प्राजक्ता अनंत काथे
(ज्योतिष शास्त्री आणि होरा मार्तंड)
मेष
या आठवड्यात सगळी कामे ठरल्याप्रमाणे पार पडतील. नोकरदारांना कामाचा ताण जाणवेल. कामे होणार नाहीत, वेळ वाया जाईल, म्हणून कोर्टाची कामे पुढे ढकला. व्यावसायिक वर्गाने अनावश्यक ठिकाणी पैसा तसेच वेळ घालवू नये. कामानिमित्त प्रवास कराल. महिला नवीन जबाबदारी स्वतःहून घेतील आणि उत्तम रीतीने पूर्ण करू शकतील. विद्यार्थ्यांचे मित्र-मैत्रिणींबरोबर वैचारिक वाद होण्याची शक्यता आहे.
वृषभ
या आठवड्यात अमावस्या तुम्हाला लाभदायक ठरेल. गुरूचा जप करत रहा. नोकरदारांना धनस्थानातील गुरूच्या प्रभावाने पगारवाढ आणि इतर मार्गांनी पैसा मिळेल. त्यामुळे गुंतवणूक करू शकाल. व्यावसायिक वर्गाने जमीन खरेदी-विक्री करताना सावधान राहावे. कागदपत्रे नीट तपासून घ्या. महिलांनी अमावस्येच्या दिवशी, 17 तारखेला नामस्मरण आणि दानधर्म करावे, मानसिक समाधान मिळेल. मित्रांना दिलेले उसने पैसे विद्यार्थ्यांना परत मिळतील.
मिथुन
या आठवड्यात अनावश्यक प्रवास टाळा. कोर्ट-कचेरीच्या कामातील प्रगतीमुळे मानसिक शांतता मिळेल. नोकरदारांची अडकलेली कामे मार्गी लागतील, नवीन उमेद निर्माण होईल. व्यावसायिक वर्गाला अमावस्या त्रासदायक ठरण्याची शक्यता आहे. महत्त्वाचे निर्णय घेऊ नका. महिलांच्या बाबतीत भावंडांत गैरसमज निर्माण होण्याची शक्यता आहे. विद्यार्थ्यांना प्रेमप्रकरणात यश मिळेल. पण खर्च जास्त होईल.
कर्क
चंद्र हा कर्क राशीचा स्वामी आहे. या आठवड्यात चंद्र बलहीन आहे म्हणून मानसिक चिंता आणि भय लागून राहील. नोकरदारांना अचानक धनलाभ होऊ शकतो. तज्ज्ञ लोकांचा सल्ला घेऊन पैसा गुंतवा. व्यावसायिक वर्गाने पार्टनरच्या सल्ल्याने निर्णय घ्यावा, फायद्यात राहाल. महिलांना वैवाहिक समस्या त्रास देतील. सासरच्या मंडळींशी संयमाने वागावे. विद्यार्थ्यांना मेहनत घ्यावी लागेल. बाहेरचे खाणे टाळून, घरचे जेवण घ्या.
सिंह
या आठवड्यात अमावस्या त्रासदायक आहे. नोकरदारांनी वरिष्ठांबरोबर वाद घालू नये. हितशत्रू त्रास देतील. राग आणि अहंकारावर ताबा ठेवा. व्यावसायिक वर्गाने नवीन आलेला स्टाफ विश्वासू आहे का, ते तपासून घ्यावे. महिलांचा जोडीदाराबरोबरचा वाद विकोपाला जाण्याची शक्यता आहे. सांभाळून बोला, फार ताणू नका. विद्यार्थ्यांनी सूर्यनमस्कार घालावेत. सूर्याची उपासना फायद्याची ठरेल.
हेही वाचा – पडू आजारी मौज हीच वाटे भारी…
कन्या
या आठवड्यात मुलांविषयी काळजी राहील. नोकरदारांनी नको ते धाडस करू नये. नेहमीच्या पद्धतीने कामे पूर्ण करा. औषधोपचारांवर खर्च होईल. व्यावसायिक वर्गाने अमावस्येला दानधर्म करावा. कामगारांच्या गरजा ओळखून मदत करावी. महिलांनी नातेसंबंध जपावेत. जोडीदाराची काळजी घ्यावी. विद्यार्थ्यांनी पाळीव प्राण्यांपासून लांब रहावे.
