सुधीर करंदीकर
आपण सगळेच जण निरनिराळ्या ठिकाणी पैसे इन्व्हेस्ट करत असतो, त्यावर कुठे 7 टक्के व्याज मिळते, कुठे 5 टक्के, काही ठिकाणी जास्तीत जास्त म्हणजे 10 टक्के, हे आपण जाणतोच… आणि जास्तीत जास्त व्याज कुठे मिळेल याकडे आपली कायम नजर असते. मला चक्क एका ठिकाणी पाच रुपये देऊन त्याबद्दल पाचशे रुपये मिळाले आणि ते पण फक्त पंधरा दिवसांमध्ये! आता ते किती टक्के झाले, हे तुम्हीच सांगा.
जुनी गोष्ट आहे… मी एकदा बावधनला ट्रॅफिकचा रस्ता क्रॉस करण्याकरिता एका म्हशीची मदत घेतली आणि म्हशीबरोबर अगदी आरामात रस्ता क्रॉस केला आणि त्याकरिता म्हशीच्या मालकाला 5 रुपये दिले… एकदमच वेगळी घटना म्हणून या घटनेवरती मी ‘म्हैस’ हा लेख लिहिला आणि लेख मित्रमंडळींना पाठवला. एका मित्राचा फोन आला की, “लेख खूपच छान आहे, तू ‘लोकसत्ता’ला पाठव म्हणजे तो खूप लोकांपर्यंत पोहोचेल…”
हेही वाचा – अगं अगं म्हशी… सगळ्यात इनोव्हेटिव्ह कल्पना!
मित्र हे पण म्हणाला की, “लेख पाठवल्यानंतर त्यांच्याकडून ‘लेख मिळाला’ असं उत्तर येईल किंवा उत्तर येणार पण नाही, तसेच लेख छापून येईल किंवा येणार पण नाही. कारण त्यांच्याकडे भरपूर लेखांची आवक जावक असणार. आपण पाठवून बघायचं!”
मी लगेचच लोकसत्ताचा ई-मेल ॲड्रेस शोधला आणि त्यांच्या ऑफिसला लेख पाठवला आणि चक्क तिसऱ्या दिवशी मला लोकसत्ता ऑफिसमधून फोन आला – ‘म्हैस लेख छानच आहे आणि आम्ही येत्या शनिवारच्या चतुरंगमध्ये तो छापत आहोत’… आणि लेख छापून आला.
हेही वाचा – फोनवर पुणेरी उत्तरे…
खूप ओळखीच्या आणि अनोळखी लोकांचे छान छान अभिप्राय कळवणारे मेसेजेस आले / फोन आले. मजा आली.. आणि त्याच आठवड्यात लोकसत्ताकडून मला म्हैस लेखाबद्दल ५०० रुपयांचे मानधन मिळाले!
थोडक्यात म्हणजे, ट्रॅफिकचा रस्ता क्रॉस करण्याकरता म्हशीबरोबरच्या मुलाला मी पाच रुपये दिले, तो अनुभव कागदावर उतरवून मी तो लोकसत्ताकडे पाठवला आणि लोकसत्ताने मला त्याबद्दल पाचशे रुपये दिले… अशा रीतीने पाच रुपये इन्व्हेस्ट केले आणि त्यांचे मला पाचशे रुपये मिळाले, आणि ते पण फक्त पंधरा दिवसांमध्ये…!
आहे की नाही मस्त इन्व्हेस्टमेंट!
मोबाइल – 9225631100
विचार, साहित्य, कला आणि संस्कृतीच्या सर्जनशीलतेला समर्पित असलेल्या avaantar.com/ या वेबपोर्टलवरील वैविध्यपूर्ण वाचनीय लेखाचा आनंद घ्यायचा असेल तर,
IXZVpuvKFwKH6gb0NBN51t?mode=r_c
या लिंकला क्लिक करून WhatsApp group जॉइन करा.
