियोजनाने पुढे गेल्यास सकारात्मक फळ मिळू शकते. छोट्या-छोट्या गोष्टींमध्ये अडकून न पडता, मोठ्या ध्येयांवर लक्ष केंद्रित करा. यामुळे वेळ आणि ऊर्जा या दोन्हीची बचत होईल. स्वतःच्या आरोग्याकडे दुर्लक्ष करणे टाळा आणि संतुलित दिनचर्या राखा. विद्यार्थ्यांना मानसिक तणावातून दिलासा मिळेल आणि त्यांना अभ्यासावर अधिक चांगल्या प्रकारे लक्ष केंद्रित करता येईल.
तुळ – दिवसाची सुरुवात थोडी संथ होऊ शकते, मात्र नंतर घटना जरा जास्तच वेगात घडतील. कुटुंबात सुरू असलेले वाद परस्पर सामंजस्याने सोडवता येतील. आज तुमचे शब्द महत्त्वाची भूमिका बजावतील, त्यामुळे विचारपूर्वक वागा. योग्य शब्दांमुळे नातेसंबंध सुधारू शकतात आणि गैरसमज दूर होण्यास मदत होते. जोडीदारासोबत बाहेर फिरायला किंवा छोट्या सहलीचे नियोजन करू शकता, ज्यामुळे तुम्हा दोघांनाही एकत्रितपणे चांगला वेळ घालवण्याची संधी मिळेल.
वृश्चिक – आजच्या दिवसात घडणाऱ्या काही अप्रिय घटनांना संयमाने आणि धैर्याने सामोरे जावे लागेल. क्षुल्लक गोष्टींवरून रागावणे टाळा. शांतपणे घेतलेला निर्णय अधिक फायदेशीर ठरेल. प्रवासातून तुम्हाला भविष्यात उपयोगी पडणारी महत्त्वाची माहिती मिळू शकते. तुमच्या पालकांचे आशीर्वाद आणि पाठिंबा यामुळे रखडलेली कामे पुढे जातील. आर्थिक किंवा कौटुंबिक बाबींमध्ये घाई करण्याऐवजी सर्व पैलूंचा विचार करा. आज भावनेच्या आहारी न जाता विवेकबुद्धीने वागणे शहाणपणाचे ठरेल.
हेही वाचा –सदू आणि त्याची दु:ख
धनु – काहीतरी नवीन शिकण्याची आणि स्वतःच्या आयुष्यात एक महत्त्वपूर्ण बदल घडवण्याची तुम्हाला आज प्रेरणा मिळेल. शकते. तुमची कौशल्ये सुधारण्याची आणि कामाच्या ठिकाणी प्रगती करण्याची संधी मिळू शकते. विद्यार्थ्यांनी आपल्या अभ्यासात नियमितता आणि शिस्त राखणे आवश्यक आहे. जर तुम्ही बऱ्याच आधीपासून कोणाला पैसे दिले असतील तर ते आज परत मिळण्याची शक्यता आहे. कायदेशीर प्रकरणातही दिलासा मिळण्याची चिन्हे आहेत.
मकर – आर्थिक बाबींमध्ये आज सावधगिरीने आणि पद्धतशीरपणे पुढे जाणे अत्यंत महत्त्वाचे आहे. खर्चावर नियंत्रण ठेवा आणि कोणताही मोठा निर्णय घाईने घेणे टाळा. एखादे प्रलंबित काम पूर्ण होण्याची शक्यता आहे. काही लोक तुमच्या कामात अडथळा आणण्याचा प्रयत्न करू शकतात, म्हणून तुमच्या योजना सर्वांना सांगणे टाळा. परिस्थितीबद्दल जास्त काळजी करण्याऐवजी, एका वेळी एकच पाऊल टाका आणि आपले प्रयत्न सुरू ठेवा.
कुंभ – आज तुम्हाला काही नवीन आणि सर्जनशील कल्पना सुचू शकतात, ज्यामुळे भविष्यात चांगले यश मिळेल. नोकरी असो वा व्यवसाय, तुमच्या वेगळ्या विचारसरणीमुळे तुम्हाला विशेष ओळख मिळू शकते. कामाच्या ठिकाणी स्वतःच्या कल्पना योग्य प्रकारे मांडा, त्यामुळे तुमच्या सूचनांचे कौतुक होऊ शकते. पदोन्नती किंवा नवीन जबाबदाऱ्यांबाबतही सकारात्मक चर्चा होण्याची शक्यता आहे. तथापि, आरोग्याच्या कोणत्याही किरकोळ समस्यांकडे दुर्लक्ष करू नका.
मीन – जे नोकरीच्या शोधात आहेत त्यांना आज चांगली संधी मिळण्याची शक्यता आहे, ज्यामुळे भविष्यातील काही योजना लवकर पूर्ण होतील. बऱ्याच काळापासून रखडलेल्या प्रकल्पांमध्येही हळूहळू प्रगती होऊ शकते. कामाच्या ठिकाणी इतरांशी समन्वय साधून काम केल्यास सांघिक प्रयत्नांतून मोठी ध्येये साध्य करण्यास मदत होईल. मात्र स्वतःच्या कामाबद्दल आणि योजनांबद्दल सावधगिरी बाळगा. वैयक्तिक नातेसंबंध आणि व्यावसायिक जबाबदाऱ्या यांच्यात संतुलन राखणे देखील महत्त्वाचे असेल.
