आरेन
भारताचा माजी दिग्गज क्रिकेटपटू युवराज सिंगने एका मुलाखतीत कपिल देव आणि महेंद्रसिंग धोनी या माजी विश्वविजेत्या कर्णधारांची माफी मागितली. यामुळे क्रिकेटविश्वात युवराजच्या या मुलाखतीची प्रचंड चर्चा रंगली आहे. युवराजचे वडील योगराज यांनी काही महिन्यांआधी या दोन्ही माजी क्रिकेटपटूंवर टीका केली होती. त्यामुळे, सोशल मीडियावरही बराच गदारोळ माजला होता.
युवराजने स्पष्ट केले की, त्याचे वडील योगराज सिंग यांनी महेंद्रसिंग धोनी आणि कपिल देव यांच्याबद्दल रागात जी विधाने केली, ती चुकीची होती. यासाठी त्याने माफीदेखील मागितली. ‘वडिलांच्या या वादग्रस्त वक्तव्यांशी मी अजिबात सहमत नाही आणि या दोन्ही दिग्गजांची मी मनापासून माफी मागतो,’ असे युवराज म्हणाला. योगराज यांनी युवराजला राष्ट्रीय संघातून वगळण्यासाठी धोनीला जबाबदार धरले होते, तसेच आधीच्या निवडीच्या मुद्द्यांवरून त्यांनी कपिल देव यांच्यावरही टीका केली होती.
हेही वाचा – आपल्यांचा आपलेपणा…
यावर युवराज म्हणाला, “यासाठी मी कपिल सर आणि एमएस धोनी यांची माफी मागतो. कारण, कपिल देव हे भारताचे एक महान खेळाडू आहेत. दोघांचे एकमेकांशी कसे संबंध होते, मला माहीत नाही. कारण, तेव्हा माझा जन्मही झाला नव्हता. मी धोनीसोबत खेळलोय. पण, माझ्या वडिलांनी त्याच्याबद्दल जे काही म्हटले, त्यावर मी त्यांना स्पष्ट सांगितले की, हे बरोबर नाही. कारण, याचा थेट परिणाम माझ्यावर होतो. मी त्याच्यासोबत क्रिकेट खेळलो आहे.”
युवराजने पुढे म्हटले की, “जी काही कारणे असतील, ती सर्वांना माहीत आहेत. पण, मी त्या दोघांचीही या टीकेबद्दल प्रामाणिकपणे माफी मागू इच्छितो. त्यांनाही हे माहीत आहे की, या वक्तव्याशी माझा संबंध नाही. एक क्रिकेटपटू म्हणून त्यांनी देशासाठी जे काही केले आहे, त्याबद्दल माझ्या मनात त्यांच्याविषयी नितांत आदर आहे.”
हेही वाचा – या डोळ्यांची दोन पाखरे…
नेमकं काय झालं होतं?
कपिल देव हे उत्तर विभाग आणि हरियाणाचे कर्णधार असताना त्यांनी आपल्याला विनाकारण संघातून वगळले होते, असा योगराज यांचा आरोप आहे. याच कारणामुळे त्यांनी कपिल यांना त्यांच्या घरी जाऊन शिवीगाळ केली आणि नंतर क्रिकेट सोडले, असे त्यांचे म्हणणे आहे.
धोनीच्या बाबतीत योगराज यांनी वारंवार म्हटले आहे की, युवराजला संघातून बाहेर काढण्यास धोनीच कारणीभूत होता. युवराजने कर्करोगाशी लढा देऊन पुनरागमन केले. मात्र, 2019 विश्वचषकासाठी त्याची निवड झाली नाही.
