बेरोजगारी, कामधंदा न मिळणे हा प्रकार सगळ्याच देशांमध्ये कमीजास्त प्रमाणात असतोच. परिणामी कमीजास्त प्रमाणात चोऱ्यामाऱ्या होणे, हे पण ओघाने येतेच. परदेशामधली एक घटना आहे… ती याच संदर्भातली आहे. हे प्रकरण कोर्टापर्यंत गेले आणि कोर्टाने याबाबत दिलेला निर्णय काय होता, हे आपण पाहूया.
एका माणूस रोजगाराच्या शोधात होता. दोन दिवस त्याला काहीही काम मिळाले नाही, त्यामुळे ते दोन दिवस त्यानी उपाशी राहून कसेबसे काढले. काहीतरी काम मिळेल आणि पोटाला काही खायला मिळेल, या आशेवर तिसरा दिवस उजाडला. तिसऱ्या दिवशी पण काम मिळाले नाही आणि दोन दिवस पोटात अन्नाचा कण नाही, शेवटी अनावर होऊन त्याने एका दुकानामधून ब्रेड चोरला आणि भूक थोडी शांत केली. दुकानदाराने त्याला पकडले आणि पोलिसांच्या हवाली केले…
हेही वाचा – आनंदी जगायला काय लागतं?
कोर्टामध्ये केस उभी राहिली. सुनावणीच्या वेळी काही मंडळी तिथे उपस्थित होते. लिपिकाने केसची माहिती कोर्टाला वाचून दाखवली.
जज् : (आरोपीला) तू ब्रेडची चोरी केली, हे खरे आहे का? आणि केली असेल तर का केली? चोरी करणे हा गुन्हा आहे, हे तुला माहीत आहे ना?
माणसाने चोरी केल्याचे कबुल केले… चोरी करणे हा गुन्हा आहे, हे माहीत असल्याचे पण कबूल केले आणि चोरी का करावी लागली, ते कारणही त्याने सांगितले. त्याचे बोलणे ऐकून कोर्टात उपस्थित सगळ्यांनीच हळहळ व्यक्त केली. या वेळेस आरोपीचा हा गुन्हा माफ करावा, अशी विनंती त्याच्या वकिलाने कोर्टाला केली. सगळ्यांचे म्हणणे ऐकून घेतल्यानंतर जज साहेबांनी निर्णय जाहीर केला.
जज् : आरोपीने चोरी का केली, याचे कारण जरी पटण्यासारखे असले आणि चोरी तशी किरकोळच असली, तरी चोरी करणे हा कायद्याने गुन्हाच ठरतो आणि चोरी करणाऱ्याला शिक्षा ही असतेच. शिक्षेचे प्रयोजन अशाकरिता असते की, त्याने पुन्हा चोरी करू नये! ही जी चोरी केली आहे, त्याकरिता 10 डॉलर दंड भरणे, ही शिक्षा आरोपीला कोर्ट देत आहे.
निर्णय ऐकून सगळेच उपस्थित लोक हळहळ व्यक्त करतात.
जज् : अजून निर्णयाचे काम संपलेले नाही. आरोपी हा दंड भरू शकत नाही, याची कोर्टाला निश्चितच कल्पना आहे. म्हणून, 10 डॉलर ही दंडाची रक्कम मी आरोपीच्या वतीने कोर्टाकडे भरत आहे. असे म्हणून जजने खिशामधून 10 डॉलर नोट काढून बाजूला बसलेल्या लिपिकाकडे दिली.
सगळ्यांच्या चेहेऱ्यावर समाधान उमटले.
जज् : निर्णयाचा पुढचा भाग – आपल्या देशात पोट भरण्याकरिता माणसाला काम मिळू शकत नाही, याकरिता आपण सगळेच अप्रत्यक्षरीत्या जबाबदार आहोत आणि शिक्षेला पात्र आहोत. म्हणून कोर्ट इथे हजर असलेल्या सगळ्यांना 10 डॉलर दंड करत आहे. सगळ्यांनी दंडाची रक्कम सरकारी लिपिकाकडे जमा करायची आहे आणि मगच बाहेर पडायचे आहे.
हेही वाचा – फोनवर पुणेरी उत्तरे…
सगळ्यांनीच आनंदाने 10-10 डॉलर जमा केले. दोन मिनिटांत 200 डॉलर जमा झाले.
जज् : हे 200 डॉलर मिस्टर क्ष याला (चोरी करणाऱ्या व्यक्तीला) कोर्ट देत आहे. त्यांनी छोटा-मोठा उद्योग सुरू करावा आणि मेहेनत करून आपली रोजीरोटी कमवावी. इथे कोर्टाचे या केसचे कामकाज संपते आहे.
मिस्टर क्षने खाली मान वाकवून जज् साहेबांचे आणि उपस्थितांचे आभार मानले. सगळेजण जज्ज साहेबांना धन्यवाद देत आणि त्यांचे कौतुक करत बाहेर पडले.
