रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. मटकीचे सूप, व्हेज पुलाव, कडधान्याची उसळ, सांबार भात बनविताना या टिप्स वापरून पाहा.
- उन्हाळ्याच्या दिवसांत लिंबे खूप महाग मिळतात, तरीही आमटी-भातावर तूप, मीठ, लिंबाचा ताजा रसाळ रस स्वादाकरिता लागतोच. तेव्हा हा प्रयोग करून बघा. घरात लिंबू जर नसेल, तर आमटी उकळतानाच लेमन इसेन्सचे चार ते पाच थेंब आमटीत टाका आणि अनुभवा लिंबाचा नैसर्गिक ताजा स्वाद.
- सकाळची किंवा रात्रीची आमटी किंवा सांबार उरले असेल तर त्यातच भात शिजत टाकावा. या भाताला वेगळ्या प्रकारची चव येते. आमटी आणि सांबार वाया जात नाही. हा भात वेगळ्या चवीमुळे सगळ्यांना आवडतो.
हेही वाचा – Kitchen Tips : शिळ्या भाताचा पुलाव, छोले भटुरे, वाटली डाळ करताना…
- मटकी किंवा चवळीची उसळ शिल्लक राहिल्यास फ्रीजमध्ये झाकण लावून ठेवावी. दुसऱ्या दिवशी त्यात थोडे टोमॅटो चिरून घाला. थोडा नारळ खवून किंवा कोरडे खोबरे किसून घाला. मिक्सरमध्ये चांगले घुसळा. थोडे पाणी घालून परत घुसळून गाळा. सुंदर चविष्ट सूप होते. पौष्टिक असते. उसळही वाया जात नाही, पटकन तयार होते.
- कडवे वाल रात्री पाण्यात भिजत घालून ते दुसऱ्या दिवशी (फडक्यात न बांधता) एखाद्या कुंडीत पसरावेत. त्यावर थोडी माती टाकावी म्हणजे लवकर मोड येतील. नंतर बारीक पाने आली की सर्व काढून सोलावेत. (पटकन सोलून होतात.) पान फुटलेल्या बिरड्यांची (वालाची) भाजी करावी. ती जास्त पौष्टिक होते.
- मोड आलेल्या मटकीस वास येत असेल तर मीठ चोळून धुतल्यास वास निघून जातो.
हेही वाचा – Kitchen Tips : बिटाचे कटलेट आणि परोठे, भरली वांगी करताना…
- केशर महाग असते. व्हेजिटेबल पुलाव करताना, तो शिजताना त्यात गाजर किसून टाकल्यास पुलावास केशरासारखा रंग येतो.
- कोणतेही कडधान्य शिजवताना थोड्याशा तेलात परतून घेऊन कुकरमध्ये शिजवणे आणि नंतर नेहमीप्रमाणे फोडणी देऊन उसळ किंवा आमटी करणे. यामुळे कडधान्ये लवकर शिजतात आणि चवदार होतात. (कुकरची एक शिटी होऊ देणे)
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
