स्प्राऊटेड मुग आणि स्वीट कॉर्न चीज बॉल्स हा पदार्थ म्हणजे स्वयंपाकघरातील उरलेल्या साहित्याचा हा मेकओव्हर आहे, असं म्हणायला हरकत नाही. कारण माझ्या स्वयंपाकघरात वाटीभर मोड आलेले मूग आणि दीड वाटी स्वीट कॉर्न उरले होते. सॅलडमध्ये वापरून झाले होते आणि वाफवून खाऊनही झाले होते. आता या उरलेल्या मक्याच्या दाण्यांचे आणि मोड आलेल्या मुगाचे करायचे काय, हा प्रश्न होता. उसळीसारखे करावे म्हटले तर, मुले म्हणाली, “हे असले काही करू नको!” हे दाणे वापरून पुलाव करावा म्हटले तर, त्यांची भाताचा प्रकार खायची इच्छा नव्हती. बाहेर पडणारा पाऊस पाहून काहीतरी चटपटीत खायला हवे, असा त्यांचा आग्रह होता!
मला तर कसेही करून हे स्वीट कॉर्नचे दाणे आणि मोड आलेले मूग संपवायचे होते. घरात मैदा होता, चीज होते, बटाटे होते आणि ब्रेड क्रम्सही होते. मग काय, थोडा विचार केला आणि तो लगेच कृतीत आणला! मूग आणि स्वीट कॉर्नचे चीज बॉल्स पाहून माझा नवरा आणि मुले म्हणाली देखील, “आईला जर काही संपवायचे असेल, तर ती त्याचा बरोबर वापर करून आपल्या गळी उतरवते!” परंतु असे बोलणाऱ्या मुलांनी आणि नवऱ्याने हा हा म्हणता, “हे चीज बॉल्स खूप छान झालेत! तू खरंच ग्रेट आहेस!” असे म्हणत ते चट्टापट्टा संपवले देखील!
हेही वाचा – Recipe : मोड आलेल्या मेथीदाण्यांचे रुचकर लोणचे!
मूग आणि स्वीट कॉर्न चीज बॉल्स बनविण्याची रेसिपी अशी आहे…
साहित्य
- मोड आलेले मूग – 1 वाटी
- स्वीट कॉर्न – दीड वाटी
- उकडलेले बटाटे – 2
- हिरवी मिरची, आले आणि कोथिंबिरीची पेस्ट – 2 चमचे
- रेड चिली फ्लेक्स – 4 चमचे
- ॲारेगॅनो – 2 चमचे
- जिरेपूड – 1 चमचा
- धणेपूड – 1 चमचा
- आमचूर पावडर – 1 चमचा
- मीठ – चवीनुसार
- चीज क्यूब्स – 5 (तुकडे केलेले)
- मैद्याची घट्टसर स्लरी – 2 ते 3 चमचे मैदा
- बाईंडिंगसाठी – थोडा मैदा व ब्रेड क्रम्स
- ब्रेड क्रम्स – कोटिंगसाठी (गरजेनुसार)
- तेल – तळणासाठी
हेही वाचा – Recipe : पालक आणि कांद्याच्या पातीचे रायते
कृती
- मोड आलेले मूग आणि स्वीट कॉर्न एकत्र करून मिक्सरमध्ये थोडे जाडसर वाटून घ्यावेत.
- यामध्ये दोन उकडलेले बटाटे हाताने चांगले कुस्करून मिक्स करावेत.
- नंतर यात हिरवी मिरची-आले-कोथिंबीर पेस्ट, रेड चिली फ्लेक्स, ॲारेगॅनो, जिरेपूड, धणेपूड, आमचूर पावडर आणि चवीनुसार मीठ घालावे.
- वरून बाईंडिंगसाठी थोडा मैदा आणि थोडे ब्रेड क्रम्स घालून हे मिश्रण चांगले एकजीव करावे.
- चीज क्यूब्सचे छोटे चौकोनी तुकडे करून घ्यावेत. दोन ते तीन चमचे मैद्याची घट्टसर स्लरी तयार करावी आणि एका ताटामध्ये ब्रेड क्रम्स घ्यावेत.
- त्यानंतर मूग आणि मक्याच्या मिश्रणाचे छोटे-छोटे गोळे करून त्यांच्या मध्यभागी चीजचा एक चौकोनी तुकडा ठेवावा आणि चीज क्यूब सर्व बाजूने आत दाबून गोळा परत एकसारखा गोल करावा. असे सर्व गोळे तयार करून घ्यावेत.
- गॅसवर कढईत दोन ते तीन पळ्या तेल गरम करायला ठेवावे.
- तेल गरम होईपर्यंत हे गोळे मैद्याच्या स्लरीत बुडवून नंतर ब्रेड क्रम्समध्ये व्यवस्थित घोळवून तयार ठेवावेत. ब्रेड क्रम्स सर्व बाजूंनी व्यवस्थित लागायला हवेत.
- तेल छान गरम झाले की, हे गोळे मंद आचेवर सोनेरी रंग येईपर्यंत तळून घ्यावेत.
- चवीला अतिशय सुंदर आणि घरात उपलब्ध असलेल्या साहित्यात तयार झालेले हे स्प्राऊटेड मूग आणि स्वीट कॉर्न चीज बॉल्स पुदिना चटणी किंवा टोमॅटो सॉससोबत गरमागरम सर्व्ह करावेत.
तसे पाहायला गेले तर हे एक प्रकारचे पकोडेच झाले, परंतु यामध्ये मी ॲारेगॅनो, रेड चिली फ्लेक्स आणि चीज क्यूब्सचा वापर केल्यामुळे साधारण वाटणाऱ्या मुगाने आणि स्वीट कॉर्नने आपले रंगरूप बदलले आणि त्यासोबत त्यांच्या चवीतही छान ट्विस्ट आला! पावसाळी वातावरणात गरमागरम मूग-स्वीटकॅार्न चीज बॉल्सचे हे सरप्राइज घरातील सर्वांनाच आवडण्यासारखे आहे.
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.
या ईमेलवर किंवा
9869975883 या व्हॉट्सॲप क्रमांकावर
तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
