रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही नवनवीन प्रयोग केले जातात… असेच काही प्रकार ‘फूड कॉर्नर’मध्ये देत आहोत. बाजरीची उसळ, आगळेवेगळे रसम अन् मिक्स कडधान्यांची मिसळ बनविण्याच्या या टिप्स वापरून पाहा.
- भात शिजवताना, तसेच डाळ शिजतानाही पाणी जास्त झाल्यास ते पाणी एका सॉसपॅनमध्ये एकत्र करून त्याला तांबड्या मिरच्या, कोथिंबीर, कढीलिंब, हिंग, मिठाची चरचरीत फोडणी द्या. उकळत असतानाच त्यात टोमॅटो साँस अथवा रॉ मँगो पल्प घाला. आमटीऐवजी हे ‘रसम’ खूपच स्वादिष्ट लागते.
- मेथीच्या दाण्यांचा उपयोग आपण रोजच्या आहारात करतो. कारण मेथी औषधी आहे. आमटीला मेथीचा वास चांगला लागतो; पण कुणाकुणाला फोडणीतील मेथीचे दाणे आमटीवर तरंगलेले आवडत नाहीत. लहान मुले तर हे काळे काळे आणि कडू घातलं आहे, म्हणून पदार्थ बाजूला सारतात. तेव्हा डाळ शिजतानाच त्यात पाव टीस्पून मेथी घालावी. डाळीबरोबर मेथी चांगली शिजते. आमटीला वास तर येतो; पण मेथी वेगळी लागत नाही. त्याप्रमाणेच मेथीची बारीक पावडर करून ठेवल्यास वेळेवर कढी, लालभोपळ्याची भाजी अथवा भरताच्या फोडणीत हिंगाबरोबर हिंगाच्या प्रमाणात मेथी पावडर घातल्यास त्या पदार्थाची खुमारी वाढते. फोडणीत सर्वांत शेवटी मेथी पावडर घालावी. कारण मेथी पावडर लगेच लाल होते.
हेही वाचा – Kitchen Tips : भज्यांची भाजी अन् सँडविच टोस्टरमधली भरली कारली…
- अर्धी वाटी मेथी दाणे थोड्याशा तेलात खमंग भाजून मिक्सरवर जाडसर पूड करावी. भाजी-आमटीसाठी फोडणी करताना पाव चमचा त्यात टाकल्यास भाजी. आमटीला छान चव येते. विशेषतः, पातळ भाजीला छान स्वाद येतो.
- आपल्या घरात काही वेळा थोडी थोडी कडधान्ये उरतात. अशा वेळी ती सर्व एकत्र भिजत घालून चांगले मोड येऊ द्यावेत. मोड आलेली धान्ये स्वच्छ धुऊन कुकरमध्ये शिजवून घ्यावीत. फक्त एकच शिट्टी होऊ द्यावी. नंतर कडधान्ये गार करावीत. मग त्यावर लाल तिखट, मीठ, धणे, जिरे यांची पावडर घालावी. नंतर ओला नारळ, कोथिंबीर, बारीक शेव घालून मिसळ तयार करावी. आवडत असल्यास लिंबू किंवा दही घालावे. ही मिसळ फार चविष्ट होते. तेल, तूप काही नसल्यामुळे पौष्टिक आहे.
हेही वाचा – Kitchen Tips : अशा प्रकारे पालक परोठे अन् कोबीची थालिपीठ भाजी करून पाहा…
- रात्री बाजरी धुऊन पाण्यात भिजत ठेवावी. सकाळी पाण्यातून उपसून स्वच्छ फडक्यात बांधून ठेवावी. साधारणतः एका दिवसात बाजरीस मोड येतात. (हिवाळ्यात मोड येण्यास दोन दिवस लागतात.) पांढरे मोड मोड आलेली बाजरी कुकरमधून वाफवून घ्यावी. वाफ येण्यास इतर कडधान्यापेक्षा थोडा जास्त वेळ लागतो. वाफवलेल्या बाजरीवर मीठ, लिंबू पिळून खायला दिल्यास, त्याची चव अगदी कोवळ्या हुरड्यासारखी लागते किंवा मटकीची उसळ जशी करतात, त्याप्रमाणे बाजरीची उसळ करावी. इतर उसळींपेक्षा ही वेगळी आणि रुचकर लागते.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील.
