Recipe : असा सुरती उंधियू करून पाहिला आहे का?

कामिनी व्यवहारे

उंधियूचे साहित्य

• कोवळी सुरती पापडी – पाऊण किलो
• कंद किंवा कोनफळ – एक मध्यम आकाराचा
• रताळी – 3 ते 4 मध्यम आकाराची
• लहान जांभळी वांगी – 10 ते 12
• अगदी लहान बटाटे – 10 ते 12
• तुरीचे कोवळे दाणे – अर्धी वाटी
• मटार – अर्धी वाटी
• हरभऱ्याचे कोवळे दाणे – अर्धी वाटी
• कच्ची केळी – 2 ते 3
• एकत्र किसलेली आंबेहळद आणि साधी हळद – अर्धी वाटी
• मेथी – 2 वाट्या बारीक चिरलेली
• धणे पावडर – 2 टेबलस्पून
• जिरे पावडर – 2 टेबलस्पून
• तिखट – 2 टीस्पून
• मीठ – चवीनुसार
• दोन लिंबांचा रस
• तेल – एक ते दीड वाटी

मेथी मुठियाचे साहित्य

• मेथी – 1 मोठी जुडी
• धणे पावडर – 2 टीस्पून
• जिरे पावडर – 2 टीस्पून
• लाल तिखट – 2 टीस्पून
• हळद – पाव टीस्पून
• मीठ – चवीनुसार
• साखर – 1 टीस्पून
• हिंग – चिमूटभर
• डाळीचे पीठ – 2 वाट्या
• तेल – तळणासाठी

वाटण मसाला साहित्य

• ओला लसूण पात – 1 मोठी जुडी
• कोथिंबीर – 1 मोठी जुडी
• आले – 2 इंच
• हिरव्या मिरच्या – 8 ते 10 (कमी तिखट)
• दोन मोठ्या लिंबांचा रस
• नारळ – 1 खोवलेला
• साखर – 3-4 टीस्पून

मेथी मुठियांची कृती

1. मेथी धुऊन बारीक चिरून घ्या.
2. त्यात सगळे मसाले घाला. सगळं नीट मिसळून थोडा वेळ तसंच ठेवा.
3. नंतर त्यात डाळीचे पीठ घालून घट्ट भिजवा. डाळीचे पीठ जरी दोन वाट्या लिहिले असले तरी भाजीच्या मिश्रणात बसेल, या प्रमाणात पीठ कमी-जास्त करा.
4. हातानं बोरापेक्षा थोडे मोठे लांबट आकाराचे मुठिये करून घ्या.
5. कडकडीत तेलात लाल रंगावर तळा आणि बाजूला ठेवा.
6. मुठियांमध्ये पीठ कमी आणि मेथी भरपूर दिसायला हवी.

वाटण मसाला कृती

1. मसाल्यासाठीचं सगळं साहित्य मिक्सरमध्ये घालून एकजीव वाटून घ्या. मसाला फारवेळ फिरवून वाटू नका, नाहीतर तो काळपट रंगाचा होतो. मसाला हिरवागार दिसायला हवा. म्हणून वाटतानाच लिंबाचा रस घाला म्हणजे रंग छान येईल.

उंधियूची कृती

1. कोवळ्या सुरती पापडीच्या शिरा काढून दोन भाग करा. तसेच कंद किंवा कोनफळाचे चौकोनी मोठे तुकडे करा.
2. रतळी सोलून मोठे तुकडे करा. भरली वांगी आणि भरले बटाटे करतो त्या प्रमाणे वांगी आणि बटाट्याला उभ्या चिरा द्या. कच्च्या केळ्यांचेही सालासकट मोठे तुकडे करा.
3. एका मोठ्या आकाराच्या भांड्यात तेल गरम करा.
4. तेल गरम झाले की, त्यात किसलेली हळद घाला. जरासं परतून त्यात सुरती पापडी घाला. पुन्हा नीट परतून घ्या आणि झाकण घालून मध्यम आचेवर ठेवा. मधूनमधून परतत पापडी चांगली शिजू द्या.
5. पापडीला चांगली वाफ आली की, त्यात कच्च्या केळ्याचे तुकडे, कंद आणि रताळ्याचे तुकडे घाला. परत झाकण ठेवून पाच मिनिटे एक वाफ येऊ द्या.
6. नंतर त्यात बटाटे आणि वांगी घालून नीट मिसळून घ्या.
7. आता त्यात तिखट, मीठ, धणे-जिरे पावडर घाला आणि छान परतून घ्या.
8. लगेचच तुरीचे मटारचे आणि हरभऱ्याचे दाणे घाला. परत झाकण ठेवून 2 ते 3 मिनिटे वाफ येऊ द्या.
9. नंतर त्यात वाटलेला मसाला आणि लिंबाचा रस घाला. चव बघून हवी असल्यास अजून साखर घाला. उधियू आंबट, गोड, तिखट असायला हवा.
10. सगळं नीट एकत्र करून घ्या आणि दोन मिनिटे शिजू द्या.
11. आता त्यात चार फुलपात्र पाणी घाला आणि नीट ढवळून घ्या. पाण्याचे प्रमाण आपल्याला हवे तसे कमी जास्त करा. पाणी जरा जास्त असेल तर उधियू कोरडा न होता ओलसर होतो आणि चांगला लागतो.
12. नंतर त्यात मेथी घालून परत ढवळून घ्या.
13. सर्वात शेवटी वर मेथी मुठिये घाला.
14. गॅस मध्यम आचेवर ठेऊन सर्व जिन्नस चांगले शिजू द्या.

एकूण कालावधी – एक तास

टिप्स

• मेथीचे मुठिये आदल्या दिवशी करून ठेवले तरी चालतील.
• मेथीचे मुठिये करायचे नसतील तर फरसाणाच्या दुकानात तयार मिळतात ते वापरू शकता.

---

तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.

avaantar.recipe@gmail.com

या ईमेलवर किंवा

9869975883 या व्हॉट्सॲप क्रमांकावर

तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.