विदर्भात बहुतेक वेळेस सकाळच्या किंवा दुपारच्या नाश्त्याकरिता बनवला जाणारा पोटभरीचा पदार्थ म्हणजे उकडपेंडी (उकरपेंडी)! गव्हाच्या किंवा ज्वारीच्या पिठापासून तयार केला जाणारा चविष्ट असा हा पदार्थ आहे. खूपजण उकडपेंडी ही एकतर फक्त गव्हाच्या पिठाची करतात किंवा फक्त ज्वारीचे पीठ वापरून करतात, परंतु मी मात्र दोन्ही पिठं मिक्स करून उकडपेंडी करते. करायला सोपा आणि फारशी तयारी न करता चटकन होणारा हा पदार्थ आहे. रव्याचा उपमा नाश्त्याचा अविभाज्य अंग झालेला आहे, परंतु कधीतरी थोडाबहुत उपम्यासारखाच परंतु वेगळ्या पिठांचा आणि चवीला वेगळा असा उकडपेंडी हा पदार्थ करायला काहीच हरकत नाही. संध्याकाळी पोळ्या करायचा कंटाळा आला अथवा कुठून थकून-भागून आलात तर ही उकडपेंडी लगेच तयार करून मस्तपैकी आंब्याच्या किंवा लिंबाच्या लोणच्या सोबत घेऊन क्षुधाशांती करता येते.
साहित्य
- गव्हाचे पीठ – 2 वाट्या
- ज्वारीचे पीठ – 1 वाटी
- मोठा कांदा – 1
- हिरव्या मिरच्या – 4
- कढीपत्ता – 5-6 पाने
- शेंगदाणे – मुठभर
- तेल – एक ते दीड पळी
- मोहरी – एक टीस्पून
- जिरे – एक टीस्पून
- हिंग – अर्धा चमचा
- तिखट – दोन चमचे
- हळद – एक चमचा
- मीठ – चवीनुसार
- साखर – चवीनुसार (ऐच्छिक)
- दही – दोन लहान चमचे
- कोथिंबीर – मुठभर
- मोठा कांदा – वरून घ्यायला बारीक चिरलेला (ऐच्छिक)
हेही वाचा – Recipe : पालक आणि कांद्याच्या पातीचे रायते
कृती
- गव्हाचे तसेच ज्वारीचे पीठ एकत्र करून कढईमध्ये मंद आचेवर कोरडेच गुलाबीसर भाजून घ्यावे.
- पीठ भाजून झाले की, त्याच कढईत तेल गरम करून जिरं आणि मोहरी टाकावी. मोहरी आणि जिरं फुटल्यावर अर्धा चमचा हिंग टाकावा.
- त्यानंतर बारीक चिरलेल्या हिरव्या मिरच्या, कढीपत्ता टाकावा. पाठोपाठ त्यात कांदा टाकून तो थोडा ट्रान्सपरन्ट झाला की, शेंगदाणे टाकावेत.
- शेंगदाणे गुलाबीसर झाले की, एक चमचा हळद, दोन चमचे तिखट, चवीनुसार मीठ आणि चिमुटभर साखर, दोन लहान चमचे दही टाकावे आणि एकजीव करावे.
- त्यानंतर आधी भाजून ठेवलेली पिठं टाकून एकदा परत सगळं मिश्रण परतून घ्यावे.
- त्यामध्ये अंदाजानुसार गरम पाणी टाकत जावे. लक्षात असू द्या की, पिठाचा चिकट गोळा होता कामा नये. हळूहळू पाणी टाकत पीठ ओलसर करावे आणि ढवळत राहावे. उकडपेंडी करताना हा भाग खूप महत्त्वाचा आहे.
- पिठात पाणी टाकले की, कढईवर झाकण ठेवून मंद आचेवर एक दणदणीत वाफ काढावी.
- उकडपेंडी कोरडी झाली आहे, असं वाटलं तर परत पाण्याचा एक हबका मारावा किंवा ताटलीवर पाणी ठेवून पुन्हा एकदा वाफ द्यावी आणि साधारण तीनएक मिनिटे झाकण ठेवून ही उकडपेंडी परत एकदा छान परतून घ्यावी.
- गॅस बंद केल्यानंतर कढईवर ताटली ठेवून पाचएक मिनिटे वाफ दबू द्यावी.
हेही वाचा – Recipe : साबुदाणा, भगर, बटाटा पॅटिस विथ ग्रीन चटणी!
टीप्स
- अशा प्रकारे तयार झालेली गरमागरम उकडपेंडी प्लेटमध्ये घ्यावी, त्यावर बारीक चिरलेला कांदा आणि कोथींबीर घालावी.
- लिंबाचे किंवा आंब्याचे लोणचे अथवा दह्यासोबत उकडपेंडीचा आनंद घ्यावा.
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.
या ईमेलवर किंवा
9869975883 या व्हॉट्सॲप क्रमांकावर
तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
