सतीश बर्वे
मला घेऊन गाडी निघाली पुण्याला आणि मी मागच्या सीटवर बसून जुने दिवस आठवत राहिलो… कॉलेजपासून हाकेच्या अंतरावर असलेल्या आमच्या आईस्क्रीम पार्लरमध्ये ते दोघे मला पहिल्यांदा भेटले होते. कॉलेजमध्ये वाणिज्य शाखेत ते दोघे शिकत होते. ते नुसतेच मित्र नव्हते, हे त्यांच्या वागण्या-बोलण्यातून सहज समजत होते. कॉलेज सुटल्यावर घरी जाताना आठवड्यातून दोन-तीन दिवस तरी आईस्क्रीम खायला येत असत. काही दिवसांतच त्या दोघांची आणि माझी ओळख झाली… आणि पुढे पुढे ती कधी इतकी वाढली ते आमचं आम्हालाच कळलं नाही.
जेवढा जीव त्यांचा एकमेकांवर होता, तेवढीच लुटुपुटीची भांडणं देखील व्हायची त्यांच्यात आणि ती शेवटी सोडविण्यासाठी माझ्याकडे यायचे दोघे. बघता बघता ते पदवीधर झाले आणि आमच्यातला रोजचा संवाद संपुष्टात आला. तो पुण्याला गेला पदव्युत्तर शिक्षण घ्यायला आणि ती मुंबईमध्येच नोकरीला लागली. तिनेच हट्टाने आमचा व्हॉट्सॲप ग्रुप तयार केला आणि आमच्यातला संवाद पुन्हा सुरू झाला…
एक दिवस तो मुंबईत आला होता, कामाच्या निमित्ताने आणि आम्ही तिघे जवळपास तीन-चार वर्षांनी भेटलो. गप्पांच्या ओघात ते दोघेही मॅच्युअर झाल्याचे जाणवले. पुढच्या एक-दोन वर्षांत त्यांनी लग्न करायचा निर्णय घेतला होता. ते होणारच होते, पण अधिकृतपणे त्यांनी मला सांगितले.
हेही वाचा – मुलाचं परदेशी शिक्षण अन् मातृत्वाची परीक्षा!
सहजीवन म्हणजे काय, हे त्यांना छानपैकी समजावून सांगितले. परस्पर प्रेम, विश्वास आणि आदर हे सहजीवनाचे महत्त्वाचे खांब आहेत, ज्यावर संसाराचा गाडा सुरळीत चालू रहातो. यातला एक खांब जरी डळमळीत झाला तरी, परिस्थिती हाताबाहेर जायला वेळ लागत नाही. आजवर तुमची लुटुपुटीची कैक भांडणं मी सोडवली. पण आता ते कदाचित शक्य होणार नाही मला… परस्पर प्रेम, विश्वास आणि आदर या फ्लेवर्सचे आईस्क्रीम संसाराच्या कपात पूर्णपणे विरघळेल याची खात्री तुम्हा दोघांना कायमच बाळगावी लागेल, जेणेकरून त्या तिन्ही आईस्कीमची एकत्रित चव म्हणजेच – ‘तुमचा संसार एक आदर्श संसार’ म्हणून संबंध जगात आदराने बघितला जाईल.
हेही वाचा – मनाची श्रीमंती… मित्राची अनोखी कहाणी!
नंतर इतर अनेक विषयांवर आमची चर्चा रंगली आणि त्यांचा संसार सुखाचा होईल याची मला खात्री पटली. आज त्या दोघांचे लग्न होते, ज्यासाठी दोघांनी हट्टाने मला गाडी पाठवली होती पुण्याला यायला. एव्हाना कर्वे रोडवरील एका मंगल कार्यालयाजवळ माझी गाडी थांबली. मी उत्सुकतेने खाली उतरून पायऱ्यांच्या दिशेने चालायला सुरुवात केली…
विचार, साहित्य, कला आणि संस्कृतीच्या सर्जनशीलतेला समर्पित असलेल्या avaantar.com या वेबपोर्टलवरील वैविध्यपूर्ण वाचनीय लेखाचा आनंद घ्यायचा असेल तर,
IXZVpuvKFwKH6gb0NBN51t?mode=r_c
या लिंकला क्लिक करून WhatsApp group जॉइन करा.
