सुधीर करंदीकर
नुकताच म्हणजे 8 मार्चला जागतिक महिला दिन खूप उत्साहात आणि आनंदाने साजरा करण्यात आला. महिलांकडून खूप काही शिकण्यासारखे असते, त्यांचे खूप काही गुण घेण्यासारखे असतात, हे आपण सगळे जाणतोच आणि याचा आपण अनुभव पण घेत असतो (मी तरी नक्कीच घेत असतो). देवाने पण आई, बहीण, बायको, मुलगी, आजी, पणजी, आत्या, मावशी… हे सगळे छान छान रोल पण बायकांकडेच दिले आहेत!
बायकांचा एक आगळावेगळा आणि चांगला गुण म्हणजे – बायका एकत्र जमल्या की, मनमोकळेपणाने खुल्या दिलाने फूल व्हॉल्युममध्ये गप्पा मारणे आणि त्या पण जोरजोरात हसत हसत! यामुळे त्यांचं मन नेहमीच एकदम मोकळं आणि नितळ राहत आणि तब्येत एकदम मस्त असते.
परवा असंच मित्रांबरोबर या विषयावर गप्पा मारताना माझी एक जुनी आठवण ताजी झाली –
रिटायर झाल्यानंतर आम्ही दोघं मुलीकडे अमेरिकेला San Jose येथे गेलो होतो. अमेरिकेतली सगळी महत्त्वाची ठिकाणे बघण्याकरिता तिने आम्हाला संपूर्ण ट्रॅव्हलची बाय एअर – बाय रोड बुकिंग करून दिली होती. साईट सीईंगकरिता तिथल्या एजन्सीचे बुकिंग करून दिले होते. प्रत्येक ठिकाणी राहण्याकरिता हॉटेल बुकिंग करून दिली होते आणि बहुतेक ठिकाणी तिच्या ओळखीचे मित्र- मैत्रिणी होते, त्यांचे फोन नंबर दिले होते. या सगळ्यामुळे अमेरिकेसारखा अनोळखी देश आम्ही एकदम मजेत बघितला.
हेही वाचा – कानाला खडा… माझा व्हॅलेंटाइन डे!
एकेक ठिकाण बघत बघत आमचा प्रवास छान सुरू होता. एक महत्त्वाचे ठिकाण होते, नायगरा फॉल. जवळच्या एअरपोर्टपर्यंत आमचे विमानाचे बुकिंग होते आणि तिथून साईट सीईंग करणारी टुरिस्ट बस पकडायची होती… एअरपोर्टहून आम्ही टुरिस्ट बसच्या स्टार्टिंग पॉइंटला वेळेवर जाऊन पोहोचलो. भारतातून पुण्याची एक टुरिस्ट कंपनी लेडिज ग्रुप घेऊन तिथे आली होती. निरनिराळ्या देशातली पण काही स्त्री-पुरुष मंडळी आली होती. बरोबर वेळेत बस हजर झाली. दिलेल्या सीट नंबरप्रमाणे आम्ही सगळे बसमध्ये चढलो. तिथले लोकल गाईड पण जॉइन झाले आणि नायगरा फॉलकडे आमचा प्रवास सुरू झाला…
गाईडने सगळ्या प्रवाशांना कानाला लावायला ईअरफोन दिले आणि त्यांच्याकडेही ईयरफोन आणि माइक हे दोन्ही होते. गाईड जे माइकमध्ये जे बोलतील / ज्या सूचना देतील, ते सगळ्यांना (तुम्ही जवळपास कुठेही हिंडत फिरत असाल तरी) ऐकू येणार, अशी कम्युनिकेशनची व्यवस्था होती. काही अंतर अलीकडेच एका ठिकाणी बस थांबली. शॉर्ट ब्रेकमध्ये चहापाणी – कोल्ड्रिंग झाले. नंतर गाईडने थोडे प्रास्ताविक केले.
गाईड : मी तुम्हाला नायगरा फॉलविषयी सगळी माहिती इथेच सांगणार आहे. कारण, तिथे इतक्या उंचीवरून आणि इतक्या मोठ्या प्रमाणात पाणी खाली पडतं असते की, जवळून दोन-तीन जेट विमाने गेली, तरी फॉलच्या आवाजामुळे विमानांचा आवाज ऐकू येत नाही. गाईडने नायगरा फॉलची सगळी तपशीलवार माहिती सांगितली.
काही प्रश्नोत्तरे झाली आणि आमची बस नायगरा फॉलकडे निघालो… फॉल बघण्यासाठी आणि तो आवाज ऐकण्यासाठी आम्ही जास्तच उत्सुक होतो. तिथे पोहोचलो… नायगरा फॉलचे दृश्य एकदमच अप्रतिम आहे. मी व्हिडीओ काढत होतो, पण फॉलचा म्हणावा तेवढा मोठा आवाज येत नव्हता. तेवढ्यात काही परदेशी प्रवाशांनी गाईडला हाताने खुणा करून सुचवले की, तुम्ही म्हणता तसा फॉलचा आवाज ऐकू येत नाहीये. गाईडच्या पण हे लक्षात आले आणि त्यांची ट्युब पेटली.
त्याने कमरेला लावलेला माइक काढला आणि त्यावरून सगळ्यांचे लक्ष आपल्याकडे वेधले आणि अनाऊन्समेंट केली… गाईड चक्क तुटक – तुटक मराठीमध्ये बोलत ह़ोता…
हेही वाचा – फोनवर पुणेरी उत्तरे…
गाईड : मी सर्व भारतीय भगिनींना सौजन्यपूर्ण विनंती करतो की, आपण इथे आहोत, तोपर्यंत त्यांनी आपापसातील गप्पा आणि मोठमोठ्याने हसणे थांबवावे… आणि शांतता पाळावी. भारतीयांच्या भाषेत तुम्ही तोंडावर बोट ठेवावे, फक्त कान आणि डोळे पूर्ण उघडे ठेवून या स्थळाचा आनंद घ्यावा… आणि आपल्या सहकाऱ्यांना पण तो मनसोक्त घेऊ द्यावा!
गाईड काय बोलले हे परदेशी माणसांना समजले नाही, पण गाईडच्या बोलण्याचा अपेक्षित परिणाम झाला, हे समजले. फॉलचा खरा आवाज आता ऐकू यायला लागला… वॉटर फॉलचा आवाज ऐकून सगळ्यांनी जोरदार टाळ्या वाजवून आपला आनंद व्यक्त केला. सगळ्यांनी व्हिडीओ शूटिंग केले. दिलेली वेळ संपल्यानंतर गाईडने सगळ्यांना परत फिरण्याची खूण केली. सगळे बसजवळ जमा झालो. गाईडने अनाउन्समेंट केली – आता स्त्रियांनी तोंडावरचे बोट काढायला हरकत नाही…
मोबाइल – 9225631100
