दर्शन कुलकर्णी
- आज, दिनांक : 15 ऑक्टोबर 2026; वार : गुरुवार
- भारतीय सौर : 23 आश्विन शके 1948; तिथि : पंचमी 27:24; नक्षत्र : ज्येष्ठा अहोरात्र;
- योग : सौभाग्य 21:14; करण : बव 14:15;
- सूर्य : कन्या; चंद्र : वृश्चिक; सूर्योदय : 06:31; सूर्यास्त : 18:17;
- पक्ष : शुक्ल; अयन : दक्षिणायन; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
ललिता पंचमी
वेद कन्सल्टन्सी / 9987433660
दिनविशेष
विनोदी लेखकांचा बादशहा पी. जी. वुडहाऊस
टीम अवांतर
निखळ विनोदातून वास्तवाचे दर्शन घडविणाऱ्या इंग्रजी लेखक पी. जी. वुडहाऊस (किंवा प्लम) यांचा जन्म 15 ऑक्टोबर 1881 रोजी सरेमधील गिल्डफोर्ड येथे झाला. वुडहाऊस यांचे वडील हेन्री वुडहाऊस हे हाँगकाँग येथे न्यायाधीश होते. वुडहाऊस घराणे हे जुने, सुसंस्कृत घराणे समजले जाई. या घराण्याचे नॉरर्फ्लोकमध्ये शतकापेक्षा जास्त काळ वास्तव्य होते.
वुडहाऊस तीन वर्षे वयाचे असताना त्यांना इंग्लंडला माघारी पाठवण्यात आले. त्यांची देखरेखेसाठी एका आयाची नेमणूक करण्यात आली होती. शालेय शिक्षणानंतर पुढील शिक्षण ऑक्सफर्डमध्ये घेण्याची इच्छा असलेल्या वुडहाऊस यांना आर्थिक परिस्थितीमुळे शिक्षण सोडून एका बॅंकेत नोकरी करावी लागली. मात्र आपण या कामासाठी अयोग्य व्यक्ती आहोत याची जाणीव झाल्यावर त्यावर आधारित एक विनोदी लेख त्यांनी लिहिला.
हेही वाचा – वास्तुशास्त्र आणि करिअरमधील यश
सुरुवातीला त्यांनी बॅंकेतल्या नोकरीबरोबरच पब्लिक स्कूल मॅगझिनसाठी शालेय खेळांबद्दल गंभीर लेख लिहिण्यावर लक्ष केंद्रित केले आणि त्यात त्यांना काही प्रमाणात यशही मिळाले. नोव्हेंबर 1900 मध्ये त्यांचा पहिला विनोदी लेख, “मेन हू मिस्ड देअर ओन वेडिंग्स”, टिट-बिट्सने स्वीकारला. मुलांसाठीच्या ‘ द कॅप्टन ‘ नावाच्या नवीन मासिकाने त्यांना आणखी चांगल्या पगाराच्या संधी उपलब्ध करून दिल्या आणि बँकेतील त्यांच्या दोन वर्षांच्या कार्यकाळात, वुडहाऊस यांचे एकूण नऊ मासिकांमध्ये ऐंशी लेख प्रकाशित झाले.
1909 च्या सुमारास त्यांची पहिली कादंबरी ‘द पोथंटर्स’ त्यावर्षीच्या सप्टेंबर महिन्यात प्रकाशित झाली आणि लगेचच त्यांनी पूर्णवेळ लेखनाला वाहून घेण्यासाठी बँकेतील नोकरीचा राजीनामा दिला. कथा कादंबरी लेखनाव्यतिरिक्त वुडहाऊस यांनी अनेक म्युझिकल कॉमेडिज् लिहिल्या. यातील काही त्यांनी एकट्यांनी लिहिल्या तर काहींचे गाय बोल्टन यांच्यासोबत सहलेखन केले. या प्रहसनांसाठी त्यांनी काही गाणी देखील लिहिली. या सगळ्यांमुळे वुडहाऊस यांना नाव, प्रसिद्धी, पैसा आणि मुख्य म्हणजे नवनवीन कथानके मिळवून दिली.
