अलीकडचीच गोष्ट आहे. घरी एकटाच होतो. संध्याकाळचं चहा आणि खाणं झालं होतं. विचार केला आपणच लिहिलेल्या म्हैस पुस्तकामधला एखादा लेख वाचावा. पुस्तक उघडलं आणि समोर लेख आला – ‘मित्र मैत्रिणींच्या संपर्कात रहा’. पहिल्यांदाच लेख वाचतो आहे, असे समजून लेख वाचला आणि मजा आली. लेखांमधल्या आठवणींबद्दल विचार करत होतो आणि तेवढ्यात फोनची रिंग वाजली. सोलापूरहून वाचक मैत्रिण सुनीता यांचा फोन होता.
मी : नमस्कार, मित्र-मैत्रिणींच्या संपर्कात रहा
सुनीता : तुम्हाला कसं समजलं की, तुमच्याच पुस्तकातला ‘मित्र-मैत्रिणींच्या संपर्कात रहा’, हाच लेख मी वाचत होते म्हणून!
मी : कारण मी पण आत्ताच तोच लेख वाचत होतो आणि का ते माहीत नाही, पण असं उगीचच वाटलं की, कुणीतरी मित्र-मैत्रीणी पण हा लेख आत्ताच वाचत असतील आणि त्यांचा फोन येईल.
हेही वाचा – फॅशनची हुडहुडी… वेळीच व्हा सावध!
सुनीता : दोघेजण एकच लेख एकाच वेळी वाचत आहोत, आणि लगेच फोन! वा मस्तच… नक्कीच टेलीपथी असणार. कालच ॲमेझॉनकडून तुमचं म्हैस पुस्तक आलं. आता घरी कोणीच नव्हतं म्हणून विचार केला पुस्तक उघडावं आणि समोर येईल तो लेख आज पूर्ण वाचावा आणि पहिला लेख समोर आला – ‘मित्र मैत्रिणीच्या संपर्कात रहा’. खूपच छान लिहिला आहे. वाचताना मजा आली आणि म्हणून संपर्कात येण्याकरिता लगेच फोन केला. आता रोज एक एक वाचत जाईन. लेखामध्ये लिहिलेली कॉलेजची मैत्रीण वीणा आणि नाशिकची मैत्रीण सुनंदा यांच्याशी गप्पा होतात की नाही आणि त्यांना पुस्तक मिळाले का?
मी : त्यांना पुस्तक मिळाले आहे आणि त्यांचे फोन पण येत असतात. बऱ्याच मित्रांचे पण फोन येत असतात, पुस्तक मिळाल्याबद्दल. मित्र-मैत्रिणींशी संपर्कात राहून गप्पा मारणे यामध्ये नेहमीच एक वेगळाच आनंद असतो.
सुनीता : कारण या गप्पांना कुठला विषय असा नसतोच. कुठून तरी सुरुवात होते आणि कुठे चाललो आहे, कुठे जात आहे, किती वेळ बोलणे चालू आहे हे समजतच नाही. फक्त हसणे सुरू असते आणि मजा घेणे सुरू असते.
हेही वाचा – हसत रहा, हसत रहा… निरोगी रहा!
या विषयावरून त्या विषयावर अशा आमच्या गप्पा सुरू होत्या आणि हसणे सुरू होते… आणि –
मी : तुमच्याकडे कोणीतरी आलेलं दिसतय. कारण डोअर-बेलचा आवाज तुमच्या फोनमधून येत आहे.
सुनीता : तुमच्याकडे पण कोणीतरी आलेले दिसतंय, कारण डोअर-बेलचा आवाज तुमच्याही फोनमधून येतो आहे.
दोघेही एकदम : हो हो कुणीतरी आलेले दिसतय. दारावरची बेल वाजते आहे.
बाय बाय, पुन्हा भेटू, पुन्हा बोलू, पुन्हा गप्पा मारू, मित्र-मैत्रिणींच्या संपर्कात रहा… असे म्हणून फोन बंद झाले.
