वरी तांदळाची खिचडी प्रकार – 1
साहित्य
- वरी तांदूळ – दोन वाट्या
- भाजलेल्या शेंगदाण्याचे जाडसर कूट – एक वाटी
- मीठ – चवीनुसार
- मिरच्या – पाच ते सहा
- गूळ – चवीपुरते
- जिरे – एक टीस्पून
- लवंगा – दोन-तीन
- दालचिनीचा तुकडा – एक इंच
- चिरलेली कोथिंबीर – मूठभर
- ओले खोबरे – अर्धी वाटी
- तूप – दोन चमचे
कृती
- तूप गरम करून त्यावर जिरे टाकून फोडणी करावी.
- फोडणीत मिरच्यांचे तुकडे घालावेत आणि त्यावर वरी तांदूळ परतावेत.
- चांगले परतल्यावर त्यात आधणाचे पाणी घालावे.
- वरी तांदूळ थोडे शिजत आल्यावर त्यात चवीप्रमाणे मीठ, गूळ आणि दाण्याचे कूट घालावे.
- लवंगा आणि दालचिनी भाजून, जाडसर कुटून घालावी आणि चांगली वाफ येऊ द्यावी.
- शिजून झाल्यावर त्यात थोडे तूप सोडावे आणि वर ओले खोबरे तसेच कोथिंबीर घालावी.
- या खिचडीत बटाट्याच्या फोडी पण घालतात.
हेही वाचा – Recipe : मलई कोफ्ता आणि शिंगाड्याची भजी…
वरी तांदळाची खिचडी प्रकार – 2
साहित्य
- वरी तांदूळ – दोन वाट्या
- भाजलेल्या शेंगदाण्याचे कूट – दीड वाटी
- मीठ – चवीनुसार
- साखर – चवीनुसार
- तूप – फोडणीपुरते
- जिरे – एक टीस्पून
- मिरच्या – चार
- चिरलेली कोथिंबीर – मूठभर
- ओले खोबरे – अर्धी वाटी
कृती
- वरी तांदूळ गॅसच्या मंद आचेवर परतून घ्यावेत.
- नंतर त्यात आधणाचे पाणी घालावे. तांदूळ मऊ आणि मोकळे असे शिजवून घ्यावेत.
- नंतर ते ताटात काढून मोकळे करावेत.
- त्यात शेंगदाण्याचे कूट घालावे.
- चवीप्रमाणे मीठ आणि साखर घालावी.
- त्यानंतर एका कढईत तूप घालून जिरे आणि मिरच्यांचे तुकडे घालून फोडणी करावी.
- त्यात वरी तांदूळ घालून चांगली वाफ आणावी.
- खावयास देतेवेळी वरून कोथिंबीर आणि खोबरे घालावे. लिंबाची फोड बरोबर द्यावी.
हेही वाचा – Recipe : लज्जतदार दणगेले / हांडवो
वऱ्याची तांदळाची खिचडी प्रकार – 3
साहित्य
- वरी तांदूळ – चार वाट्या
- दाण्याचे कूट – दोन वाट्या
- मिरच्या – पाच-सहा
- कोथिंबीर – चिरलेली मूठभर
- ओले खोबरे – अर्धी वाटी (किसलेले)
- मीठ – चवीनुसार
- साखर – चवीनुसार
- जिरे – एक टीस्पून
- तूप – एक चमचा
कृती
- वरी तांदूळ तांबूस भाजून घ्यावे.
- तांदळाच्या दुप्पट आधण पाणी घेऊन त्यात हे तांदूळ घालून झाकून ठेवावेत. वरचेवर ढवळावे.
- याप्रमाणे एक तास तांदूळ भिजत ठेवावेत. नंतर ते मोकळे होतील.
- नंतर तूप आणि जिऱ्याची फोडणी करून त्यात मिरच्यांचे तुकडे टाकावेत.
- या फोडणीत वरी तांदूळ आणि दाण्याचे कूट घालावे.
- चवीला मीठ, साखर घालावी आणि परतून एक वाफ द्यावी.
- ही खिचडी साबुदाण्याच्या खिचडीसारखी होते.
(‘रुचिरा’ पुस्तकातून साभार)
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर,
avaantar.recipe@gmail.com या ईमेलवर किंवा
9869975883 या व्हॉट्सॲप क्रमांकावर पाठवा.
या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
