नमस्कार, मी अभिनेत्री हर्षा गुप्ते पुन्हा एकदा तुमच्या भेटीला.
तशी मी लढाऊ प्रवृत्तीची बाई. आयुष्यात आलेली वाईट परिस्थिती म्हणा किंवा अजून काही… दोन हात करून लढून पुढे जात राहिले. पण एका गोष्टीत मला कधीच लढता आलं नाही… इमोशनशी (Emotion) म्हणजेच भावनांशी. बरेचदा मला ‘इमोशनल फुल्ल’ म्हटलं गेलंय. म्हणजे कसं आहे ना, मी कथा-कादंबऱ्या वाचताना भावनाप्रधान कथानक आलं की, मला रडू येतं. लहान असताना आकाशवाणीवर होणाऱ्या श्रुतिका ऐकताना पण मी रडायचे. नाटक पाहताना, सिनेमा पाहताना पण गंगा, यमुना हव्यातच! त्यामुळे झालं असं की, “ए, ही रडूबाई नको आपल्या सोबत…” असं ऐकायला मिळतं.
एक वेळ अशी आली की, नवराही म्हणाला, “आता तुला थिएटरमध्ये सिनेमा बघायला नेणार नाही. लोक बघत राहतात. मला लोकांची भीती वाटते. उगाच मी काहीतरी केलं समजून मला मारायचे!” झालं थिएटरचा संबंध संपला…
हेही वाचा – …अन् कुटुंबप्रेमाला आसुसलेल्या बबलीची कळी खुलली!
एकदा घरात सीरियल बघत होते. सावत्र आई तरुण हीरोवर खूप अत्याचार, दादागिरी करत असते. त्याने तिचं ऐकावं म्हणून त्याला खूप मारते काठीने… आणि ते सगळं बघत मी रडत होते. तेवढ्यात माझा मुलगा आला. त्याने एकंदरीत आढावा घेतला. माझ्या शेजारी बसून मला समजवायला सुरुवात केली. “आई, अगं ती सीरियल आहे. नाट्य आहे. खोटं असतं सगळं… आणि माते त्या टीव्ही सीरियलमधल्या बिचाऱ्या हीरोवर अत्याचार करतेय ती जी बाई आहे ना, ती तू आहेस! तूच तो रोल करतेयस आणि टीव्ही बघताना रडतेयस कसली?” झालं हसावं की रडावं, काही सुचेना आणि अजून रडायला लागले…
हेही वाचा – आठवणींचा जागर…
माझी मुले सगळ्यांना सांगतात की, “आई तर ‘सिंग इज किंग’ बघताना सुद्धा रडते!”
पण मला असे चिडवणारा माझा मुलगा मात्र सिद्धार्थ जाधवचे कोणतेही काम पाहताना नेहमीच हळवा व्हायचा. सिद्धू जरा जरी रडवेला झाला की, याला नेहमीच वाईट वाटून रडवेला व्हायचा. कारण, मात्र त्याला कधीच कळायचं नाही. नेमका मला एक सिनेमा ऑफर झाला, ‘माणूस एक माती’. त्या सिनेमामध्ये सिद्धार्थ जाधव माझा मुलगा झाला होता. आता हे दोघे रिअल नसले तरी, रिल भाऊ झालेच की… एका भावाला दुःख झालं की, त्याचं दुसऱ्याला वाईट वाटणारच नं! तर, हे असं त्रांगड आहे, नात्याचं आणि भावभावनांचं.
विचार, साहित्य, कला आणि संस्कृतीच्या सर्जनशीलतेला समर्पित असलेल्या avaantar.com या वेबपोर्टलवरील वैविध्यपूर्ण वाचनीय लेखाचा आनंद घ्यायचा असेल तर,
IXZVpuvKFwKH6gb0NBN51t?mode=r_c
या लिंकला क्लिक करून WhatsApp group जॉइन करा.