त्यांच्या लेखनशैलीने प्रभावीत होत हॉलिवुडच्या एमजीएम या प्रसिद्ध स्टुडिओने त्यांना 1930 साली पटकथा लेखनासाठी आमंत्रित केले. आठवड्याला दोन हजार डॉलर्स एवढा घसघशीत पगारही दिला. आपल्या नाट्य आणि चित्रपट सृष्टीतील अनुभवांवर आधारित ‘ब्रिंग ऑन द गर्ल्स’ आणि ‘ओव्हर सेव्हन्टी’ अशी दोन पुस्तके लिहिली.
वुडहाऊस यांच्या विनोदी साहित्याने जगभरातील वाचकांना मोहिनी घातली आहे. त्यांच्या साहित्यात मानवी स्वभाव, साधेपणा आणि मिश्किल विनोद पाहायला मिळतात. त्यांनी निर्माण केलेल्या अजरामर पात्रांमध्ये तालेवार, थोडेसे भोळे असणारे बर्टी वूस्टर आणि त्यांना संकटातून लीलया बाहेर काढणारा त्याचा अत्यंत बुद्धिमान आणि हरकाम्या नोकर जीव्ह्ज़, निष्कलंक आणि चतुर बोलणारा स्मिथ, ब्लँडिंग्स कॅसलच्या विश्वातील लॉर्ड एम्सवर्थ आणि ब्लँडिंग्स कॅसल ही विनोदी पात्रे यांचा समावेश आहे. याशिवाय गोल्फच्या कथा आणि मिस्टर मुलिनर यांच्यावरील कथाही खूप गाजल्या.
14 फेब्रुवारी 1975 रोजी वुडहाऊस यांचे निधन झाले. मराठीतील सुप्रसिद्ध लेखक पु. ल. देशपांडे हे वुडहाऊस यांचे निस्सीम चाहते होते. वुडहाऊस यांच्या निधनाची बातमी ऐकून पु. ल. उद्गारले होते, “I thought he was immortal” (मला वाटलं होतं ते अमर आहेत).
आजचे राशिभविष्य
मेष – आज, एखादा महत्त्वाचा निर्णय घेताना द्विधा मनःस्थिती होण्याची शक्यता आहे. घाईघाईने निर्णय घेणे टाळा, कारण या कृतींमुळे नंतर समस्या निर्माण होऊ शकतात. तुमचा स्वतंत्र विचार स्वतःच्या इच्छेनुसार कृती करण्यास प्रवृत्त करेल. मात्र आज संयम आणि धीर धरणे आवश्यक असेल. आर्थिक अडचणींमुळे बऱ्याच काळापासून रखडलेल्या कोणत्याही कामाला आता गती मिळू शकते. पूर्ण एकाग्रतेने आणि समर्पणाने हाती घेतलेले कोणतेही काम यशस्वी होण्याची दाट शक्यता आहे. फक्त लक्ष विचलित होऊ देऊ नका आणि ध्येयावरच लक्ष केंद्रित करा.
वृषभ – आज कुटुंबासोबत आनंदाचा प्रसंग साजरा करण्याची संधी मिळेल. एखाद्या समस्येचे निराकरण होऊ शकते, ज्यामुळे वातावरणात शांतता आणि सकारात्मकता येईल. जवळच्या एखाद्या नातेवाईकासोबत भविष्यातील योजनांबद्दल एक महत्त्वाचे संभाषण होण्याचीही शक्यता आहे. भागीदारीत नवीन व्यवसाय सुरू करण्याचा विचार असेल, तर प्रकल्पाच्या सर्व पैलूंचा सखोल अभ्यास करा. नोकरीच्या शोधात असलेल्यांना चांगली बातमी मिळू शकते.
