|| श्री स्वामी समर्थ ||
गुणमिलन करताना नवमांश महत्त्वाचा. नवमांश म्हणजे प्रत्येक राशीचा नववा भाग. नवमांश कुंडली प्रामुख्याने विवाहासाठी बघितली जाते, पण इतर वर्ग कुंडल्या सुद्धा तितक्याच महत्त्वाच्या आहेत. नवमांश कुंडलीशिवाय आपण विवाहाचा विचार करू शकत नाही. लग्न कुंडलीतील लग्नेश, सप्तमेश, चतुर्थेश, धनेश आणि अर्थात कारक ग्रह शुक्र यांचे बळ नवमांश कुंडलीत बघावे लागते; कारण नवमांश कुंडलीत प्रत्येक ग्रहाचे पत्रिकेतील अधिष्ठान, बळ संपूर्णपणे स्पष्ट होते.
नवमांश कुंडलीतील लग्न हे विवाहासाठी असलेली इच्छा दर्शवते. अनेक लोकांना विवाह करण्याचीच इच्छा नसते किंवा अनेकवेळा पालकांच्या इच्छेखातर विवाह होतो, पण त्याची परिणती सुखात होत नाही, कारण तो मनापासून केलेला नसतो. त्यामुळे नवमांश कुंडलीत लग्न बघावे. लग्न म्हणजेच इच्छा.
नवमांशच्या लग्नावर शुभ ग्रहाची दृष्टी असेल तर, विवाहाची इच्छा आहे आणि पापग्रहांची दृष्टी असेल तर, इच्छाच नसते. शुभ आणि पाप दोघांचीही दृष्टी आली तर – लग्न झाले तर ठीक… नाही झाले तरी ठीक असे काहीसे असते.
नवमांशचा लग्नेश पापग्रह असला आणि तो लग्नाला बघत असेल तरी विवाह होतो, कारण तो स्वतःच्याच घराला बघत आहे. इथे जर लग्नेशसुद्धा पीडित किंवा पापग्रहांच्या दृष्टीत असेल तर विवाह होणे कठीण होते.
मुलाच्या नवमांश कुंडलीतील लग्नेश, मुलीच्या नवमांशमध्ये कसा कार्य करत आहे ते बघा… केंद्रात असेल तर उत्तम! एखाद्या पापग्रहाच्याही कुयोगात असेल तरी चालू शकेल, पण दोन पापग्रहांच्या कुयोगात नको. तसेच, त्रिक भावात नसावा. याचा अर्थ मुलाचा मानही मुलगी ठेवणार नाही. तर, मुलीच्या नवमांश कुंडलीचा लग्नेश मुलाच्या पत्रिकेत कसा कार्य करत आहे ते बघा… अशीच स्थिती असेल तर मुलगा मुलीला नीट वागवणार नाही.
हेही वाचा – ‘क्लिक’ झालेल्या जोडीदाराकडून नेमक्या अपेक्षा काय?
नवमांश कुंडलीतील चतुर्थेश मुलीच्या नवमांश कुंडलीत कसा कार्य करतो, त्याचप्रमाणे मुलीचा मुलाच्या कुंडलीत कसा कार्य करतो ते पाहूया – चतुर्थेश चांगला कार्य करत असेल, तर चांगला विवाह असेल आणि सुखाची प्राप्ती होईल. ज्याचा चतुर्थ भाव पीडित असेल त्याला सुखात न्यूनता येणार. नवमांशात चतुर्थ भाव चांगला असेल आणि त्यावर गुरूची दृष्टी असेल तर संसार चांगला होईल.
लग्न कुंडलीत शुक्र कुठल्या भावात आहे आणि त्याचे नवमांश बळ महत्त्वाचे कारण शुक्र विवाहाचा कारक ग्रह आहे. लग्न कुंडली आणि नवमांशमध्ये शुक्र सिंह राशीतच वर्गोत्तम असेल तर विवाह होणे कठीण आणि झालाच तर टिकणे कठीण.
सप्तमेश, लग्नेश, चंद्र, पंचमेश यांचे नवमांश कुंडलीत बळ. पंचमेश कुठल्या ग्रहांच्या युतीत आहे आणि नवमांशमध्ये पण कुठल्या भावात आहे, हे पाहणेही गरजेचे आहे.. पंचमेश आणि सप्तमेश यांचा एकमेकांशी संबंध असेल तर, आपल्या आवडत्या व्यक्तीशी विवाह होतो. या दोघांचीही नवमांश कुंडलीतील राशी महत्त्वाची आहे. नवमांश पाहिल्याशिवाय फक्त जन्म लग्न कुंडली पाहून फलित कथन केले, तर ते नक्कीच अचूक येणार नाही.
हेही वाचा – शनीचा कर्मयोग
सोशल मीडियाचा प्रभाव आज जनमानसावर खूप आहे. अनेक ज्योतिष जाणकारांचे प्रसिद्ध होणारे लेख हे ज्ञानात नक्कीच भर घालतील; पण म्हणून त्याच्या आधारे आपण ज्योतिषी नाही होणार. अनेक ॲप आज उपलब्ध आहेत, पण शेवटी फलित कसे सांगायचे, तो एक गाढा व्यासंग आहे. इतके सांगायचे तात्पर्य असे की, प्रत्येकजण ‘माझा राहू पंचमात आहे’, ‘मला साडेसाती आहे’, ‘माझ्या पत्रिकेत पितृदोष आहे’, ‘मला चंद्राची दशा आहे’ इतकेच सांगता येते, पण नवमांश माहीत आहे का? द्रेष्काण माहीत आहे का? मग कशाला आपल्या अर्धवट ज्ञानाचे तारे तोडायचे?
ज्योतिष सांगणे म्हणजे एका आत्म्याचा प्रवास सांगणे, जो समजणे कठीण आहे. इतके सगळे सोपे असते, तर अजून काय हवे होते? त्यामुळे हा लेख जे वाचतील त्यांनी नेहमी लक्षात ठेवावे, ज्यातील ज्ञान आपल्याला नाही, त्याबद्दल अवाक्षरसुद्धा काढू नये.
अलीकडेच एक माणूस ‘माझा मंगळ भाग्यात आहे बघा’ हे मला सांगत होता. मी त्याला म्हटले तुमचा मंगळ जरी भाग्यात असला तरी, तो अष्टम भावाची फळे देत आहे. डॉक्टरकडे गेलात, तर त्याला तुमचा आजार सांगणार की, कुठले औषध घ्यायचे तेही सांगणार? अहो, तो त्यातील तज्ज्ञ आहे ना! त्याला ठरवू देत काय करायचे ते. नवमांश किती महत्त्वाचा हे सांगण्यासाठी हा लेखन प्रपंच .
