दर्शन कुलकर्णी
- आज, दिनांक : 10 जुलै 2026; वार : शुक्रवार
- भारतीय सौर : 19 आषाढ शके 1948; तिथि : दशमी 08:16, एकादशी 29:22; नक्षत्र : भरणी 13:15;
- योग : धृति 07:14, शूल 27:50; करण : बव 18:53;
- सूर्य : मिथुन; चंद्र : मेष 18:44; सूर्योदय : 06:06; सूर्यास्त : 19:20;
- पक्ष : कृष्ण; अयन : दक्षिणायन; संवत्सर : पराभव;
- शालिवाहन शक : 1948; विक्रम संवत : 2082; युगाब्द : 5128
योगिनी स्मार्त एकादशी
वेद कन्सल्टन्सी / 9987433660
दिनविशेष
‘लिटील मास्टर’ सुनील मनोहर गावसकर
टीम अवांतर
क्रिकेटच्या इतिहासात विक्रमादित्य हे बिरूद सार्थ ठरवणाऱ्या लिटील मास्टर सुनील गावसकर यांचा जन्म 10 जुलै 1949 रोजी मुंबईत झाला. 1971 मध्ये कसोटी क्रिकेटमध्ये पदार्पण करणाऱ्या गावसकर यांनी कसोटीत 10 हजारांपेक्षा जास्त धावा काढल्या आहेत. हा टप्पा ओलांडणारे ते पहिले खेळाडू ठरले.
वेस्ट इंडिजमधील पदार्पण कसोटी मालिकेत त्यांनी 774 धावा काढून मालिका जिंकून देण्यात महत्त्वाचा वाटा उचलला. त्यानंतर त्यांची बॅट निवृत्तीपर्यंत तळपत राहिली. 1983 मध्ये त्यांनी डोनाल्ड ब्रॅडमन यांचा सर्वाधिक कसोटी शतकांचा (29 शतके) विक्रम मोडला. गावसकर यांनी कारकिर्दीत 35 कसोटी शतके ठोकली. त्यांचा हा विक्रम 2005 पर्यंत अबाधित होता. त्यानंतर मास्टर ब्लास्टर सचिन तेंडुलकरने हा विक्रम मोडला. सलग तीन डावात शतक काढण्याचा विक्रमही गावसकर यांच्या नावावर आहे. (2006 मध्ये ऑस्ट्रेलियाचा कर्णधार रिकी पॉंटिंग याने या विक्रमाशी बरोबरी केली.)
हेही वाचा – वारी पंढरीची… जीवनाचे तत्त्वज्ञान शिकवते!
1970 ते 1980 या दशकात गावसकर यांनी बराच काळ भारतीय संघाचे कर्णधार पदही भूषवले होते. याशिवाय,, 1983 साली भारताला विश्वकरंडक जिंकून देण्यात त्यांनी मोलाचा वाटा उचलला होता. फलंदाजीबरोबर गावसकर उत्तम क्षेत्ररक्षकही होते. यष्टीरक्षकाव्यतिरिक्त कसोटीत 100 हून जास्त झेल टिपणारा पहिला भारतीय होण्याचा मानही त्यांच्याच नावे आहे.
गावसकर आक्रमक फलंदाज नसले तरी, त्यांचे फटके मारण्याचे तंत्र विशेष होते. लेट फ्लिकचे ते बादशहा होते. खर्या अर्थाने ते कसोटी क्रिकेटचे खेळाडू होते. त्यामुळे एकदिवसीय सामन्यात त्यांना पहिले शतक काढण्यासाठी 1987 पर्यंत वाट बघावी लागली. कसोटीतील त्यांच्या अव्दितीय कामगिरीमुळे 1980 मध्ये त्यांना व्हिस्डेन या क्रिकेटमधील प्रसिद्ध मासिकातर्फे सर्वोत्कृष्ट क्रिकेटपटू म्हणून गौरविण्यात आले.
निवृत्तीनंतर त्यांनी सनी डेज, आयडल्स, रन्स अन रूइन्स आणि वन डे वंडर ही चार पुस्तकेही लिहिली आहेत. सुनील गावस्कर यांनी मराठी चित्रपट ‘सावली प्रेमाची’ मध्ये मुख्य भूमिका देखील साकारली. शिवाय, 1988 साली प्रदर्शित झालेल्या ‘मालामाल’ सिनेमात देखील ते एका लहान भूमिकेत दिसले होते.
