गोळ्यांचे सांबार
साहित्य
- मसुराची डाळ – दोन वाट्या
- जिरे – दोन चमचे
- धणे – तीन चमचे
- ओल्या मिरच्या – चार-पाच
- तिखट – एक चमचा
- मीठ – चवीनुसार
- किसलेले सुके खोबरे – पाव वाटी
- आमसुले – दोन
- गूळ – चवीपुरता (अंदाजे सुपारीएवढा)
- कोथिंबीर – बारीक चिरलेली अर्धी वाटी
- फोडणीचे साहित्य
- तेल – तळणाकरिता
कृती
- मसुराची डाळ दोन तास भिजत घालावी आणि नंतर ती वाटावी.
- थोडे धणे, थोडे जिरे, मीठ आणि मिरच्या वाटून तो वाटलेला गोळा, वाटलेल्या डाळीच्या गोळ्यात घालावा आणि चांगले कालवून घ्यावे.
- या पिठाचे सुपारीएवढे गोळे करून, तेलात तळून काढावेत.
- मग पाणी फोडणीस टाकून त्यात चवीप्रमाणे मीठ, तिखट, गूळ आणि आमसुले घालावीत.
- राहिलेले धने आणि खोबरे वाटून त्या पाण्यात घालावे.
- पाण्याला उकळी आल्यावर तयार करून घेतलेले गोळे त्यात सोडून आणखी उकळी आणावी.
- उकळल्यानंतर, फार पातळ वाटल्यास, एक-दोन चमचे डाळीचे पीठ घालावे आणि वरून बारीक चिरलेली कोथिंबीर घालावी.
हेही वाचा – Recipe : असा लज्जतदार पुलाव करून पाहा…
टीप
- आवडत असल्यास या सांबारात कांदा बारीक चिरून आणि लसूण तेलावर तांबूस परतून घालावा.
गोळ्यांची आमटी
साहित्य
- चण्याचे पीठ – एक वाटी
- चण्याची डाळ – दोन चमचे
- सुक्या लाल मिरच्या – दोन ते तीन
- लसणाच्या पाकळ्या – पाच ते सहा
- गोडा मसाला – दोन चमचे
- सुक्या खोबऱ्याचा किस – अर्धी वाटी
- कांदे – दोन मोठे
- आले – एक इंच तुकडा
- मीठ – चवीनुसार
- हळद – दोन चमचे
- गोडा मसाला – एक चमचा
- फोडणीचे साहित्य
- धणे पूड – दोन चमचे
- जिरे पूड – एक चमचा
- दाण्याचे कूट – अर्धी वाटी (जाडसर)
- कोथिंबीर – अर्धी वाटी (बारीक चिरलेली)
कृती
- चण्याच्या पिठात थोडे तिखट, मीठ, दाण्याचे कूट, धणे-जिरे पूड आणि पाणी घालून पीठ घट्ट भिजवावे आणि त्याच्या शेंगाच्या दाण्याएवढ्या गोळ्या कराव्या.
- तव्यावर तेल घालून त्यात एक बारीक चिरलेला कांदा, चण्याची डाळ आणि खोबऱ्याचा किस हे जिन्नस तांबूस परतून घ्यावेत.
- नंतर हे परतलेले जिन्नस, गोडा मसाला, मिरच्या, लसणाच्या पाकळ्या तसेच आले आणि चवीप्रमाणे मीठ एकत्र करून, अगदी बारीक वाटून गोळा तयार करावा.
- नंतर एका पातेल्यात फोडणी करून त्यात एक भाजलेल्या कांद्याच्या फोडी करून घालावा.
- आपल्याला सांबार दाट अगर पातळ पाहिजे असेल, त्या प्रमाणात पाणी घालावे.
- उकळी आल्यावर त्यात तयार केलेल्या गोळ्या सोडाव्यात.
- पुन्हा चांगली उकळी आल्यावर वाटून घेतलेल्या मसाल्याचा गोळा घालून पुन्हा उकळी आणावी.
- आमटी शिजल्यानंतर खाली उतरवून कोथिंबीर घालावी.
- हे सांबार शक्यतो गरमगरम वाढण्यास घ्यावे.
हेही वाचा – Recipe : लज्जतदार दणगेले / हांडवो
टीप
- हवे असल्यास या सांबारात चवीकरिता आमसूल आणि थोडा गूळही घालावयास हरकत नाही.
