स्वयंपाक बनवताना महिलांना नेहमीच कसरत करावी लागते. ‘फूड कॉर्नर’मध्ये भजी, सामोसे, गुळपोळी अन् कोथिंंबीरीच्या बाकरवड्या बनवतानाच्या काही टीप्स पाहूयात –
- भजी करण्याअगोदर डाळीचे पीठ किंचित गरम होईल इतपत भाजून घ्यावे आणि मगच भिजवावे. यामुळे भजी अतिशय कुरकुरीत होतात आणि यात तेलाचे मोहन अथवा सोडा घालायचीसुद्धा गरज पडत नाही. सोडा न घातल्याने तेलाची बचत होते. हीच पद्धत बटाटेवडा आणि सामोसा बनवतानासुद्धा वापरता येतो.
हेही वाचा – Kitchen Tips : घरात पातळ पोहे पाहिजेतच… कॉर्नफ्लोअरचा असाही उपयोग
- सामोसे तयार करताना मैद्यामध्ये बेकिंग पावडर घालावी. (अर्धा किलोला छोटा चमचा) एक चमचा ओवा आणि मिरे बारीक करून घालावेत. एक डाव तेल मिक्सरवर फेटून घालावे आणि मीठ घालून मैदा घट्ट भिजवावा. एक तासानंतर तो कुटून मऊ करावा आणि त्याच्या लांबट गोल पुऱ्या कराव्यात. पाच-सहा करून एकावर एक ठेवून मधोमध कापून त्याचा मोठा कोन करावा आणि त्यात सारण भरावे. पाण्याचा हात लावून वरून बंद करावे आणि गुलाबी रंगावर तळावेत. अतिशय खुसखुशीत आणि कुरकुरीत सामोसे होतात.
- काही वेळा पोळ्या खूप शिल्लक राहतात. त्याची फोडणीची पोळी करावी लागते. त्यापेक्षा गुळाची पोळी करावी. जरा बदल होतो आणि गोड असल्यामुळे मुले आवडीने खातात. पोळ्यांचे बारीक तुकडे करून घ्यावेत. थोडे तीळ भाजून पावडर करावी. आवश्यक तेवढा गूळ पातेल्यात घेऊन त्यात तूप टाकावे आणि मंद गॅसवर ठेवावे. गूळ पातळ होऊ लागल्यावर मधूनमधून ढवळावे म्हणजे खाली लागणार नाही. गुळाचे खडे संपूर्ण विरघळल्यावर त्यात तिळाची पावडर घालावी आणि सर्व एकत्र झाल्यावर त्यात पोळीचे तुकडे टाकावे आणि ढवळावे. नंतर झाकण ठेवून वाफ आणावी आणि पातेले गॅसवरून उतरवावे. गुळामुळे पोळी खमंग लागते. गुळात तुपाऐवजी पाणी घालू नये. कारण त्यामुळे पोळी थोडी ओलसर होते.
हेही वाचा – Kitchen Tips : व्हेज कटलेट, क्रिस्पी डोसा, आयस्क्रीम केक अन् उकड पेंड…
- कोथिंबिरीच्या बाकरवड्या तळताना आतील बाकर बाहेर निघतो आणि तेलात वाया जातो. अशा वेळी बाकरवड्या तळण्यापूर्वी सपिटाचा अतिशय पातळ घोळ बनवून घ्यावा आणि त्यात एक-एक वडी बुडवून तळावी. बाकरवड्या चांगल्या होतात आणि आतील मसाला वाया जात नाही.
