रोजच्या जेवणात वेगळेपणा आणण्याचा प्रयत्न गृहिणींचा असतो. यासाठी काही क्लृप्ती लढविल्या जातात. ‘फूड कॉर्नर’मध्ये कोबीची भाजी, मसालेभात, पालक-पनीर, पुदिन्याचे दही करताना या टिप्स वापरून पाहा.
- लिंबं सुकू नयेत म्हणून ती वाळूत ठेवावीत आणि उन्हाळ्यात त्यावर थोडे पाणी शिंपडावे म्हणजे लिंबं ताज्यासारखी राहतात.
- पावशेर दुधात 5-6 पुदिन्याची पाने वाटून घालून त्याचे दही लावावे. उन्हाळ्यात हे हिरवे दही घेतल्यास जेवण पचण्यास त्याचा उपयोग होतो.
- कुठल्याही भाजीत, मसालेभातात आणि सार, पिठले वगैरेत जिरे, खोबरे घालताना एक वाटी खोबरे किसून वा चिरून घ्यावे. त्यात एक चमचा जिरे, धणे आणि कढीलिंबाची थोडी पाने कढईत भाजावीत. खोबरेही किंचित गरम करावे. एकत्र कुटून बरणीत भरावे. प्रत्येक वेळी कुटण्याचा त्रास वाचतोच आणि पदार्थांना स्वादही चांगला येतो.
हेही वाचा – Kitchen Tips : मसाल्याच्या रस्सा भाज्या, सँडविचची चटणी, भाज्यांवरील तवंग आणण्यासाठी…
- कांद्याचे साल लवकर निघत नसल्यास, तो थोडा वेळ गरम पाण्यात आणि नंतर थंड पाण्यात बुडवावा. सालं लवकर सोलली जातात.
- पालक-पनीर करताना पालकाची पाने थोडे दूध घालून, न चिरता शिजविल्यास पालकाचा हिरवा रंग शेवटपर्यंत टिकून राहतो. कृत्रिम रंग लागत नाही. तसेच, पनीर तुपात मंद आचेवर गुलाबी-सोनेरी तळून लगेच गरम पाण्यात टाकले असता अतिशय लुसलुशीत राहते आणि चविष्ट लागते.
- मेथीची भाजी स्वस्त असताना निवडून कडकडीत उन्हात वाळवून पावडर करून ठेवावी. आयत्या वेळी दहीवडा आणि रस्साभाजीत वरून भुरभुरावी. चव वेगळीच आणि छान लागते.
- भाजी किंवा पुलावात पनीरचा उपयोग करते वेळी फोडणीत तळलेले पनीर घालावे आणि दोन-तीन चमचे दूध घालावे. पनीर मऊ आणि स्पंजी होते.
- पानकोबीच्या भाजीत आंब्याच्या लोणच्याचा मसाला पावशेर भाजीला चहाचा दीड चमचा भरून किंचित ओलसर करून फोडणीत टाकावा आणि लागलीच भाजी करावी. फोडणीत हळद अगदी थोडी टाकावी. थोडीशी साखर पण टाकावी. दुसरा कोणताही मसाला घालू नये. भाजी चवदार होते.
हेही वाचा – Kitchen Tips : भेंडीच्या बियांची चटणी, ग्रीन ग्रेव्ही भाजी अन् पडवळाची कोशिंबीर…
- शेवग्याच्या शेंगा कुकरमध्ये उकडल्यास त्या फुटतात; पण उकडायला ठेवताना छोटासा गुळाचा तुकडा घालावा आणि शेंगाना मीठ चोळून ठेवावे म्हणजे शेंगेत मीठ शिरते, चव चांगली येते आणि गुळामुळे शेंगा शिजतात, पण फुटत नाहीत.
- कसुरी मेथी विकत आणण्याऐवजी आपण जेव्हा मेथीची भाजी आणतो, त्यातलीच निवडून दोन मुठी पाने पॅनमध्ये थोडी शेकवून सावलीत वाळवावीत. लागेल तेव्हा पाने पंजाबी डिशेस अथवा व्हेज, नॉनव्हेज बिर्याणीमध्ये कसुरी मेथी (चिमूटभर) पाने म्हणून वापरावीत.
तुमच्याही ‘स्पेशल रेसिपी’ किंवा अशा काही ‘किचन टिप्स’ असतील तर, avaantar.recipe@gmail.com या ईमेलवर किंवा 9869975883 या व्हॉट्सॲप क्रमांकावर पाठवा. या वेबसाइटच्या ‘फूड कॉर्नर’ या कॅटेगरीत त्या प्रसिद्ध केल्या जातील. (‘सुगरणीचा सल्ला’ पुस्तकातून साभार)