क्रिकेटमधील त्यांच्या योगदानाची दखल घेत भारत सरकारने 1975 मध्ये पद्मश्री आणि अर्जुन पुरस्कार, 1980 मध्ये पद्मभूषण पुरस्काराने सन्मानित केले. याशिवाय, 2000 मध्ये महाराष्ट्र शासनाचा महाराष्ट्र भूषण पुरस्कार त्यांना प्रदान करण्यात आला. 2009 मध्ये आयसीसी क्रिकेट हॉल ऑफ फेममध्ये त्यांचा समावेश करण्यात आला. 2012 मध्ये बीसीसीआय सी. के. नायडू जीवनगौरव पुरस्काराने त्यांचा गौरव केला गेला. मुंबईचे मानद शेरीफ म्हणून देखील त्यांची निवड करण्यात आली. याव्यतिरिक्त, भारत आणि ऑस्ट्रेलिया यांच्यातील कसोटी मालिकेला ‘बॉर्डर-गावसकर ट्रॉफी’ असे नाव देऊन त्यांचा जागतिक स्तरावर गौरव करण्यात आला आहे. सध्या ते एक प्रसिद्ध समालोचक आणि स्तंभलेखक म्हणून कार्यरत आहेत.
आजचे राशिभविष्य
मेष – काहीतरी नवीन आणि मोठे काम करण्याची आज इच्छा जागृत होईल, त्याचबरोबर तुम्हाला जुनी, अपूर्ण कामे हातावेगळी करण्याची संधीही मिळेल. आत्मविश्वास हा तुमचा सर्वात मोठा सोबती असेल. संततीकडून एखादी चांगली बातमी मिळू शकते, ज्यामुळे घरात आनंदाचे वातावरण असेल. विद्यार्थ्यांनाही मानसिक तणावातून दिलासा मिळेल. त्यांना अभ्यासाबद्दल अधिक आत्मीयता वाटेल.
वृषभ – निर्णय घेताना आज गांभीर्य राखणे महत्त्वाचे ठरेल. प्रत्येक वेळी खेळकर वातावरणातच काम होईल याची शाश्वती नाही. कुटुंबासोबतची सहल केवळ अविस्मरणीयच ठरणार नाही, तर तुमचे नातेसंबंधही अधिक दृढ करणारी असेल. जोडीदारासाठीचे एखादे छोटेसे सरप्राईज त्यांच्या चेहऱ्यावर हास्य आणू शकते. संततीला मिळालेली एखादी संधी किंवा सन्मान तुमच्या अभिमानाचा विषय ठरेल.
मिथुन – आजचा दिवस सामान्य वाटला तरी त्यात अनेक महत्त्वाच्या संधी दडलेल्या आहेत. व्यावसायिकांना एका प्रभावशाली व्यक्तीला भेटण्याची संधी मिळू शकते, ज्यामुळे भविष्यातील यशाचे नवीन मार्ग खुले होऊ शकतात. आर्थिक बाबींमध्ये अधिक सावधगिरी बाळगा. घाईने घेतलेल्या निर्णयामुळे आर्थिक नुकसान होऊ शकते. शेअर बाजारातील गुंतवणूकदारांनी सावधगिरीने पावले उचलणे आवश्यक आहे.
कर्क – आजचा दिवस तुमच्यासाठी संधी आणि यश घेऊन येत आहे. एखादा प्रलंबित व्यावसायिक करार अखेर मार्गी लागू शकतो, ज्यामुळे तुमचा आत्मविश्वास वाढेल. सृजनशील आणि डिझाइन क्षेत्रात काम करणाऱ्यांना एखादी सुवर्णसंधी मिळू शकते. व्यवसायाला नवी दिशा देण्याचे प्रयत्न यशस्वी होतील.
सिंह – तुमची नेतृत्व कौशल्ये आज अनेकांना प्रभावित करणारी असतील. तुमचा प्रभाव पूर्वीपेक्षा अधिक जास्त दिसून येईल. कामातील तुमची मेहनत आणि समर्पण तुम्हाला आदर, प्रशंसा किंवा एखादे विशेष यश मिळवून देऊ शकते. विद्यार्थ्यांना काही आव्हानांना सामोरे जावे लागू शकते. संयम आणि सातत्यपूर्ण प्रयत्नांमुळे ते यशाच्या जवळ पोहोचतील. जुन्या व्यवहारांमधून नफा मिळण्याचीही शक्यता आहे.