तुळ
हा आठवडा संमिश्र घटनांचा काळ आहे. जमीन खरेदी-विक्रीचा व्यवहार शक्यतो टाळा. नोकरदारांनी नवीन कर्ज घेणे टाळावे. अतिरिक्त कामाचा मोबदला मिळणार नाही. व्यावसायिक वर्गाने कागदपत्रांवर सही करताना काळजी घ्यावी, बारकाईने कागदपत्रे वाचून घ्यावेत. शेअर मार्केटमध्ये विचारपूर्वक गुंतवणूक करावी. महिलांना आरोग्यविषयक त्रास होईल, पथ्य पाळावीत. विद्यार्थ्यांनी अभ्यासात एकाग्रता ठेवावी, तरच यश मिळेल.
वृश्चिक
या आठवड्यात छोटे प्रवास होतील. प्रवासात वस्तू सांभाळा. नोकरदारांना कामाचा ताण जाणवेल. त्यामुळे घरी वाद घालू नका. पत्रकार असलेल्यांसाठी चांगला काळ आहे. व्यावसायिक वर्गाने वाद घालू नये. मोठ्यांशी उद्धटपणे वागू नये. शांततेत निर्णय घ्या. महिलांचे भावंडांशी मतभेद संभवतात. शेजाऱ्यांबरोबर वाद टाळा. विद्यार्थ्यांना मेहनत करणे गरजेचे आहे, हे लक्षात ठेवावे. वेळेचे नियोजन करा.
धनु
या आठवड्यात विचारपूर्वक गुंतवणूक करा. नोकरदारांनी बोलताना विचार करून बोलावे. व्यावसायिक वर्गाच्या बाबतीत भागीदारीतील व्यवसाय उत्तम प्रगती करेल. प्रवास करावा लागेल. एखादी धार्मिक सहल करू शकाल. बाहेरील खाद्यपदार्थ टाळा, विषबाधा होण्याची शक्यता आहे. कुटुंबातील शाब्दिक वादविवादांमुळे महिलांना मानसिक त्रास होईल. विद्यार्थ्यांना अनुकूल ग्रहमान आहे. सूर्यनमस्कार घालावेत.
मकर
या आठवड्यात सांभाळून बोला. चिडचिड करू नका. नोकरदारांच्या दृष्टीने एकूण ग्रहमान ठीक नाही. तब्येतीच्या कुरबुरी असतील. जुने आजार डोके वर काढतील. काळजी घ्या. व्यावसायिक वर्गाच्या बाबतीत वडिलोपार्जित मालमत्तेचे प्रश्न सुटतील. जुनी येणी वसूल होतील. नवीन गुंतवणूक करू शकाल. महिलांनी सात्विक आहार घ्यावा, अन्यथा पोटाचे आजार उद्भवू शकतात. विद्यार्थ्यांचे भावंडांशी वैचारिक मतभेद होण्याची शक्यता आहे.
कुंभ
या आठवड्यात मानसिक अशांतता राहील. नोकरदारांनी कुणाच्या आश्वासनाला बळी पडू नये. संततीबाबत चांगली बातमी मिळेल. व्यावसायिक वर्गाने पैशाचे मोठे व्यवहार टाळावेत. गुंतवणूक करताना तज्ज्ञ व्यक्तीचा सल्ला घ्या. घरातील समस्यांमुळे महिलांच्या मनात सतत नकारात्मक विचार येतील. विद्यार्थ्यांना अभ्यासात आणि परीक्षेत यश मिळेल.
हेही वाचा – ओंकार साधनेतून निरामय मानसिक आरोग्य
मीन
या आठवड्यात फार धावपळ होण्याची शक्यता आहे. नोकरदारांनी महत्त्वाची कागदपत्रे सांभाळून ठेवावीत. स्वतःची कामे स्वतः करा, दुसऱ्यावर विसंबून राहू नका. व्यावसायिक वर्गाने कर्जाची परतफेड करावीत. परदेशी प्रवास संभवतो. महिलांनी तब्येतीची काळजी घ्यावी. 17 तारखेला दानधर्म करा. विद्यार्थ्यांनी चांगल्या संगतीत रहावे, स्पष्ट बोला.
