कामिनी व्यवहारे
भारतात आमटीचे नानाविध प्रकार आहेत. वेगवेगळ्या डाळींची तसेच मिक्स डाळींचीही ही आमटी केली जाते. चवीतही फरक असतो. डोक्यावर टाळूला घाम येईल अशा काही झणझणीत असतात. या डाळींची लज्जत आणखी वाढविण्यासाठी त्यात काही पदार्थही घातले जातात. काहीवेळेस कणकेच्या वड्या (डाळ ढोकळी) तर, काहीवेळेस बेसनाचे गोळे (गोळ्यांची आमटी) घातल्याने त्याचे स्वरुप बदलते आणि वेगळाच स्वाद येतो.
साहित्य
- बेसन – दीड वाटी
- जिरे – एक चमचा
- लसूण – 5 ते 6 पाकळ्या
- तेल – फोडणीसाठी
- मोहरी – अर्धा चमचा
- हिंग – अर्धा चमचा
- हळद – अर्धा चमचा
- मिरची पावडर – 2 चमचे
- कोथिंबीर – अर्धी वाटी (चिरलेली)
- मीठ – चवीनुसार
हेही वाचा – Recipe : केळफुलाचे वडे ट्राय केले आहेत का?
कृती
- प्रथम कढई किंवा भांडे गॅसवर ठेवून फोडणीकरिता त्यात मोहरी, हिंग, हळद आणि 2 पाकळ्या लसूण ठेचून घालवा.
- नंतर त्यात 3 वाट्या पाणी आणि थोडे मीठ घालावे.
- ते पाणी उकळेपर्यंत लसूण आणि जिरे हे पाणी न घालता जाडसर वाटून घ्यावे.
- नंतर हे वाटण तसेच मिरची पावडर, थोडीशी हळद, मीठ, थोडी चिरलेली कोथिंबीर हे बेसनात घालावे आणि सर्व चांगले एकत्र करून आपण कणिक भिजवतो, त्यापेक्षा थोडे सैलसर भिजवून घ्यावे.
- तोपर्यंत आपण गॅसवरती ठेवलेले पाणी उकळते. त्या पाण्यात थोडे मीठ, थोडी कोथिंबीर घालून आपण भिजवलेल्या बेसनाचे छोटे छोटे गोळे त्यात सोडावेत. सर्व गोळे सोडून झाल्यावर मंद आचेवर 10 मिनिटे शिजू द्यावेत.
- ही गोळ्याची आमटी गरम भाताबरोबर किंवा भाकरी बरोबर छान लागते.
- जर आवडत असेल तर त्यावरती शेंगदाणा तेल घेऊन खावे.
हेही वाचा – Recipe : खमंग कोबी, मटार वडी (पानगा)
एकूण कालावधी
- तयारीसाठी – 10 ते 15 मिनिटे
- आमटी तयार होण्यासाठी – 15 मिनिटे
पुरवठा संख्या – 3 ते 4 जणांसाठी
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.
या ईमेलवर किंवा
9869975883 या व्हॉट्सॲप क्रमांकावर
तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