मिथुन – आज तुमच्यासाठी सावधगिरी आणि संतुलन राखणे अत्यंत महत्त्वाचे असेल. गाडी चालवताना विशेष काळजी घ्या, कारण थोड्याशा निष्काळजीपणामुळेही अनावश्यक खर्च होऊ शकतो. कुटुंबांसोबत बाहेर फिरायला जाण्याचा बेत आखल्यास दिवस आनंददायी ठरू शकतो. विद्यार्थ्यांना मैदानी स्पर्धा किंवा खेळांमध्ये आपली प्रतिभा दाखवण्याची संधी मिळेल. आवडत्या गोष्टींवर खर्च करण्याची इच्छा वाढेल, परंतु आपल्या बजेटकडे लक्ष ठेवणे महत्त्वाचे आहे. बोलण्यावर नियंत्रण ठेवा, कारण तुम्ही बोललेले कोणतेही कठोर शब्द नात्यांमध्ये अनावश्यक दुरावा निर्माण करू शकतात.
कर्क – आज एखाद्या विषयावरून वडिलांशी मतभेद होऊ शकतात, पण त्यांचाच सल्ला भविष्यात उपयोगी पडू शकतो. घरात एखादा नवीन प्रकल्प किंवा बदल करण्याची योजना आखू शकता. मात्र आधी आर्थिक व्यवस्थेचा विचार करावा लागेल. स्वतःच्या आरोग्याबाबत निष्काळजीपणा दाखवू नका, कारण एखादी लहान समस्याही महागात पडू शकते. वैयक्तिक गोष्टी प्रत्येकाशी शेअर करणे टाळा. आज कमी बोलणे, जास्त ऐकणे आणि परिस्थिती समजून घेणे तुमच्यासाठी अधिक फायदेशीर ठरेल.
सिंह – आज तुमचे मन आध्यात्मिक कार्यांकडे आकर्षित होऊ शकते. प्रार्थना, धार्मिक विधी किंवा शुभ कार्यांमध्ये सहभागी झाल्याने तुम्हाला शांती आणि समाधान मिळेल. कुटुंबातील एखाद्या सदस्याच्या बोलण्याने तुम्हाला राग येऊ शकतो, मात्र लगेच प्रतिक्रिया देण्याऐवजी परिस्थितीचा संयमाने विचार करा. व्यवसायात काही आव्हाने निर्माण होतील, मात्र तुमची निर्णयक्षमता मजबूत राहील. आदर आणि प्रतिष्ठा वाढण्याचे संकेत आहेत, ज्यामुळे तुमचा आत्मविश्वास आणखी वाढेल.
कन्या – आजचा दिवस विद्यार्थ्यांसाठी नवीन संधी घेऊन येऊ शकतो. अभ्यासासोबतच प्रशिक्षण घेण्याची, नवीन ठिकाणी शिकण्याची किंवा अनुभव मिळविण्याची संधी मिळू शकते. भूतकाळातील चुकांमधून शिकल्याने आता प्रगतीसाठी एक मजबूत पाया तयार होईल. जोडीदाराच्या करिअरबद्दलची चांगली बातमी संपूर्ण कुटुंबाला आनंद देऊ शकते. विचारपूर्वक घेतलेला गुंतवणुकीचा निर्णय भविष्यात फायदेशीर ठरू शकतो. भावंडांशी मतभेद होण्याची शक्यता आहे, मात्र संयमाने परिस्थिती सहजपणे हाताळता येईल.
तुळ – आज काही महत्त्वाच्या व्यक्तींना भेटल्याने भविष्यासाठी नवीन संधी निर्माण होऊ शकतात. प्रवास शक्य आहे आणि हा प्रवास उपयुक्त किंवा फायदेशीर ठरू शकतो. परदेशातील व्यवसाय किंवा कामाबाबत सकारात्मक बातमी मिळण्याची शक्यता आहे. प्रत्येक कामासाठी आज आगाऊ नियोजन करणे उत्तम राहील. आपली जबाबदारी पूर्णपणे इतरांवर सोपवल्यास निराशा येऊ शकते, म्हणून महत्त्वाच्या कामांवर स्वतः लक्ष ठेवा. आपल्या आरोग्याची काळजी घ्या, संतुलित आहार घ्या.
