स्वयंपाक बनवताना महिला आहे ती सामग्री वापरून पदार्थात काहीतरी वेगळेपण आणण्याचा प्रयत्न करतात. यासाठी काही क्लृप्ती लढविल्या जातात. ‘फूड कॉर्नर’मध्ये बिटचे कटलेट आणि परोठे, पालकाची भाजी, भरली वांगी करताना या टिप्स वापरून पाहा.
- कारल्याची भाजी करताना कारली चिरल्यावर त्यांना मीठ आणि लिंबूरस चोळून पंधरा मिनिटे ठेवावे. कडूपणा कमी होतो.
- पालकाच्या भाजीमध्ये कोवळी पाने खूप असतात. ती निवडून घेता येत नाहीत. तेव्हा ती पाने न काढता तशीच ठेवावीत आणि ते बुडखे जमिनीत लावावेत. थोडे दिवसांत ती पाने मोठी होतात आणि त्यांचा भाजीसाठी उपयोग होतो.
- पातळभाजीसाठी शिजवायच्या पालेभाज्या धुऊन घेऊन तशाच कुकरमध्ये शिजवाव्यात. त्यामुळे चिरण्याचा वेळ वाचतो आणि क्लोरोफिल उडून किंवा निघून जाण्याची शक्यता कमी होते. नंतर चटकन चिरल्या जातात. उलथन्याणे सुद्धा भांड्यातल्या भांड्यात बारीक करू शकतो आणि त्यामुळे भाजीही चांगली मिळून येते. चिरताना काढलेले पाणी भाजीसाठी वापरल्याने सत्व कायम राहते. भाजी रुचकर होते.
हेही वाचा – Kitchen Tips : भाज्यांच्या सत्वयुक्त सालींचा वापर अन् टोमॅटोचे सार करण्याच्या टिप्स
- दोडक्याची, भरल्या वांग्याची, पडवळाची किंवा कोणत्याही फळभाजीची भाजी करताना त्यात ‘दाण्याचे कूट’ थोडे वापरून भिजवलेली मसुराची डाळ वापरल्यास भाजी मिळून येते. शिवाय भाजी स्वादिष्ट आणि रसरशीत दिसते.
- सुरकुतलेले टोमॅटो फेकून देण्यापेक्षा 20 मिनिटे मिठाच्या पाण्यात ठेवल्यास सुस्थितीत येतात.
- बाजारातून बीट आणल्यानंतर ते स्वच्छ धुऊन कुकरमध्ये उकडून घ्यावे. बीटचे चार तुकडे केल्यास ते लवकर आणि चांगले उकडले जातात. थंड झाल्यानंतर थोडा मिठाचा हात लावून फ्रीजमध्ये ठेवून द्यावे. पाच-सहा दिवस तरी चांगले राहतात. किसून त्यामध्ये फोडणी, मीठ, साखर, आवडत असल्यास कांदा घालून कोशिबीर करता येते किंवा किसून त्यात ब्रेड भिजवून घातला आणि आले-लसूण पेस्ट वगैरे घालून आयत्या वेळी कटलेट करता येतात. बीटच्या चकत्या काढून सॅलड डिश सजवता येते किंवा पुलावच्या डिशच्या कडेला लावून त्याची शोभा वाढविता येते. किसून त्यात कणीक मळून लसूण पेस्ट, कोथिंबीर वगैरे घालून परोठे करता येतात. यातील कोणताही पदार्थ आयत्या वेळी करता येतो.
हेही वाचा – Kitchen Tips : मसाला वांगी, फ्लॉवरची भाजी, पातळ पालेभाजी बनवताना…
- वालाच्या शेंगा, डिंगऱ्या, मुळा या भाज्यांना एक प्रकारचा उग्र वास असतो. तो कमी व्हावा म्हणून भाजीला फोडणी दिल्यानंतर त्यात एक चिमूटभर ओव्याची पूड टाकावी आणि मग भाज्या शिजवाव्यात. वास तर जातोच, पण चवही सुंदर येते.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
