मंदार अनंत पाटील
आई लंडनला असताना गणेशोत्सव मोठ्या उत्साहात साजरा झाला होता. 7 सप्टेबर 2024ला लाडक्या गणरायाचे वाजतगाजत आणि मंगलमय वातावरणात आगमन झाले. यथासांग प्रतिष्ठापनेचे सर्व विधी पार पडले. पल्लवीने रात्रभर जागून हरितालिकेची उपासना, पूजेची तयारी आणि सोबतच प्रसादाचे नियोजन करून ठेवले होते. तसेच युट्युबवरून फडके गुरुजींची पूजाही डाऊनलोड करून ठेवली होती. पूजेची सगळी तयारी आधीपासूनच होती. त्यामुळे कुठेही अडचण आली नाही.
आईला लंडनमधील सार्वजनिक गणपती दाखवायला घेऊन गेलो. तिथे तर मुंबईसारखे ढोल-ताशे आणि मिरवणूक बघून आईचा विश्वास बसला की, भारताबाहेरही तितक्याच दणक्यात सगळे सणं साजरे होतात. बघता-बघता गणपती विसर्जनाचा दिवस आला. संध्याकाळी उत्तरपूजा करून ‘पुढच्या वर्षी लवकर या’च्या घोषात गणरायाला निरोप दिला आणि रिकाम्या पाटासह परत आलो.
या वर्षी अधिक महिना असल्याने गणपतीचे विसर्जन झाल्यावर लगेच पितृपक्ष सुरू झाला. पल्लवी दरवर्षी न चुकता माझ्या दिवंगत बाबांची आठवण म्हणून कागावळ (कागवास) ठेवते. यावर्षी आई लंडनमध्येच असल्यामुळे आणखी सखोल माहिती घेऊन तिने बाबांच्या आवडीचे पदार्थ बनविले.
हेही वाचा – आईबरोबरचा लंडनमधला पहिला गणेशोत्सव
आई आणि पल्लवी आता नवरात्रीच्या तयारीला लागल्या. मी फक्त घरात साफसफाई आणि थोडेफार डेकोरेशन करून माझे अंग काढून घेतले. पल्लवीने पुन्हा एकदा पदर खोचून सगळी तयारी केली. आई देखील कलाकुसर करण्यात गढून गेली. सुरेख रांगोळी काढून त्यावर हत्तीच्या आकाराचे आसन ठेऊन त्यावर घटस्थापना केली. मी आधीच देवीचा मुखवटा आणि काही किरकोळ सामान आणून ठेवले होते. डेकोरेशनही वेळत पूर्ण केले. नवरात्रीची सुरुवात झोकात झाली. पल्लवीने रोज पिठाचे दिवे करून आरती केली. तर, आईने नऊ दिवसांकरिता मण्यांच्या नऊ माळा तयार करून ठेवल्या. पण हे सगळे करत असताना आता आईला भारतात परतीचे वेधही लागले. आई 18 जुले 2024 रोजी लंडनला आली होती. आता 18 ऑक्टोबर 2024ला आई आणि पल्लवी दोघीही भारतात जाणार होत्या. पल्लवी दिवाळी आणि वाढदिवस साजरा करायला जात होती. आई तीन महिन्यांच्या आठवणींची शिदोरी घेऊन मोठ्या लेकाकडे जाणार होती.
आई तब्बल 18 वर्षांनी लंडनला आली होती. तिच्यासाठी आधी लंडनदर्शनाच्या नियोजनाची लगबग सुरू हती. त्यानुसार स्वामी नारायण मंदिर, बकिंगहॅम पॅलेस, रॉयल म्युझियम, ग्रीन पार्क, लंडन आय, लंडन एक्वेरियम, लंडन ब्रीज, मेडनहेड मत्स्यालय… अशा अनेक स्थळांना भेटी दिल्या. आई येताना जिवतीचा कागद घेऊन आली होती. सोबत सत्यनारायणाची पूजा-पोथीही आणली होती. आपल्याकडे पहिल्यांदाच श्रावणातील व्रतवैकल्याबरोबरच पूजा होणार म्हणून मी आणि पल्लवी खूप आनंदीत झालो होतो. श्रावणातील सणवार आणि सत्यनारायणाची पूजा यथावकाश आणि साग्रसंगीत पार पडले… अशा आठवणींची शिदोरी पल्लवी आणि माझ्याकडे होतीच की!
हेही वाचा – गणेशोत्सवाचा उत्साह अन् वन-डे ट्रिप
