Recipe : मलई कोफ्ता आणि शिंगाड्याची भजी…

कोफ्तासाठी साहित्य

• पनीर – अर्धी वाटी
• मैदा – 8 चमचे
• बेकिंग पावडर – 1 छोटा चमचा
• हिरव्या मिरच्या – 4
• कोथिंबीर – बारीक चिरलेली मूठभर
• मीठ – चवीनुसार
• तूप – तळणासाठी

सारासाठी मसाला साहित्य

• मोठा कांदा – एक
• ओले खोबरे – अर्धी वाटी
• लसूण – 7-8 पाकळ्या
• हिरव्या मिरच्या – 2
• लाल सुक्या मिरच्या – 2
• धणे – 2 चमचे
• जिरे – 1 चमचा
• दालचिनी – 2 (बोटभर लांब कांड्या)
• चारोळी – 5 टीस्पून (ऐच्छिक)
• खसखस – 2 चमचे
• आले – 1 इंच
• कोथिंबीर – बारीक चिरलेली मूठभर
• टोमॅटो – 3

हेही वाचा – Recipe : लज्जतदार दणगेले / हांडवो

कृती

1. पनीर, मैदा, बेकिंग पावडर, चिरून घेतलेल्या मिरच्या, चिरलेली कोथिंबीर आणि चवीप्रमाणे मीठ घालून मिसळावे आणि चांगले मळावे.
2. या मिश्रणाचे बोराएवढे गोळे तयार करून बदामी रंगावर तळून घ्यावेत.
3. हे तुमचे कोफ्ते तयार झाले.
4. लसूण, कांदा आणि टोमॅटो चिरून, चार वाट्या पाणी घालून शिजवावेत.
5. नंतर हे मिश्रण मिक्सरमधून बारीक करून घ्या.
6. मसाल्याचे सर्व जिन्नस एकत्र करून, वाटून गोळी करावी.
7. पातेल्यात तूप घालून तापल्यावर मसाल्याची गोळी घालून परतून घ्यावी.
8. त्यावर लाल तिखट घालून पुन्हा परतावे आणि त्यात टोमॅटो-कांद्याचे मिश्रण आणि पाणी घालून उकळी आणावी. आवडत असल्यास उकळत असताना दोन चमचे क्रीम किंवा लोणी घालावे. चवीप्रमाणे मीठ घालावे.
9. या सारामध्ये तळून ठेवलेले कोफ्ते सोडावेत.

टिप्स

• पाहिजे असल्यास वाफवलेले एक वाटी मटाराचे दाणे सार बनविताना घालावेत.

हेही वाचा – Recipe : बटाट्याचा बदामी हलवा

---

शिंगाड्याची भजी

साहित्य

• शिंगाड्याचे पीठ – 1 वाटी
• जिरे पावडर – 1 टीस्पून
• मीठ – चवीनुसार
• हिरव्या मिरच्या – 3
• कोथिंबीर – अर्धी वाटी (बारीक चिरलेली)
• दाण्यांचे कूट – अर्धी वाटी
• सोडा – चिमटीभर
• तूप – तळण्याकरिता
• ताक – पाव वाटी

कृती

1. शिंगाड्याच्या पिठात दाण्याचे कूट आणि जिऱ्याची पावडर घालावी.
2. चवीप्रमाणे मीठ आणि मिरच्या वाटून त्यात घालाव्या. बारीक चिरलेली कोथिंबीरही घालावी.
3. तसेच ताक, चिमटीभर सोडा आणि गरम तुपाचे मोहन दोन चमचे घालावे.
4. भज्याच्या पिठाप्रमाणे हे पीठ भिजवून, तुपामध्ये भजी तळून काढावीत.

टिप्स

• हवे असल्यास या भज्यांत बटाट्याचे अगर केळ्याचे कापही घालावेत.
• शिंगाड्याच्या पिठाच्या भज्याप्रमाणेच केळ्याच्या पिठाचीही भजी करावीत. इतर साहित्य व कृती वरीलप्रमाणेच.

(‘रुचिरा’ पुस्तकातून साभार)

---

तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.

avaantar.recipe@gmail.com

या ईमेलवर किंवा

9869975883 या व्हॉट्सॲप क्रमांकावर

तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.