आराधना जोशी
पुरवठा संख्या – 4 व्यक्तींसाठी
दूध मसाल्याचे साहित्य
- बदाम – अर्धी वाटी
- काजू – अर्धी वाटी
- पिस्ता – पाव वाटी
- हिरवी वेलची – 20 ते 25 (वेलची किती लहान किंवा मोठी आहे, त्यानुसार किती घ्यायची हे ठरवावे)
- केशर – 15 ते 20 काड्या
- किसलेले जायफळ – पाव टीस्पून
- हळद – 1 टेबलस्पून
- मिल्क पावडर – 2 टेबलस्पून (पूर्णपणे ऐच्छिक, वगळली तरी चालेल)
तयारीस लागणारा वेळ :
- बदाम, काजू, पिस्ता भाजायला – 5 ते 7 मिनिटे
- भाजलेले बदाम, काजू, पिस्ता थंड व्हायला – 30 मिनिटे
- वेलची सोलायला – 5 मिनिटे
- मसाला करायला – 2 मिनिटे
- एकूण कालावधी – अंदाजे 45 मिनिटे
हेही वाचा – Recipe : खानदेश स्पेशल… खुड मिरचीचे पाणी
कृती
- एका पॅनमध्ये मंद आचेवर बदाम, काजू आणि पिस्ता हलकासा रंग बदलेपर्यंत भाजून घ्या. भाजताना सगळ्या सामग्रीला व्यवस्थित आच लागली पाहिजे.
- नंतर गॅस बंद करून भाजलेले बदाम, काजू आणि पिस्ता पूर्णपणे थंड होऊ द्या.
- थंड झाल्यावर भाजलेले बदाम, काजू, पिस्ता, वेलची सोलून, केशराच्या काड्या, किसलेले जायफळ, हळद आणि मिल्क पावडर असे एकत्रितपणे मिक्सरमध्ये पल्स मोडवर फिरवून घ्या. हा मसाला थोडा भरडच ठेवावा.
- ही पावडर एका घट्ट झाकणाच्या काचेच्या बाटलीत भरून ठेवा. फ्रीजमध्ये 2 महिने हा मसाला छान टिकतो.
मसाला दूध साहित्य
- म्हशीचे दूध – 1 लीटर
- दूधाचा मसाला – 4 टेबलस्पून
- चारोळी – 1 टेबलस्पून (पूर्णपणे ऐच्छिक, वगळली तरी चालेल)
- साखर – 4 टेबलस्पून किंवा आवडीनुसार
- बदाम, काजू, पिस्ता – साधारणपणे प्रत्येकी 5 जाडसर तुकडे केलेले
- केशर – 4 ते 5 काड्या
- वाळलेल्या गुलाब पाकळ्या – 1 टेबलस्पून
तयारीस लागणारा वेळ – दूध गरम करून उकळी यायला – साधारणपणे 15 ते 20 मिनिटे
एकूण वेळ – साधारणपणे 2 तास (यात मसाला तयार करण्यापासूनचा वेळ गृहीत धरला आहे)
कृती
- जाड बुडाच्या पातेल्यात दूध घेऊन ते मध्यम ते मंद आचेवर उकळायला ठेवा. दूध अधून मधून ढवळत रहा.
- दूध चांगले उकळले की, त्यात 4 चमचे दुधाचा मसाला घाला. चारोळी वापरणार असाल तर ती घाला.
- मसाल्यात दुधाची पावडर असल्याने आता उकळायला ठेवलेल्या दुधाला दाटसरपणा येतो. आपल्याला दूध किती दाटसर हवे त्यानुसार दूध किती वेळ आटवायचे, यांचा अंदाज घ्या.
- नंतर आपल्या आवडीनुसार त्यात साखर घाला आणि आणखी एक उकळी येऊ द्या. नंतर गॅस बंद करा.
- मसाला दूध तयार आहे.
- कोजागरीच्या रात्री गरम, कोमट किंवा गार करून मसाला दुधाचा आस्वाद घ्या.
- सर्व्ह करताना ग्लासमध्ये मसाला दूध घालून वरून बदाम, काजूचे काप, एखादी केशराची काडी आणि आवडत असेल तर सुकवलेल्या गुलाब पाकळ्या चुरडून घाला.
हेही वाचा – Recipe : देवीसाठी त्रयोदशगुणी विडा (तांबूल)
विशेष आहार माहिती : शाकाहारी
टीप
- आवडत असल्यास मसाला करताना त्यात पाव टीस्पून काळी मिरी पावडर आणि 1 टीस्पून सुंठ पावडर घातली तर दुधाला आणखी वेगळा स्वाद येतो
- दुधाची पावडर वापरणे पूर्णपणे ऐच्छिक आहे. मसाला करताना ती वगळली तर दूध थोडे जास्त उकळवावे लागेल.
- दुधाला दाटपणा आणण्यासाठी दूध पावडरीऐवजी सहा ते आठ बदाम वेगळे भिजवून, त्यांची सालं काढून मग मिक्सरमधून गंधासारखे बारीक वाटून घ्यावे. नंतर ते आटवण्यासाठी गॅसवर ठेवलेल्या दुधात मिक्स करावे. मात्र हा उपाय करणार असाल तर दूध सतत ढवळत रहावे लागेल. अन्यथा बदामाची पेस्ट बुडाला चिकटण्याची शक्यता असते.
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता. मात्र, त्यासाठी तुम्हाला वरील फॉरमॅटमध्ये ही रेसिपी द्यावी लागेल.
या ईमेलवर तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
