रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. वेगवेगळ्या जॅमपासून आइस्क्रीम अन् स्वस्त आणि मस्त जेली बनविण्यासाठी या टिप्स वापरून पाहा.
- एक लीटर दूध अर्धा लीटर होईपर्यंत आटवा. अर्धा कप दूध बाजूला काढा. ते गार झाल्यावर त्यात एक चमचा कस्टर्ड मिसळा. नंतर ते आटवलेल्या दुधात घाला. चवीप्रमाणे साखर घाला. मिश्रण गार झाल्यावर आपल्या आवडीचा जॅम दोन चमचे त्यात घाला. चव पाहून परत थोडी साखर घाला. सर्व मिश्रण मिक्सरमधून फिरवून चांगले एकजीव करून घ्या. बाजारातून आणलेल्या आइस्क्रीमच्या रिकाम्या कपांमध्ये मिश्रण ओता. हे कप फ्रिझरमध्ये ठेवा. दोन तासांत सुंदर आइस्क्रीम तयार होते. आंबा, अननस, स्ट्रॉबेरी जॅम (क्रश), मिक्स जॅम याचा वापर करता येईल. पिस्त्यासाठी थोडे काजू वाटून थोडे तुकडे घाला. थोडा हिरवा रंग घाला. मुद्दाम पिस्ता आणायला नको. पिस्ता आइस्क्रीम चांगले होते. ज्या सीझनमध्ये जी फळे मिळतात त्या फळाचा रस मिक्सरमधून काढा आणि गार मिश्रणात घाला. घट्ट आणि नैसर्गिक रंग, वास मिळतो. चवही छान लागते. आइस्क्रीम मात्र छोट्या कपातून फ्रिझरमध्ये ठेवले, तर पटकन होते. दूध व्यवस्थित आटवून घट्ट करा.
हेही वाचा – Kitchen Tips : मटकीचे सूप, व्हेज पुलाव, कडधान्याची उसळ बनविताना…
- बाजारात मिळणारी तयार जेलीची पाकिटे खूपच महाग असतात. घरच्या घरी जेली तयार करण्यासाठी बाजारात प्लेन जिलेटिनची छोटी पाकिटं मिळतात. घरात कुरडया आणि आइसक्रीम करण्यास वेगवेगळे स्वाद तसेच रंगाच्या बाटल्या असतात, त्याच वापरणे. यासाठी पाणी 500 मिलिलीटर, जिलेटिन एक टेबलस्पून, लिंबाचा रस दोन टेबलस्पून किंवा सायट्रिक अॅसिड पाव चमचा, साखर 10 टेबलस्पून… हे साहित्य घ्या. प्रथम जिलेटिन पाव कप पाण्यात भिजवा, उरलेले पाणी उकळवून त्यात साखर विरघळून घेणे. जिलेटिन मंद आचेवर विरघळून घेऊन गरम साखरेच्या पाण्यात मिसळवा. त्यात सायट्रिक अॅसिड किंवा लिंबाचा रस घालून ते थंड होऊ द्या. आवडीप्रमाणे रंग आणि इसेन्स घाला. मिश्रण गार झाल्यावर ‘जेली मोल्ड’ पाण्याने विसळून घ्या. त्यात जेलीमिश्रण सेट करायला ओतून, फ्रीजमध्ये बर्फाच्या कप्प्यात ठेवणे. सेट झाल्यावर साध्या कप्प्यात हलवा, म्हणजे जेली बर्फाळ आणि कडक होत नाही. साखर, रंग आणि इसेन्स आवडीनुसार कमी जास्त करता येते. एकदा ही बेसिक कृती जमली की, रंगीबेरंगी जेलीचे प्रकार करता येतात आणि आवडीनुसार फळांचे तुकडे, केळी, सफरचंद, पपनस वगैरे घालता येतात आणि ही स्वीट डिश दूध-सायीबरोबर खाणे योग्य, असे म्हणतात.
हेही वाचा – Kitchen Tips : दाल फ्राय, टेस्टी ताक, शिळ्या भाताचा नाश्ता करताना…
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