वृश्चिक – वरवर पाहता आजचा दिवस सामान्य वाटू शकतो, पण त्यात अनेक महत्त्वाचे संकेत दडलेले आहेत. एखादा मोठा निर्णय घेताना तुमची समज आणि व्यावहारिक विचार तुम्हाला योग्य दिशेने मार्गदर्शन करतील. सर्जनशील कामांमधील तुमची आवड वाढेल आणि नवीन कल्पना सुचू शकतील. धावपळीच्या वेळापत्रकामुळे थकवा येऊ शकतो, त्यामुळे विश्रांती घेणे आवश्यक आहे. संततीच्या एखाद्या निर्णयामुळे थोडा त्रास होऊ शकतो, पण संवाद आणि संयमाने परिस्थिती सुधारेल. शासकीय कामातील जुने अडथळे दूर होण्याची चिन्हे दिसत आहेत.
हेही वाचा – बापाची माया..
धनु – आजचा दिवस भूतकाळातील चुकांमधून शिकून पुढे जाण्याचा आहे. नोकरीच्या ठिकाणी काही लोक कामात अडथळा आणण्याचा प्रयत्न करू शकतात, त्यामुळे स्वतःच्या योजना आणि कामांबाबत सावधगिरी बाळगा. अनोळखी व्यक्तीवर लगेच विश्वास ठेवणे अयोग्य ठरेल. नातेवाईकाकडून आलेल्या बातमीमुळे काही प्रमाणात चिंता किंवा दुःख वाटू शकते. घरी एखादा धार्मिक किंवा शुभ कार्यक्रम आयोजित केल्यास वातावरणात सकारात्मकता येईल, कुटुंबात आनंदी वातावरण निर्माण होईल.
मकर – आज, तुमची मेहनत, समर्पण आणि वचनबद्धता तुम्हाला तुमच्या कामाच्या ठिकाणी इतरांपेक्षा वेगळे ठरण्यास मदत करू शकते. जोडीदाराकडून मिळालेले एखादे सरप्राइज दिवस खास बनवू शकते. कामातील तुमची कामगिरी वरिष्ठांना प्रभावित करेल. भविष्यात तुम्हाला त्याचा फायदाही होऊ शकतो. नवीन वाहन खरेदी करण्याचा विचार उत्साह वाढवेल आणि तुम्ही त्या दिशेने योजनाही आखू शकता. कुटुंबातील सदस्याच्या आरोग्याबाबत निष्काळजी राहू नका, गरज भासल्यास वेळेवर उपचार करा.
कुंभ – आज खर्च अपेक्षेपेक्षा जास्त असू शकतो, त्यामुळे बजेटवर बारकाईने लक्ष ठेवणे महत्त्वाचे ठरेल. नवीन घर किंवा मालमत्ता खरेदी करण्याचा मोह होऊ शकतो, परंतु कोणताही निर्णय स्वतःच्या आर्थिक क्षमतेनुसार आणि भविष्यातील गरजांनुसार घ्या. संवाद आणि सामंजस्याने कौटुंबिक समस्या सोडवण्याचा प्रयत्न यशस्वी ठरेल. जर तुम्हाला एखाद्या गोष्टीबद्दल चिंता वाटत असेल, तर वडिलांचा सल्ला आणि मार्गदर्शन खूप उपयुक्त ठरू शकते. संततीदेखील जबाबदाऱ्या चांगल्या प्रकारे पार पाडताना दिसतील.
मीन – प्रत्येक कामात विचारपूर्वक पुढे जाणे तुमच्यासाठी आज महत्त्वाचे असेल. कामाच्या ठिकाणी घाईगडबडीत चुका होऊ शकतात, म्हणून महत्त्वाची कामे पुन्हा तपासा. कामाच्या ठिकाणी बोलण्यावर नियंत्रण ठेवा, कारण तुम्ही बोललेली एखादी गोष्ट वरिष्ठांना आवडणार नाही. कुटुंबासोबत वेळ घालवण्याची आणि सहलीचे नियोजन करण्याची आज संधी मिळेल. व्यावसायिकांना अपेक्षित नफा मिळण्याची शक्यता आहे. प्रवासादरम्यान किंवा महत्त्वाच्या बैठकीत मिळालेली माहिती भविष्यात एका मोठ्या संधीचे दार उघडू शकते.
