स्वयंपाक बनवताना महिला आहे ती सामग्री वापरून पदार्थात काहीतरी वेगळेपण आणण्याचा प्रयत्न करतात. यासाठी काही क्लृप्ती लढविल्या जातात. ‘फूड कॉर्नर’मध्ये लाल भोपळ्याचे रायते, कोफ्ता करी, आलू मटार, पीठ पेरून भाजी करताना या टिप्स वापरून पाहा.
- पीठ पेरून करावयाच्या भाजीबरोबर हरभरा डाळीचे पीठ प्रथम तेलावर चांगले भाजून घ्या. चार चमचे पिठासाठी दोन चमचे तेल, तूप पुरे. पीठ तुपामध्ये भिजलेले दिसले पाहिजे. भाजी धुऊन, चिरून आणि कुकरमध्ये शिजवून घ्या. फोडणीला कमी तेल लागेल. जिरे, मोहरी, बुडण्यापुरते अर्धा चमचा तेल पुरे. फोडणीमध्ये चिरलेला कांदा, लसूण घालून चांगले परता. नतंर शिजवलेली भाजी आणि भाजलेले पीठ, मीठ, मसाला, तिखट, हळद मिसळून परता. भाजी मोकळी होईल.
- टोमॅटो प्युरी करताना नेहमी टोमॅटो पाण्यात शिजवून त्याचे साल काढून नंतर पुरणयंत्रात किंवा मिक्सरमधून रस काढतो. त्याऐवजी टोमॅटोचे वरचे टोक जरासे कापावे आणि देठाकडील भाग हातात धरून टोमॅटो किसावा. साल तसेच बिया वर राहतात आणि गर केवळ खाली पडतो. तो भाजीत (पनीर मटर, राजमा किंवा मटण, चिकन) सरळ घालू शकतो. त्यामुळे वेळ तर खूपच वाचतो; गॅसही वाचतो.
हेही वाचा – Kitchen Tips : कोबीचे रायते, कांद्याची कोशिंबीर अन् टोमॅटोचे सूप तयार करताना…
- लाल भोपळ्याचे रायते करताना भोपळा जर चिरून कुकरमध्ये लावला तर जास्त शिजतो. नंतर दही घालून कालवताना फोडी फुटून त्याचा लगदा होतो. त्याऐवजी जर भोपळ्याच्या बेताच्या आकाराच्या फोडी करून, त्या थोड्या तुपावर पातेल्यात टाकून थोड्या परतून घेतल्या आणि वर झाकण ठेवले तर, त्या थोड्या वेळात बेताच्या शिजतात.
- आलू-मटरचा रस्सा करताना पिकलेले लाल टोमॅटो चिरून घेऊन मिक्सरमधून काढून घ्यावेत. फोडणी केल्यावर त्यात हा टोमॅटोचा गर टाकून चांगले परतावे. नंतर नेहमीप्रमाणे आपल्या आवडीचा सर्व मसाला घालून आलू-मटार टाकून रस्सा करावा. यामुळे रस्सा चांगला दाट होतो. टोमॅटोमुळे रंगही छान येतो आणि चवही चांगली लागते.
हेही वाचा – Kitchen Tips : खमण ढोकळा, डोसा, ऑम्लेट बनवताना या टिप्स वापरून पाहा
- बटाट्याची भाजी कधी कधी फारच तेलकट होते. त्या वेळी थोडेसे डाळीचे पीठ लावावे, म्हणजे तेल कमी होते आणि भाजीही चांगली होते. बटाटे शिजताना त्यात थोडे मीठ घालावे म्हणजे बटाटे फुटत नाहीत.
- गाजर, मुळा, कोबी, बटाटा, दुधी, लाल भोपळा यांची कोफ्ता करी करावयाची असल्यास त्यांचा कीस करून तो कीस गाळणीत घालून चांगला पिळून घ्यावा. मग त्यात बाइंडर म्हणून थोडे कॉर्नफ्लोअर आणि थोडे बेसन मिसळून आवश्यक तो मालमसाला घालून कोफ्ते तळावेत. ग्रेव्ही करून त्यात सोडावेत. वरील पद्धतीने कोफ्ते चांगले होतात. बाइंडर थोडेच घालावे लागते. पिळून काढलेला रस ग्रेव्हीमध्ये घालता येतो.
