रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. दुधीची कोफ्ता करी, मेथी-पालक पुरी अन् खारी गवार करताना या टिप्स वापरून पाहा.
- दुधी भोपळ्याची कोफ्ता करी करताना दुधीचे मोठे मोठे तुकडे करून आतील मऊ पांढरा भाग बियांसहित कापून बाजूला ठेवावा. नंतर दुधी किसून, साले राहतील ती टाकून द्यावीत. कीस पिळून घ्यावा. पाणी टाकून द्यावे. किसाचे नेहमीप्रमाणे कोफ्ते करावे. आतील पांढरा भाग बियांसहित पाणी घालून मिक्सरमध्ये वाटावा. नारळाप्रमाणे दाटसर रस करावा. गाळावा. हा रस करीसाठी (ग्रेव्हीसाठी) वापरावा. ही करी चवदार आणि भरपूर होते. पांढरा भाग बाजूला काढल्यामुळे कोफ्ते जास्त करी शोषून घेत नाहीत. त्यामुळे कोफ्ते फुटण्याची भीती नसते.
- मेथी, पालक, मुळ्याचा पाला या भाज्या जास्त देठ न काढता निवडून बारीक चिराव्यात. दोन-तीन दिवस उन्हात वाळवून पूड करून डब्यात भरून ठेवाव्यात. उन्हाळा आला की, वाळलेल्या भाजीचा उपयोग करावा. भाजीची पूड रात्री भिजत घालावी. पाणी भरपूर असावे, कारण फार फुगते. सकाळी दोन-तीन वेळा ती पाण्यातून काढावी. भाजीत कणीक, थोडे बेसन, मीठ-तिखट, चवीला साखर घालून घट्ट मळून छोटे पराठे किंवा पुऱ्या कराव्यात. मोहन घालू नये. पोळ्या पण फार छान बनतात. लोणी आणि लोणच्याबरोबर तर फार स्वादिष्ट लागतात. (10 पुऱ्यांकरिता 1 चमचा भाजीची पूड असे प्रमाण घ्यावे.)
हेही वाचा – Kitchen Tips : मटार पुलाव, शाही पनीर, चाकवताची भाजी बनवताना वापरा या टिप्स
- उकडलेल्या बटाट्याची सुकी भाजी करताना फोडणीमध्ये एक छोटा चमचा डाळीचे पीठ घालावे. त्यामुळे भाजीस छान पिवळा रंग येतो. ती रुचकर लागते. तसेच भाजी कढईस लागत नाही. त्यामुळे खरडण्याचा त्रास वाचतो.
- गवारीच्या शेंगाची भाजी करतात. कुणाला आवडते कुणाला नाही. मात्र खारी गवारी शेंग सर्व लहान-मोठ्यांना आवडतेच असा अनुभव आहे. गवारीच्या शेंगा धुऊन कोरड्या करा. जून असलेल्या काढून टाका. बाकी शेंगा शेंडा काढून न मोडता निर्लेप कढईत तळून काढा. छान खमंग कुरकुरीत होतात. नंतर चवीप्रमाणे या शेंगांना थोडे मीठ चोळा. खारी सोपी गवारी शेंग तयार. अशी खारी शेंग चिवडा, उपिटातही खमंग, कुरकुरीत छान लागते. गप्पा मारताना, सहलीत खारी शेंग मजा आणते. गवारीच्या शेंगा लिंबाच्या लोणच्याबरोबरही छान लागतात.
हेही वाचा – Kitchen Tips : शिळ्या भाताचे उत्तप्पे, ब्रेडचे थालिपीठ अन् बरंच काही…
- प्रथम कारल्याचे पातळ काप करून त्याला थोडे मीठ आणि चिंचोकाभर गूळ लावून तासभर फडक्यात बांधून ठेवावे. वर वजन ठेवावे. नंतर ते पिळून भांड्यात काढावे. मंग मोहरीची पूड घ्यावी. त्यामध्ये लिंबाचा रस आणि असल्यास थोडा व्हिनीगर घालून घुसळावे. नंतर त्यात मीठ आणि फोडणी घालून सर्व एकत्र करावे. हे लोणचे बरेच दिवस टिकते आणि औषधीही आहे.
- आपण जेव्हा कारल्याचा, आल्याचा, तुळशीचा, नारळाचा रस काढतो, तेव्हा त्याला थोडासा गूळ लावावा म्हणजे रस चांगला निघतो.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
