माधवी जोशी माहुलकर
विदर्भातील विशेषतः नागपूरातील सांबार वडी किंवा पुडाची वडी प्रसिद्ध आहे. विदर्भात कोथिंबीरीला ‘सांबार’ म्हणतात, म्हणून या वडीला ‘सांबार वडी’ असे नाव पडले आहे. नागपूरातील महाल, इतवारी या भागात या पुडाच्या वडीसोबत कढी देतात, असं ऐकलं आहे. या वडीसारखाच ‘पाटोडी’ नावाचा प्रकार अमरावती, नागपूर, वर्धा या भागात मिळतो, परंतु यामध्ये दाण्याचे कुट जास्त प्रमाणात वापरतात आणि कोथिंबिरीचे प्रमाण कमी असते. तरीही काही लोक त्यालाच सांबार वडी म्हणतात, याचे सारण थोडे बाकरवडीसारखे असते. खसखस, खोबऱ्याचे प्रमाणही कमी असते. चवीकरिता चिंच गुळाचे पाणी किंवा आमचुर पावडर आणि साखर वापरल्यामुळे ही पाटोडी चवीला आंबटगोड लागते. परंतु खरी सांबार वडी तीच की ज्यामध्या कोथिंबीर, खसखस आणि खोबऱ्याचे प्रमाण बरोबरीने वापरून ती वडी पुडक्याच्या आकारात केली जाते, आणि त्यामुळेच तिला ‘पुडाची वडी’, ‘सांबार वडी’ किंवा ‘कोथिंबीर वडी’ असे म्हटले जाते. अशा या पुडाच्या वडीची कृती खाली दिलेली आहे. करून पाहा आणि आवडल्यास मला अभिप्राय द्यायला विसरू नका!
साहित्य
- कोथिंबीर – 1 मोठी जुडी
- खोबरे – 1 वाटी किसलेले
- तीळ आणि दाण्याचे कुट – अर्धी वाटी
- खसखस – अर्धी वाटी
- आले, लसूण, हिरवी मिरची पेस्ट
- कांदे – 2 मध्यम आकाराचे
- बेसन – तीन वाट्या
- तांदळाचे पीठ – एक वाटी
- मीठ – चवीनुसार
- साखर – चवीनुसार
- लिंबु – 1
- दही – 1 वाटी
- हळद – 1 चमचा
- लाल तिखट – 1 चमचा
- गोडा मसाला – 1 चमचा
- मोहरी – 1 लहान चमचा
- जिरे – 1 लहान चमचा
- हिंग – 1 लहान चमचा
- तेल – 3 टेबलस्पून
- चारोळी – 1 लहान चमचा
हेही वाचा – Recipe : विदर्भ स्पेशल… दाणेभात अन् ठेचा
कृती
- कोथिंबीर स्वच्छ धुऊन थोडी सुकवून घ्यावी. नंतर बारीक चिरावी. काड्या कमी वापराव्यात.
- कोथिंबीर सुकेपर्यंत कांदा बारीक चिरून त्याची पेस्ट करून घ्यावी.
- बेसन आणि तांदळाचे पीठ एकत्र करून दोन टेबल स्पून किंवा छोटी अर्धी पळी तेलाचे मोहन घालून घट्ट गोळा मळून घ्यावा.
- प्रथम सुके खोबरे लालसर भाजून घ्यावे.
- सारण तयार करताना प्रथम कढईत खसखस टाकून थोड्या तेलावर परतून घ्यावी.
- यानंतर कढईत फोडणीसाठी तेल तापवून त्यामध्ये मोहरी, जिरे तडतडल्यावर एक चमचा हिंग टाकावा.
- नंतर त्यातच कांद्याची पेस्ट टाकून ती लालसर परतून घ्यावी.
- कांदा लालसर आणि कोरडा झाला की, त्यात आले, लसूण आणि हिरव्या मिरच्यांची पेस्ट टाकून तीसुद्धा परतून घ्यावी.
- नंतर त्यात चवीनुसार थोडी हळद, तिखट, थोडा गोडा मसाला आणि मीठ टाकावे.
- त्यानंतर लगेच तीळ-शेंगदाण्याचे कूट आणि खोबऱ्याचा भाजलेला किस टाकावा.
- या कुटात खसखस आणि थोडी चारोळी टाकून चवीपुरता साखर टाकावी.
- हे सारण थोडे थंड झाल्यावर यामध्ये बारीक चिरलेली कोथिंबीर टाकून सगळे घटक एकजीव करून घ्यावे. त्यानंतर वरून लिंबु पिळावे
- एक चमचा गरम मसाला आणि मीठ टाकून दही फेटून घ्यावे.
- आता बेसन आणि तांदूळ पिठाचा गोळा घेऊन त्याची पोळी लाटावी आणि त्यावर मसाला घातलेले दही एका छोट्या चमच्याने व्यवस्थित पसरवून घ्यावे.
- त्यावर मध्यभागी कोथिंबिरीचे सारण भरावे.
- त्यानंतर पोळीचे दोन्ही भाग दुमडून घ्यावे आणि दोन्ही बाजुच्या कडांनी आवरण बंद करावे.
- तेल गरम करून या वड्या खरपूस तळून घ्याव्या.
- आवडीनुसार त्रिकोणी किंवा चौकोनी तुकडे करून पुदिना चटणीबरोबर सर्व्ह करावे.
एकूण वेळ – साधारणपणे 45 मिनिटे
हेही वाचा – Recipe : विदर्भ स्पेशल… तुरीच्या उसळीतील दिवसे!
टीप
- दही आणि मसाल्याचे मिश्रण सांबार वडीच्या पोळीला लावण्याऐवजी तेलामध्ये गरम मसाला टाकून ते पोळीला लावावे. त्यानंतर कोथिंबीरीचे सारण पसरवावे.
- ही वडी खाताना खसखस आणि खोबऱ्याचा स्वाद खूप छान लागतो. त्यामुळे खसखस आणि खोबरे थोडे जास्त झाले तरी काही हरकत नाही.
- आवडत असल्यास चारोळीसह काजू तुकडा देखील वापरू शकता.
- पुडाची वडी, श्रीखंड किंवा गाजराचा हलवा यांची जादू आजमवायची असेल तर या त्रिकुटाची भट्टी एकदा तरी जमवून बघा!
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता. मात्र, त्यासाठी तुम्हाला वरील फॉरमॅटमध्ये ही रेसिपी द्यावी लागेल.
या ईमेलवर तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