कन्या – आजचा दिवस व्यस्त असेल, पण योग्य दिशेने केलेल्या कठोर परिश्रमाचे उत्कृष्ट परिणाम मिळू शकतात. आपल्या मोठ्या ध्येयांवर लक्ष केंद्रित करा. आरोग्याकडे दुर्लक्ष करणे टाळा. काही जुन्या कौटुंबिक समस्या पुन्हा उद्भवू शकतात. विद्यार्थ्यांना मानसिक तणावातून दिलासा मिळण्याची शक्यता आहे.
तुळ – आज सकाळची सुरुवात थोडी संथ होऊ शकते. कौटुंबिक वाद चर्चेतून मिटू शकतो. आज तुमच्या शब्दांना विशेष महत्त्व असेल, म्हणून विचारपूर्वक बोला. पाहुण्यांच्या आगमनाने घरात आनंदाचे वातावरण असेल. धार्मिक किंवा आध्यात्मिक कार्यांमधील तुमची आवड वाढू शकते. विद्यार्थ्यांना अधिक मेहनत करण्याची गरज आहे.
वृश्चिक – आजचा दिवस तुम्हाला संयम आणि समजूतदारपणाचे महत्त्व शिकवेल. क्षुल्लक गोष्टींवरून रागावणे टाळा. प्रवासादरम्यान तुम्हाला महत्त्वाची माहिती मिळू शकते, जी भविष्यात फायदेशीर ठरेल. व्यावसायिकांच्या रखडलेल्या प्रकल्पांना गती मिळू शकते. आज प्रत्येक निर्णय काळजीपूर्वक घ्या. घाई करणे हानिकारक ठरू शकते.
हेही वाचा – बनाना डिलाइटची गोष्ट…
धनु – आज तुम्हाला काहीतरी मोठे आणि नवीन करण्याची प्रेरणा मिळू शकते. नवीन काम शिकण्याची आणि प्रगती करण्याची संधी मिळेल. विद्यार्थ्यांना त्यांच्या अभ्यासात अधिक शिस्त पाळण्याची गरज भासेल. कोणाकडून पैसे येण्याची शक्यता असेल, तर ते परत मिळतील. कायदेशीर प्रकरणात निकाल तुमच्या बाजूने लागू शकतो.
मकर – खर्च नियंत्रणात ठेवणे तुमच्यासाठी शहाणपणाचे ठरेल. घाईने घेतलेला निर्णय नंतर समस्या निर्माण करू शकतो. रखडलेले एखादे काम आज पूर्ण होऊ शकते. नवीन विरोधक निर्माण होऊ शकतात, त्यामुळे तुमच्या योजना गुप्त ठेवा. एखाद्या कामासाठी कर्ज मिळवण्याचा प्रयत्न करत असाल, तर ते मिळण्याची दाट शक्यता आहे. संततीच्या शिक्षणाबद्दलची तुमची चिंता हळूहळू कमी होऊ शकते.
कुंभ – आज मनात नवीन कल्पना येतील, ज्या भविष्यात यशाकडे नेऊ शकतात. व्यवसाय किंवा कामातील सर्जनशील विचारसरणी तुम्हाला इतरांपेक्षा वेगळे ठरवेल. आरोग्याच्या कोणत्याही किरकोळ समस्यांकडे दुर्लक्ष करू नका. कामाच्या ठिकाणी तुमच्या सूचनांचे कौतुक केले जाईल. तुमच्या पदोन्नती किंवा नवीन जबाबदाऱ्यांविषयीच्या चर्चा अधिक तीव्र होऊ शकतात.
मीन – नोकरी आणि करिअरच्या दृष्टीने आजचा दिवस आशादायक ठरेल. नोकरीच्या शोधात असलेल्यांना चांगली संधी मिळू शकते. नातेसंबंधांमध्ये संतुलन राखणे महत्त्वाचे ठरेल. बऱ्याच काळापासून रखडलेल्या कामांमध्ये प्रगती होऊ शकते. कामाच्या ठिकाणी सांघिक कार्य तुम्हाला महत्त्वपूर्ण ध्येये साध्य करण्यास मदत करू शकते. काही विरोधक तुम्हाला तीव्र विरोध करण्याचा प्रयत्न करतील, मात्र तुमची बुद्धिमत्ता आणि सतर्कता त्यांचे प्रयत्न हाणून पाडतील.
