रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. अननसाचा मुरंबा, सफरचंदाचे मिल्कशेक, पेरूचे पंचामृत बनविण्यासाठी या टिप्स वापरून पाहा.
- खूपदा सीझनमध्ये अननस अत्यंत स्वस्त दरात मिळतात. अशा वेळी त्यांचा साठा करून ठेवणे आपल्याला शक्य नसले, तरी त्यांचा मुरंबा करणे सहज शक्य असते. एक किंवा दोन पिकलेले किंवा अर्धवट झालेले अननस सोलून, किसणीने किसून घ्यावेत किंवा बारीक चिरावेत. आवश्यकतेनुसार साखर घालून थोडा वेळ फ्रीजमध्ये किंवा तसेच ठेवावे. त्याला भरपूर पाणी सुटते. हे मिश्रण गॅसवर ठेवून त्याला अधूनमधून चमच्याने ढवळत रहावे. सर्व पाणी आटल्यानंतर त्यामध्ये सुंठ, वेलची, जायफळ या सर्वांची पूड टाकावी. मुरंबा तयार होतो.
हेही वाचा – Kitchen Tips : शिळ्या भाताचा पुलाव, छोले भटुरे, वाटली डाळ करताना…
- पेरू स्वस्त आणि चांगले मिळतात, तेव्हा मोठे पेरू घेऊन त्याच्या फोडी कराव्यात. कूकरची एक शिट्टी करून पाणी न घालता वाफवून घ्याव्यात. गार झाल्यावर चाळणीवर गाळून घ्याव्यात. बिया आणि चोथा वर राहून घट्ट गर खाली पडेल. एक वाटी गराला पाव वाटी गूळ घालून एक चटका (उकळी) द्यावा. गार झाल्यावर बाटलीत भरून ठेवावा. मुलांना पोळी किंवा ब्रेडबरोबर देता येतो. तिखट-मीठ घालून फोडणी दिली, तर चटणी छान लागते. तसेच भाजलेले तीळ, खोबरे घालून मेथी-मिरचीच्या फोडणीने केलेले पंचामृत तर फारच रुचकर लागते. घट्ट गर फ्रीजमध्ये ठेवून हे आयत्या वेळेस करता येते.
- एक ग्लास सफरचंदाचा शेक बनविण्यासाठी दोन मध्यम आकाराची सफरचंदे आदल्या दिवशी रात्री फ्रीजरमध्ये ठेवावीत. दुसऱ्या दिवशी सकाळी ती बर्फाप्रमाणे कडक बनलेली असतील. शेक करण्यापूर्वी दोन-अडीच तास ही सफरचंदे फ्रीजरमधून बाहेर काढून ठेवावीत. आता ती उकडलेल्या टोमॅटोप्रमाणे एकदम मऊसर बनतील. ती हाताने उकलावीत (सोलून घ्यावीत) आणि त्यातील सर्व गर चमच्याने खरडून काढावा. त्यात दोन चमचे साखर, एक कप दूध घालावे आणि हे मिश्रण मिक्सरमधून फिरवून काढावे. चवदार सफरचंदाचा शेक तयार होईल. या पद्धतीमुळे सफरचंदामधील गर एक कणभरही वाया जात नाही. अगदी मध्यभागीच्या बियांजवळीलही सर्व गर निघून येतो आणि शेक पटकन करता येतो.
हेही वाचा – Kitchen Tips : दुधीची कोफ्ता करी, मेथी-पालक पुरी अन् खारी गवार करताना…
- फ्रूट सॅलडला नेहमीपेक्षा वेगळी आणि स्वादिष्ट चव आणायची असेल, तर त्यात सीताफळाचा बियाविरहित गर घालावा.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
