Recipe : मातरसुतिर / कोराईसुतिर कोचोरी (बंगाली मटार कचोरी)

माधवी जोशी माहुलकर

मातरसुतिर किंवा कोराईसुतिर कोचोरी (कचोरी) आणि आलू की सब्जी, ही बंगाली लोकांची हिवाळ्यातील खास आवडती डिश आहे. या कचोरी किंवा पुरीत फक्त ताज्या हिरव्या मटारचे सारण आवश्यक मसाल्यांमध्ये तयार केलेले असते. ही मटार कोचोरी बंगाली लोक दम आलू किंवा आलू / मटारच्या रस्सा भाजीसोबत खाणे पसंत करतात. कोराईसुतिर आणि मातरसुतिर अशी मटारची दोन बंगाली नावे कळल्यामुळे माझ्या ज्ञानात भर पडली. माझी एक बंगाली मैत्रीण आहे तिने ही मातरसुतिर कोचोरी आणि आलु मटार की, सब्जी तिच्या किटी पार्टीत स्पेशल डिश म्हणून तयार केली होती.

आपल्या मराठी बायकांना वाटले मातरसुतिर कोचोरी म्हणजे खास काहीतरी बंगाली पदार्थ असेल आणि प्रत्यक्षात जेव्हा डिश पाहिली तेव्हा सगळ्यांच्या मुखातून एकच वाक्य बाहेर पडलं, “अरे, ही तर आपली मटार पुरी आणि बटाट्याची भाजी!”  आमची बंगाली मैत्रीण कितीतरी वेळ आम्हाला ती मातरसुतिर कोचोरी किती वेगळी आहे, हे सांगण्याचा प्रयत्न करत होती; परंतु आपल्या बायका ऐकायलाच तयार नव्हत्या. त्यांचं एकच म्हणणं होतं की, “वह तुम्हारी मातरसुतिर कोचोरी माने हमारी मटर पुरी है… क्योंकी इस में कचोरी का मसाला नहीं सिर्फ मटार से बनाई हैं, इसीलिए ये मटार पुरी ही है…” शेवटी ती बंगालीण बिचारी चूप बसली; परंतु तिने केलेली ही मातरसुतिर किंवा कोराईसुतिर कोचोरी म्हणतात, ती आणि आलू मटार की सब्जी इतकी टेस्टी झाली होती की, सर्वजणी मटार पुरी भाजी म्हणत का होईना, पण हा पदार्थ बोटं चाखून खात होत्या. ते पाहून आमची बंगाली मैत्रीण मात्र खूश झाली होती. वरून खस्ता आणि आतून नरम असलेली मटार पुरी तयार करण्याची पद्धत अगदी साधी सोपी आहे.

हेही वाचा – Recipe : स्वादिष्ट लिटिल मिलेट्स कटलेट्स!

साहित्य

• ताजे मटार – 4 वाट्या
• बडीशेप – 1 चमचा
• जिरे – 1 चमचा
• धणे – 1 चमचा
• लाल तिखट – 2 चमचे
• हळद – अर्धा चमचा
• गरम मसाला – 1 चमचा
• चिरलेली कोथिंबीर – मुठभर
• आले, लसुण, हिरव्या मिरचीची पेस्ट – आवडीनुसार (तिनही पेस्ट वेगवेगळ्या कराव्यात)
• मीठ – चवीनुसार
• आमचूर पावडर – 1 चमचा
• साखर – चवीपुरती
• मैदा – 4 वाट्या
• गव्हाचे पीठ – 1 वाटी
• बारीक रवा – 2 चमचे
• तेल – तळणाकरिता
• पातळ केलेल्या तुपाचे मोहन – 2 चमचे (पुरीकरिता)

हेही वाचा – Recipe : शॅलोट्सचे चटपटीत लोणचे!

पुरवठा संख्या – 4 व्यक्तींसाठी

कृती

1. प्रथम थोडे मीठ टाकून मैदा, गव्हाचे पीठ आणि रवा मिक्स करावे आणि त्यात कडकडीत तुपाचे मोहन घालून ते सर्व पिठाला चांगले चोळावे आणि गरजेप्रमाणे पाणी टाकून या पिठाचा घट्ट गोळा मळून तो झाकून बाजूला ठेवावा.
2. गरम पाण्यात छोटा अर्धा चमचा साखर टाकून मटार दोन मिनिटे उकळून घ्यावेत.
3. ते उकळले की, त्यातील पाणी काढून मटार एका चाळणीवर निथळत ठेवावेत.
4. तोपर्यंत एका कढईत बडीशेप, जिरे, धणे भाजून त्यांचा भरडपूड तयार करावी.
5. आले, लसूण आणि मिरचीची तसेच कोथिंबीरीची वेगवेगळी पेस्ट करून घ्यावी.
6. थंड झालेल्या मटारची सुद्धा पेस्ट करून घ्यावी.
7. एका कढईत अर्धी पळी तेल टाकून ते तापले की, त्यात एक चमचा हिंग टाकावा आणि नंतर त्यामध्ये जिरे, धणे आणि शोपेची भरडपुड टाकून ती थोडी गुलाबीसर परतून घ्यावी.
8. नंतर त्यात आले, लसूण, हिरवी मिरची आणि कोथिंबीरीची पेस्ट टाकून लगेच हळद, तिखट आणि गरम मसाला टाकून सर्व मिश्रण एकत्र करावे.
9. मग त्यात हिरव्या मटारची पेस्ट टाकून सर्व जिन्नस एकजीव करून त्यात चवीनुसार मीठ, एक चमचा आमचूर पावडर आणि चवीपुरती साखर टाकून सारण कोरडे होईपर्यंत परतून घ्यावे.
10. सारण थंड झाल्यावर त्याचे छोटे छोटे गोळे करून घ्यावेत.
11. मैद्याचा गोळा परत एकदा मळून घ्यावा आणि पुरीकरता त्याचे गोळे तयार करावेत.
12. मैद्याच्या गोळा सर्व बाजूने सारखा लाटून त्यामध्ये मटारच्या सारणाचा गोळा ठेवून पूरीचे तोंड बंद करावे आणि हातावरच या पूरीला गोल आकार देत सर्व बाजूंनी आतले सारण व्यवस्थित पसरवून घ्यावे.
13. नंतर पोळपाटावर पुरीच्या कडांना सर्व बाजूंनी दाबून मटर पूरी लाटून घ्यावी. अशा प्रकारे सर्व मटर पुऱ्या तयार करून घ्याव्यात.
14. गॅसवर कढई ठेवून त्यात पुरी बुडेल इतपत तेल टाकून ते पहिले कडकडीत तापवून घ्यावे.
15. पुरी तळताना गॅस मध्यम किंवा मंद करत सर्व मटार पुऱ्या सोनेरी रंगावर तळून घ्याव्यात.

एकूण कालावधी – 45 मिनिटे

टिप्स

• गरमागरम मटार पुऱ्या मटार आणि बटाट्याच्या चमचमीत रस्सा भाजी सोबत सर्व्ह कराव्यात.
• मटार पुऱ्या तळलेल्या हिरव्या मिरचीसोबत किंवा सॅास सोबतही खाता येतात.

तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.

avaantar.recipe@gmail.com

या ईमेलवर किंवा

9869975883 या व्हॉट्सॲप क्रमांकावर

तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.